Impoten Wok Ya Blong Mekem Disaepol i Stap Kam Antap Bigwan
1 Bifo we Jisas i lego wol ya, hem i givim oda long ol man blong hem se oli mas ‘go long olgeta ples long wol, blong mekem disaepol.’ Blong mekem samting ya, oli mas joen long wan bigfala wok blong prij mo blong tijim man, gogo oli kavremap ful wol. (Mat. 28:19, 20; Wok 1:8) ?Wanem tingting blong olgeta long saed blong oda ya we oli kasem? ?Oli ting se wok ya i strong tumas blong mekem? Hemia i no tingting blong aposol Jon. Afta we hem i spenem 65 yia long wok ya blong mekem disaepol, hem i raetem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.”—1 Jon 5:3.
2 Ol ripot we Baebol i givim long saed blong wok blong ol faswan Kristin, i pruvum se oli wokhad blong folem oda ya blong pulum ol man i kam ol disaepol blong Jisas Kraes. (2 Tim. 4:1, 2) Oli mekem samting ya, i no from we hemia wok blong olgeta, be from we oli wantem tumas blong presem God mo blong karem hop ya blong sef i go long ol narafala man. (Ol Wok 13:47-49) Olgeta man we oli kam disaepol, be biaen, olgeta tu oli pulum narafala man blong kam disaepol. From samting ya, Kristin kongregesen i kam bigwan kwiktaem long faswan handred yia.—Ol Wok 5:14; 6:7; 16:5.
3 Wok Blong Mekem Disaepol i Stap Spid Moa: !Long ol yia 1900, wok ya blong mekem disaepol i bigwan moa i bitim ol narafala taem bifo! Kam kasem tede, plante milyan man oli lesin long gud nyus mo oli mekem laef blong olgeta i laenap wetem wanem we oli harem. (Luk 8:15) Naoia, taem we rabis wol ya i mas lus, i kolosap nomo. Taswe, ‘slef we i stret mo waes’ i givim sam tul long yumi we bambae oli givhan long ol man we oli gat gudfala hat, blong lanem trutok kwiktaem.—Mat. 24:45.
4 Long 1995 yumi kasem buk ya Save Blong Lidim Yu Long Laef We i No Save Finis, mo long 1996 yumi kasem buklet ya ?Wanem Samting We God i Wantem Yumi Blong Mekem? Long saed blong Save buk, Wajtaoa blong Janewari 15, 1996, pej 14, i talem se: “Man i save stadi long buk ya we i gat 192 pej blong hem, long sot taem nomo. Mo olgeta we ‘oli stret blong kasem laef blong olwe,’ oli save lanem naf samting taem oli stadi long hem, blong givim laef blong olgeta long Jeova mo blong tekem baptaes.”—Ol Wok 13:48.
5 Pepa we i stap insaed long Kingdom Wok blong Jun 1996, we stampa tok blong hem “?Olsem Wanem Blong Yusum Buk Ya Save Blong Mekem Disaepol?” i talem se i gud blong gat mak ya i se: “Sipos ol samting long laef blong studen i gud mo hem i kasem save kwik, maet yufala i save finisim wan japta long wan stadi blong wan haoa, we yufala i no nidim blong hareap tumas. Ol studen oli gohed moa gud taem tija mo studen tugeta oli mekem sua se oli stap evri wik blong mekem stadi.” Atikol ya i gohed blong talem se: “I klia se sipos wan man i stadi gogo i finisim fulwan Save buk, hem i mas soem sipos hem i rili wantem long hat blong hem blong mekem wok blong God.” Wan Kwestin we i stap long Kingdom Wok blong Oktoba 1996, i eksplenem se: “I stret blong ting se wan gudfala tija bambae i no nidim wan longfala taem tumas blong halpem wan studen we i gat hed lelebet, blong hem i kasem naf save blong mekem prapa disisen blong hem blong mekem wok blong Jeova.”
6 Buk Save i Karem Gudfala Frut: Long taem we wan yangfala woman i baptaes, hem i talemaot filing we hem i gat taem hem i stadi long Save buk. Hem i bin stadi longtaem lelebet long Laef Foreva buk, mo hem i glad nomo blong stap ridim ol defren haf blong buk ya sloslou. Taem Save buk i kamaot, sista we i mekem stadi blong hem i jenisim stadi blong hem i go long nyufala buk ya. Wantaem nomo, studen ya i luksave se naoia hem i mas mekem wan disisen, mo samting ya i pusum hem blong stat gru moa kwiktaem. Yangfala woman ya, we naoia i wan sista blong yumi, i talem se: “Buk ya Laef Foreva i halpem mi blong laekem Jeova, be Save buk i halpem mi blong tekem disisen blong mekem wok blong Jeova.”
7 Tingbaot wan narafala woman we i lanem trutok kwiktaem. Afta long namba tu stadi blong hem, hem i kam long wan miting long Haos Kingdom, taem we wan seket elda i visitim kongregesen. Long namba tri stadi blong hem long semfala wik ya, hem i talem long seket elda ya se hem i givim laef blong hem finis i go long Jeova mo i wantem kam wan pablisa. Ol elda oli storeyan wetem hem, mo oli agri blong hem i kam wan pablisa, ale, long wik we i kam biaen, hem i stat prij. Baebol stadi we hem i mekem i pulum intres blong hem bigwan, mekem se hem i askem bos blong hem blong spel smoltaem, nao hem i save stadi tu no tri taem long wan wik mo joen moa long wok blong prij. Sista we i stadi wetem woman ya, i no save mekem stadi ya sipos hem i luk we studen i no makem ol ansa mo ridim ol vas fastaem. Sam samtaem, tufala i save kavremap tu no tri japta wantaem nomo. Woman ya i kwik blong jenisim ol samting long laef blong hem, hem i finisim Save buk long fo wik nomo, nao hem i tekem baptaes!
