Hed Blong Famle—Folem Wan Gudfala Program Long Saed Blong Spirit
1 Nating se Daniel i stap plante yia long taon ya Babilon we i fulap long rabis fasin mo wosip blong ol giaman god, be hem i gohed blong mekem wok blong Jeova wetem ‘olgeta tingting blong hem.’” (Dan. 6:16, 20) ?Daniel i mekem wanem blong stap strong long saed blong spirit? Baebol i soemaot se hem i folem wan program blong mekem ol wok blong hem long saed blong trufala wosip. Olsem nao, tri taem evri dei, hem i go long wan rum antap long haos blong hem, nao hem i prea. (Dan. 6:10) I sua se hem i gat wan program blong ol narafala wok long saed blong spirit tu, olsem ridim Loa. Taswe, taem Daniel i kasem wan traem we hem i save ded from, hem i no kam slak, hem i holemstrong long Jeova mo Jeova i mekem wan merikel blong sevem hem.—Dan. 6:4-22.
2 Sem mak tede, yumi mas wok strong blong ‘yumi no kam slak, mo blong tingting blong yumi i klia gud.’ (Efes. 6:18) Wol ya i “stap long paoa blong Setan.” (1 Jon 5:19) Wantaem nomo, ol man oli save girap agensem yumi, no wan trabol i save kasem yumi we i traem bilif blong yumi. Long taem blong bigfala trabol long fiuja, Gog blong Magog bambae i agensem fulwan ol man blong God, mo bambae i luk olsem se hem i save win. Long taem ya, bambae yumi nidim blong trastem Jeova fulwan.—Esik. 38:14-16.
3 “Wan impoten samting se, ol famle oli mas tekem fasin ya blong ridim, stadi, mo tokbaot Baebol oltaem.” Hemia fastok blong drama we yumi bin lukluk long distrik asembli long 1998, “Ol Famle—!Mekem Baebol Riding i Kam Wan Fasin Blong Laef Evri Dei!” Hem i gohed olsem: “Taem ol famle oli folem wan gudfala program olsem, mo oli mekem Baebol i laef, samting ya i save gat bigfala paoa long olgeta. I save mekem se oli kasem moa save, i save mekem bilif blong olgeta i strong. Mo tu, i save putum plante eksampol blong oli folem, olsem ol man mo woman blong bifo we oli bilif wetem fulhat blong olgeta. Eksampol blong olgeta ya i save pulum yumi blong sapotem trutok fulwan.” Naoia bambae yumi tokbaot ol defdefren wok long saed blong spirit we yumi mas putum long program blong yumi. Mo ol hed blong famle oli save lukaot wan no tu rod blong kamgud moa long program we famle blong olgeta i stap folem long saed blong spirit.
4 Stadi Long Tok Blong God Evri Dei: “Taem Kingdom blong God i rul bambae i no gat wan samting we i save agensem rul ya. Samting we God i wantem, bambae i kamaot long wol olsem we i kamtru finis long heven. Bambae i no moa gat ol rabis man—mo rabis anamol tu—we bambae oli ‘save mekem i nogud long narafala man, mo i no moa gat wan samting we i save spolem man.’ (Aes. 11:9; Mat. 6:9, 10)” Tok ya i stap long buk ya Ridimgud Ol Tok Blong Baebol Evri Dei—2001 long vas blong dei long Septemba 11. !Ol nogud samting we i hapen long dei ya oli mekem se yumi rili nidim ol gudfala tok ya! ?Yu we yu hed blong famle, yu yu stap ridim vas blong dei mo toktok blong hem wetem famle blong yu evri dei? Hemia i save givhan bigwan long famle. Sipos yufala i no save joen wanples long moning, ating yufala i save jusum wan narafala taem blong dei. Wan papa i talem se: “Mifala i luk se taem blong kakae long sapa i wan gudfala taem blong tokbaot vas blong dei.”
5 Sipos yu stap folem wan program finis blong ridim vas blong dei oltaem wetem famle blong yu, hemia i gud tumas. Maet yu save go moa mo ridim wan smol haf blong Baebol tu. Samfala oli stap ridim ful japta blong Baebol we vas blong dei i kamaot long hem. Sam narafala oli jusum wan buk blong Baebol, ale oli ridim wan smol haf evri dei gogo oli finisim buk ya. Sipos yufala i ridim Baebol evri dei, samting ya bambae i givhan long famle blong kasem fasin ya we oli fraet blong mekem Jeova i kros, mo tu, bambae i pulum olgeta blong wantem mekem moa long wok blong Jeova.—Dut. 17:18-20.
