Yumi Givhan Long Ol Baebol-Stadi Blong Yumi
1 Long wol, taem man i tokbaot ‘progres’ (fasin blong mekem i gud moa), wantaem nomo man i tingbaot olgeta teknik no olgeta tul we man i save yusum tede. Be from we yumi man blong Jeova, yumi no tingting olsem. Yumi evriwan i wantem kam bigman long saed blong speret. Yumi glad tumas we sam pablisa oli kam givhan long yumi nao yumi kam disaepol blong Kraes. Yumi mekem gudfala wok mo yumi kasem plante frut from.—Jon 15:8; 2 Pita 1:5-8.
2 Long ol Gospel blong Baebol, tok ya “disaepol” i min se wan man we i bilif long olgeta tijing blong Kraes. Be moa yet, man ya i mas folem ol loa ya long laef blong hem tu. (Mat. 28:19,20) ?Yu ting se man ya we yu mekem Baebol-stadi wetem hem, hem i klia long samting ya? ?Bambae yu mekem wanem blong sloslou hem i kam wan disaepol blong Kraes?
Yumi Pulum Tingting Blong Olgeta Long Ogenaesesen
3 Blong wan Baebol-stadi i gru long saed blong speret, man ya i mas gat tangkyu long wok we ogenaesesen blong Jeova i mekem. Taswe, ol pablisa we oli gat Baebol-stadi oli mas pulum tingting blong ol stadi blong ol long saed blong ogenaesesen blong God. Sam yia i pas, Sosaete i talem se long evri stadi we yumi mekem, yumi mas spenem 5 kasem 10 menet blong tokbaot wan samting long saed blong ogenaesesen. Buklet Jehovah’s Witnesses Unitedly Doing Gods’ Will Worldwide i givhan bigwan long yumi long saed ya. ?Stadi blong yufala i gat finis wan buklet olsem? Sipos no, yufala i mas mekem plan blong karem wan i go long hem. Yufala i mas leftemap tingting blong ol man we yufala i stadi wetem olgeta, blong oli ridim buklet ya, mo yufala i mas talem long olgeta se long ol stadi we bambae yufala i mekem naoia, bambae yufala i tekem smol taem blong tokbaot sam haf blong buklet ya.
4 Ol tok we oli stap long ol pej 14 mo 15 blong buklet ya oli gud blong leftemap tingting blong ol man we oli stadi blong oli go long ol miting blong kongregesen. I gud we yu traem ridim wan no tu haf blong buklet ya evri wik. Yufala i save soemaot long olgeta se olgeta miting oli tijim yumi mo oli givim plante advaes long yumi long saed blong wan spesel nid we yumi gat. Yufala i mas soemaot long ol man we yufala i stadi wetem se sipos oli wantem gru long saed blong speret oli mas go long ol miting. (Hib. 10:24,25) Yufala i save leftemap tingting blong olgeta blong oli joen wetem yumi long haos-Kingdom. Long fasin olsem, olgeta nomo bambae oli save luk yuniti mo lav blong ol man blong God taem oli joen wanples blong mekem wosip.—Sam 133:1; Jon 13:35.
Yumi Halpem Olgeta Blong Oli Gru Moa Long Saed Blong Speret
5 Olgeta we oli stap kam long ol miting oli nidim blong stadi gud long Tok blong God, blong oli kasem save long plante moa samting mo blong oli mekem ol loa blong Baebol oli wok long laef blong olgeta. Taswe, bambae yumi gohed nomo blong mekem stadi wetem olgeta long buk, Yu Yu Save Laef Foreva Long Wol, buk Joen Tugeta Long Wosip Blong Trufala God no buk True Peace. Nating se oli tekem baptaes bifo we oli finisim ol buk ya, be yumi mas mekem olsem. Yufala i save givim wan long ol buk ya long olgeta. Sipos oli no finisim yet wan buk, be i oraet nomo blong yufala i givim wan narafala buk long olgeta. Long rod olsem, bambae oli save laekem moa ol samting blong God, bambae oli rid moa, ale oli save gru kwiktaem long saed long speret. Be tu, yumi mas eksplenem long olgeta se i impoten tumas we oli kasem sabskripsen long Wajtaoa mo Wekap!. Mo oli mas gat sam narafala buk blong Sosaete blong mekem se oli kasem ‘ol kakae blong speret long stret taem blong hem.’ (Luk 12:42) Olgeta we oli mekem olsem bambae oli stanap strong. Bambae oli kam strong oltaem from ol samting we oli stap lanem, mo bilif blong olgeta i no save hafhaf be i strong oltaem.—Kol. 2:7.
6 Ol man ya we oli stap stadi wetem yumi, i no longtaem bambae oli kam Wetnes blong Jeova. Taswe, oli nidim help blong yumi blong oli gru long saed blong speret. (Hib. 5:14) Taem oli wok strong blong jenisim sam samting long laef blong olgeta, yumi mas leftemap tingting blong olgeta from we oli mekem gudfala samting ya. (Fil. 3:16) ?Olsem wanem long stadi blong yu? ?Hem i talemaot ol samting we hem i lanem long famle blong hem no long ol man we hem i save? ?Sipos hem i naf gud, hem i putum nem blong hem finis long Tiokratik skul? ?Hem i wantem kam wan pablisa blong talemaot gud nyus?
7 Yes, sipos yumi tijimgud ol man we oli stap stadi wetem yumi, yumi save hop se Jeova bambae i blesem wok blong yumi. (2 Korin 9:6) Yumi no mas foget se prea i save gat paoa blong givhan bigwan long ol Baebol-stadi blong yumi. Yumi mas askem long Jeova blong hem i givhan long olgeta blong oli mekem ol samting we oli lanem oli wok long laef blong olgeta. (1 Korin 3:6,7) !Yes, i gud tumas sipos ol man ya oli traehad oltaem, nao oli mekem gud wok insaed long kongregesen, oli joen wetem yumi blong presem nem blong Jeova God!