?Bambae Mi Save Olsem Wanem Sipos i No Gat Man Blong Talemaot Long Mi?
1 Filip, we hem i wan ivanjelis, i mitim wan man Itiopia, nao hem i askem long man ya sipos hem i kasem save long wanem we hem i stap ridim long Tok blong God. Man Itiopia ya i ansa se: “?Bambae mi mi save olsem wanem? I no gat man blong i talemaot mining blong hem long mi.” Filip i glad tumas blong halpem man ya blong kasem save long gud nius long saed blong Jisas. Risal blong samting ya, hemia se kwiktaem nomo man ya i wantem tekem baptaes. (Wok 8:26-38) Filip i stap obei long oda ya we Kraes i givim blong ‘pulum ol man long olgeta ples long wol, oli kam man blong hem, blong baptaesem olgeta mo tijim olgeta.’—Mat. 28:19, 20.
2 Yumi mas obei long oda ya blong mekem disaepol, olsem we Filip i bin mekem. Be, long olgeta man ya we yumi stadi Baebol wetem olgeta, i no gat plante we oli gru kwiktaem long saed blong spirit olsem man Itiopia ya. Man ya hem i wan hiten man we i bin joen long skul blong ol man Jiu, nao hem i gat gudfala save long saed blong Baebol. Hat blong man ya i rere finis blong akseptem trutok, mo hem i nidim nomo blong luksave se Jisas nao hem i Mesaea ya we ol profet oli tokbaot bifo. I no isi long yumi sipos yumi stadi wetem ol man we oli no gat save long saed blong Baebol, no we ol giaman tijing blong jos oli bin lidim olgeta oli gorong, no we oli fesem hadtaem from sam problem we oli kasem long laef blong olgeta. ?Wanem i save givhan long yumi blong karem gudfala frut taem yumi lidim ol Baebol studen oli go long rod blong givim laef blong olgeta long God mo tekem baptaes?
3 Luksave Nid Long Saed Blong Spirit We Baebol Studen i Gat: Pepa we i kam wetem Kingdom Wok blong manis Ogis 1998, i tokbaot hamas taem we yumi save tekem blong stadi wetem ol man long buklet ya Wanem no Save buk. Hem i givim advaes ya: “I impoten blong tingbaot laef mo edukesen blong studen from we samting ya nao bambae i makemaot se hem i spid no i slou moa. . . . I nogud yumi wantem spid tumas blong finisim ol buk nomo be studen i no gat klia save. Olgeta studen wanwan oli nidim wan strongfala faondesen blong stanemap niufala bilif ya blong olgeta long Tok blong God.” Taswe, i waes blong no spid i gotru long olgeta japta blong Save buk wetem tingting ya se yumi mas finisim buk ya long sikis manis nomo. Nogat. Maet i nidim moa long sikis manis blong halpem sam man blong gru go kasem mak ya we oli naf blong baptaes. Taem yu mekem stadi evri wik, spenem hamas taem we yu ting se i nidim, blong halpem studen ya blong kasem save mo agri long samting we hem i stap lanem long Tok blong God. Samtaem, maet i tekem tu no tri wik blong finisim wan japta long Save buk. Samting ya bambae i givim naf taem blong ridim mo eksplenem gud plante long ol vas blong Baebol we oli stap long japta ya.—Rom 12:2.
4 Be, afta we yu finisim Save buk, ?olsem wanem sipos yu luksave se studen i nidim blong kam klia moa long sam poen no maet tingting blong hem i no strong yet blong tekem disisen blong folem trutok mo givim laef blong hem i go long God? (1 Kor. 14:20) ?Wanem samting moa we yu save mekem blong lidim hem i go long rod ya blong kasem laef?—Mat. 7:14.
5 Mekem Baebol Studen i Fulapgud Long Saed Blong Spirit: Sipos i klia se wan man i stap gru long saed blong spirit, be i slou nomo, mo i klia se hem i rili gat tangkiu from ol samting we hem i lanem, ale, yu mas gohed blong stadi Baebol wetem hem long wan narafala buk, afta we yu finisim buklet ya Wanem mo Save buk. Maet i no nidim blong mekem samting ya wetem evri man, be taem i nidim, yu save gohed long stadi wetem buk ya Joen Tugeta Long Wosip. Bighaf blong ol pablisa oli gat prapa kopi blong buk ya finis blong yusum, sipos kongregesen i no moa gat saplae blong hem. Nomata long samting ya, yumi mas tingbaot se buklet ya Wanem wetem Save buk hemia nao tufala buk we yumi mas stadi fastaem wetem ol man. Baebol stadi ya wetem olgeta visit mo aoa we yumi spenem blong storian wetem hem, yumi mas makem long ripot blong yumi, nating sipos studen ya i baptaes finis mo i no finisim seken buk blong hem yet.
6 ?Hemia i minim se olgeta we oli tekem baptaes i no longtaem mo we oli bin stadi long wan buk nomo, oli mas kasem help bakegen blong stadi long namba tu buk? No, i no nidim blong mekem olsem. Be nao, maet oli kam slak long saed blong spirit no maet oli no gru moa long save blong olgeta long trutok, mo maet oli harem se oli nidim help blong mekem trutok i wok moa long laef blong olgeta wan. Yumi mas storian fastaem wetem brata we i lukaot long wok blong prij, bifo we yumi statem stadi bakegen wetem ol pablisa we oli baptaes finis. Be, sipos yu gat save long wan man we i bin stadi long Save buk bifo, be neva i gohed kasem mak ya we hem i givim laef blong hem i go long God mo tekem baptaes, maet yu wan yu save tekem disisen blong stat bakegen blong stadi Baebol wetem hem.
7 Wan mak blong Kristin lav hemia fasin blong soem intres long defren nid blong ol wanwan man we yumi stadi wetem olgeta. Yumi wantem halpem ol studen blong kasem bigfala save moa long saed blong trutok blong Tok blong God. Ale, folem save we hem i gat, bambae hem i naf blong stanap long trutok mo givim laef blong hem i go long Jeova, mo soemaot samting ya taem hem i tekem baptaes long wota.—Sam 40:8; Efes. 3:17-19.
8 ?Yu rimemba wanem i hapen afta we man Itiopia ya i baptaes? “Hem i stap folem rod blong hem i go, we hem i glad tumas” from we naoia hem i wan niufala disaepol blong Jisas Kraes. (Wok 8:39, 40) I gud yumi mo olgeta we yumi bin givhan long olgeta blong folem rod blong trutok, yumi evriwan i faenem bigfala glad blong mekem wok blong Jeova God—!stat naoia, gogo i no save finis!