Mekem Ol Baebol Stadi We Oli Pulum Man Blong Kam Disaepol
1 Afta we Filip i “talemaot gud nyus blong Jisas” long man Itiopia, man ya i askem long Filip se: “?I gat sam samting i stap blokem mi yet, se mi no save baptaes?” (Wok 8:27-39) Long saed blong man Itiopia ya, hem i laekem finis blong ridim ol hanraet we oli kamaot long God, mo afta we Filip i givhan long hem long saed blong speret, hem i rere blong kam wan disaepol. Be i no olgeta man we oli bilif se oli nidim blong stadi Baebol.
2 Yumi glad tumas se ogenaesesen blong Jeova i givim nyufala buklet ya, A Book for All People, blong pulum ol man blong stadi long mesej blong Baebol we i stret long taem blong yumi. Ating ol save insaed long buklet ya bambae i pulum plante man we hat blong olgeta i stret, be oli no save plante samting long saed blong Baebol, nating se oli bin skulgud. Nambawan buklet ya i blong pusum ol man blong wantem faenemaot moa long saed blong Baebol.
3 Taem yumi statem wan Baebol stadi, i gud blong luklukbak long ol nambawan advaes we i bin kamaot long smol pepa long medel blong Kingdom Wok blong Yumi, long Jun 1996, we i tokbaot olsem wanem blong yusum Save buk blong mekem ol stadi we oli karem frut. Taem yu stap mekem wan stadi, tingbaot olsem wanem studen i stap gohed gud, mo traem luksave ol samting we yu mas givhan long hem blong kamgud moa long hem. Pulum studen blong mekemrere stadi blong hem, mo blong ridim ol vas. Sipos hem i yusum prapa tok blong hem blong givim ansa, hem i save soem fasin tangkyu we i stap long hat blong hem from trutok. Olgeta we oli stadi, be antap long hem, oli ridim Baebol mo ol narafala buk blong Sosaeti mo kam long ol miting tu, kolosap oltaem oli gohed kwik moa. Pulum studen blong toktok wetem ol narafala man long ol samting we hem i stap lanem. Long kaen fasin, soem long hem ol samting we hem i nidim blong mekem blong gohed moa long saed blong speret. Yumi no mas gohed blong mekem stadi longtaem tumas wetem olgeta we oli no wantem tekem disisen long saed blong trutok. Ol studen oli mas soem se oli wantem lanem trutok, oli mas tekem disisen long saed blong trutok, mo gohed gogo oli kasem mak blong givim laef blong olgeta long Jeova mo tekem baptaes.
4 Long sam famle, ol wanwan memba oli gat prapa Baebol stadi blong olgeta. Be, kolosap oltaem, i moagud blong mekem stadi wetem ful famle tugeta, from we samting ya i givhan long famle blong joengud long saed blong speret.
5 Jisas i givim oda long yumi blong pulum ol man oli kam disaepol blong hem. (Mat. 28:19) Blong mekem samting ya, yumi mas mekem Baebol stadi long fasin we i halpem man blong gohed kasem mak we hem i askem se: “?I gat sam samting i stap blokem mi yet, se mi no save baptaes?”