Ansa Long Wan Kwestin

◼ ?Hamas manis yumi mas gohed blong mekem Baebol stadi wetem wan man long Save buk?

Jeova i stap blesem ogenaesesen blong hem tede. Yumi luk pruf blong samting ya evri yia, taem plante taosen man oli jusum blong stanap long saed blong trutok. Save buk i stap olsem wan gudfala tul blong givhan long plante man blong jusum rod ya. Wajtaoa blong Janewari 15, 1996, i soem se oli wokem buk ya blong i givhan long studen blong Baebol blong gohed kwik long saed blong speret, gogo maet hem i naf blong tekem baptaes afta sam manis nomo.

Taswe, Wajtaoa ya long pej 17 i givim advaes ya: “Afta we yumi stadi wetem wan man long fulwan Save buk, nao man ya i tekem baptaes, maet yumi no moa nidim blong mekem stadi wetem hem long wan narafala buk.”

?Olsem wanem long wan man we i no tekem baptaes afta we yumi stadi long fulwan Save buk wetem hem? Kingdom Wok Blong Yumi blong Jun 1996, pej 6, haf 23, i mekem yumi tingbaot poen we Wajtaoa i talem, se yumi no nidim blong stadi long ol narafala buk wetem wan man afta we yumi stadi finis long fulwan Save buk. ?Samting ya i min se yumi no moa traem halpem wan man afta we hem i kasem mak ya? No gat. Yumi wantem se olgeta man oli kasem save long ol stampa trutok. Be, i stret blong ting se wan gudfala tija bambae i no nidim wan longfala taem tumas blong halpem wan studen we i gat hed lelebet, blong hem i kasem naf save blong mekem prapa disisen blong hem blong mekem wok blong Jeova. Maet samfala studen oli wantem stadi bitim wan taem evri wik, sipos program ya i stret long laef blong olgeta.

I tru, samfala oli slou moa bitim ol narafala. Be sipos wan pablisa i stadi wetem wan man long fulwan Save buk, we maet i tekem moa taem bitim ol narafala man, be hem i no wantem joen yet long ol miting blong kongregesen, i gud sipos pablisa i tokbaot samting ya wetem ol elda long Sevis Komiti blong kongregesen. Sipos i gat gudfala risen no problem we i mekem se hem i no gohed kwik, maet i stret blong givim moa help long hem. Samting ya i agri long tok long haf 11 mo 12 long pej 17 blong Wajtaoa blong Janewari 15, 1996.

Fasin tangkyu from ol stampa trutok we studen i lanem, samting ya nomo i mas naf blong pusum hem blong kam long ol Kristin miting. Nao maet samting ya i lidim hem blong gohed moa, gogo i soemaot klia se hem i wantem mekem wok blong Jeova. Sipos hem i no soem fasin tangkyu ya from ol samting saed blong speret afta we hem i stadi longtaem lelebet long Save buk, maet i gud blong no moa stadi wetem hem.