Ansa Long Wan Kwestin

◼ Naoia we yumi kasem buk ya Save Blong Lidim Yu Long Laef We i No Save Finis, ?yumi mas mekem Baebol stadi blong hamas manis wetem ol man?

Kingdom Wok Blong Yumi long Septemba 1993, i bin talem se yumi mas gohed blong stadi Baebol wetem olgeta we oli intres, gogo oli finisim tufala buk. Naoia we yumi gat buk ya Save, i luk olsem we i gud blong jenisim plan ya, olsem pej 13 mo 14 blong Wajtaoa blong Janewari 15, 1996, i soemaot.

Buk ya Save i blong halpem olgeta we oli ‘stret blong kasem laef we i no save finis,’ blong oli lanem ol samting we oli mas save long hem, mo blong oli kam naf blong givim laef blong olgeta long Jeova mo tekem baptaes. (Wok 13:48) Taswe, afta we yumi stadi long nyufala buk ya wetem olgeta, i no nid blong gohed long wan narafala buk. Taem ol Baebol studen blong yu oli stat blong bilif long trutok, yu save leftemap tingting blong olgeta blong kasem moa save tru long ol miting blong ol Wetnes blong Jeova, mo tru long fasin blong ridim Baebol mo ol narafala Kristin buk.

Sipos yu savegud ol kwestin long pej 175 kasem 218 blong buk ya Ol Rul Blong Mekem Minista Wok Blong Yumi, samting ya i save givhan long yu. Yu no mas tokbaot no askem ol kwestin ya long Baebol studen blong yu, be i gud blong tokbaotgud ol poen long buk ya Save we oli laenap wetem ol kwestin ya. Samting ya bambae i halpem studen blong eksplenem ol stampa trutok blong Baebol long stret fasin, taem ol elda oli askem ol kwestin long olgeta we oli wantem tekem baptaes.

I no gat nid blong ademap ol narafala poen long samting we buk ya Save i talem, olsem ol poen we oli kamaot long ol narafala buk blong sapotem ol tijing blong Baebol mo blong pruvum se ol gyaman tijing oli rong. Samting ya bambae i mekem se stadi i gohed longtaem tumas. Defren nao, yumi wantem se studen i finisim buk ya kwiktaem, maet long sikis manis nomo. From samting ya, yumi mas mekemrere gud ol stadi ya, blong mekem se yumi save eksplenem ol poen long fasin we i klia mo i sot. Mo tu, yumi mas pulum studen blong mekemrere stadi blong hem, jekem ol vas, mo traehad blong luksave gud wanem samting buk ya i stap tijim hem long evri japta.

Wajtaoa i talem se ol Wetnes blong Jeova oli mas mekem moa Baebol stadi long wan taem we i sot moa. (Lukluk Aesea 60:22.) Sipos yumi yusumgud buk ya Save, bambae yumi halpem ol nyuwan blong kasem mo folem save ya we i blong lidim olgeta long laef we i no save finis.​—Jon 17:⁠3.