8 Man blong wan sista i talem se fastaem hem i “no bilif nating, olsem plante narafala hasban.” Wan dei, wan brata i askem sipos hem i wantem stadi Baebol wetem Save buk ya. Brata ya i talem se man ya i save stopem stadi enitaem sipos hem i jenisim tingting blong hem. Nating se hasban ya i no skulgud taem hem i yangfala mo i no bin joen long wan jyos blong bitim 20 yia, hem i talem se bambae i traem stadi blong luk se i olsem wanem. ?Wanem tingting we hem i gat taem hem i stadi long Save buk? Hem i talem se: “Mi glad tumas blong faenem se buk ya i tokbaot Baebol long wan fasin we i isi nomo blong kasem save. Ol save we hem i givim oli klia tumas mo oli tru nomo, mekem se, i no longtaem mi mi wantem stadi oltaem. Tija blong mi i folem gud ol advaes we Sosaeti i givim blong mekem disaepol. Nao wetem help blong tabu speret blong Jeova, mi tekem baptaes fo manis biaen. Mi save talem stret se sipos yumi gat fasin blong wantem mekem disaepol, yumi traem faenem ol man long teritori blong yumi we hat blong olgeta i gud, yumi yusumgud Save buk mo ol narafala buk long saed blong Baebol we Sosaeti i givim, mo antap long samting ya, yumi prea long Jeova blong i lidim yumi, bambae yumi save kasem spesel blesing ya blong givhan long wok ya blong mekem disaepol.” I tru se, ol store olsem olgeta ya we yumi jes tokbaot, bambae oli no hapen long yumi evriwan. I no olgeta studen blong yumi evriwan we bambae oli kam long trutok kwiktaem olsem.
9 Ol Studen Wanwan Oli Gru Long Spid We i Defdefren: Tingbaot se fasin blong ol wanwan man blong tijim Tok blong God i no sem mak. Mo tingbaot se fasin we wanwan man i gat blong kasem save long Tok blong God i no sem mak tu. Sam man oli kwik blong gru long saed blong speret, sam narafala oli slou. Samfala studen oli tekem sam manis nomo blong gru, be sam narafala oli tektaem moa bifo we oli luksave samting we oli mas mekem. Fasin we man i gru moa long saed blong speret, i dipen long edukesen we hem i kasem, fasin tangkyu we hem i gat long ol samting long saed blong speret, mo strong tingting we hem i gat long wosip blong Jeova. Long olgeta man we yumi stadi wetem olgeta, i no evriwan we bambae oli “wantem tumas” blong stadi Baebol evri dei, olsem ol man Berea bifo, we oli kam man blong bilif.—Ol Wok 17:11, 12.
10 Hemia risen from wanem pepa we i stap insaed long Kingdom Wok blong Epril 1998, stampa tok blong hem se “I Nidim Moa Baebol Stadi,” i givim gudfala advaes ya se: “I tru, i no olgeta studen blong Baebol we oli gohed kwik. Samfala oli neva bin tingting dip long trutok blong Baebol, mo oli no kwik olsem sam narafala man blong kasem save long hem. Sam narafala oli bisi tumas, mo ating oli no save makemaot naf taem blong mekem plante haf long buk evri stadi. Taswe, maet i tekem longtaem lelebet blong finisim wan japta, mo bitim wan yia blong finisim buk.”
11 Ol Man Blong Mekem Disaepol Oli Skelemgud Ol Samting: I gud blong gat mak ya blong finisim stadi blong Baebol wetem narafala man kwiktaem, be i impoten blong tingbaot laef mo edukesen blong studen from we samting ya nao bambae i makemaot se hem i spid no i slou moa. From we naoia Sosaeti i leftemap tingting blong yumi blong statem ol Baebol stadi wetem buklet ya Wanem, maet i tekem tu no tri manis blong finisim buklet ya bifo we yumi statem Save buk. Sipos yumi yusum olgeta advaes long pepa ya we i stap long Kingdom Wok blong Jun 1996, maet i min se bambae i tekem sikis no naen manis bakegen blong finisim Save buk. Sipos yumi bin statem wan stadi wetem Save buk mo yumi luk se i hadwok long studen blong kasem save, maet i gud blong stopem stadi long buk ya mo gohed wetem buklet ya Wanem. Be, sipos studen i stap gohed gud, ating i moagud blong stadi buklet ya Wanem wetem hem afta we hem i finisim buk Save. Long fasin ya, bambae hem i save tingtingbak long olgeta stampa trutok we hem i lanem long Tok blong God. Be nomata weswan long tufala rod ya we yumi yusum, i nogud yumi wantem spid tumas blong finisim ol buk nomo be studen i no gat klia save. Olgeta studen wanwan oli nidim wan strongfala faondesen blong stanemap nyufala bilif ya blong olgeta long Tok blong God.
12 From we yumi stap long ol lasdei, wok blong halpem ol narafala man blong lanem trutok i impoten moa i bitim bifo. Yumi mas prea oltaem blong statem ol nyufala Baebol stadi. Be tu, yumi mas prea from olgeta ya we oli stap stadi wetem yumi. Nao bambae yumi glad tumas blong baptaesem plante moa disaepol “oltaem, gogo wol ya i finis.”—Mat. 28:20.