6 Bambae i moa gud yet sipos yufala i save tekem smoltaem afta we yufala i ridim Baebol mo vas blong dei, blong tokbaot olsem wanem blong wokem save ya long laef blong yufala. Buk ya Ministry School i givim advaes long pej 60 se: “Yu save . . . jusum sam vas blong Baebol riding blong wik, nao yufala i save tokbaot mining blong olgeta mo askem ol kwestin olsemia: ‘?Olsem wanem haf ya i save halpem mifala? ?Olsem wanem mifala i save yusum ol vas ya long wok blong prij? ?Ol vas ya oli soemaot wanem long saed blong Jeova mo fasin we hem i folem blong mekem ol wok blong hem? ?Olsem wanem samting ya i save givhan long mifala blong lavem hem moa?’ ” Ol storian olsem long saed blong spirit bambae oli halpem famle blong ‘traem save olgeta samting we Jeova i wantem blong oli mekem.’—Efes. 5:17.
7 Famle Stadi: Sipos hed blong famle i mekem stadi evri wik wetem famle blong hem, hemia wan gudfala rod blong soemaot long ol pikinini blong hem se ol samting long saed blong spirit oli mas stap long fasples long laef blong olgeta. Wan yangfala man i tingtingbak long laef blong hem i se: “Plante taem, Papa i kambak long wok we hem i taed tumas, mo i hadwok long hem blong stap wekap. Be nating, mifala i stadi, mo samting ya i givhan long mifala blong luksave se stadi i impoten tumas.” Ol pikinini tu oli save givhan blong mekem plan ya i wokgud. Wan famle we i gat naen pikinini long hem oli girap long faef klok moning blong mekem famle stadi, from we i no gat wan narafala taem we i stret.
8 Blong karem frut long famle stadi, hed blong famle i mas ‘lukaot long ol tok we hem i stap tijim olgeta long hem.’ (1 Tim. 4:16) Buk ya Ministry School i talem long pej 32 se: “Blong karem gudfala frut long famle stadi, hed blong famle i mas savegud famle blong hem fastaem. ?Ol wanwan memba blong famle oli stap gohed gud long saed blong spirit, no olsem wanem? . . . ?Taem yu yu prij wetem ol pikinini blong yu, yu luk se oli sem blong talemaot long ol fren blong olgeta se oli Witnes blong Jeova? ?Oli laekem program blong famle stadi mo Baebol riding we yufala i stap folem? ?Oli rili traehad blong mekem laef blong olgeta i laenap wetem ol fasin we Jeova i wantem? Sipos yu we yu hed blong famle, yu stap luklukgud ol samting ya, bambae yu faenemaot wanem we yu nidim blong mekem blong putum mo bildimap ol gudfala Kristin fasin long ol wanwan memba blong famle blong yu.”
9 Ol Miting Blong Kongregesen: Wan impoten haf blong program blong yufala evri wik, i blong mekemrere from ol miting, mo blong go long ol miting. (Hib. 10:24, 25) Maet sam samtaem famle i save joen wanples blong rerem miting. ?Bitim we yufala i wet kasem las menet, yufala i save mekem plan blong yufala i rere longtaem lelebet bifo long miting? Sipos yufala i gat wan program long saed ya, bambae yufala i luk se yufala i reregud oltaem, mo bambae yufala i kasem plante moa gudfala samting from ol miting.—Prov. 21:5.
10 Blong gat wan program we i karem frut long saed blong spirit, program ya i mas gud, mo yufala i mas folem program ya oltaem. ?Olsem wanem sipos sam samting oli blokem yufala blong yufala i no reregud from ol miting? Buk ya Ministry School i givim advaes long pej 31 se: “Yu no mas foldaon long fasin ya blong hareap nomo blong rerem miting jes blong finisim wok ya kwik. Be i nogud tu sipos yu no mekemrere miting nating from we yu no gat taem blong rere long ful miting. I moagud blong makemaot hamas haf blong miting we yu naf blong rerem, mo stadigud long ol haf ya. Mekem samting ya evri wik. Sloslo, yu save go moa blong mekem rere ol narafala haf blong miting tu.”
11 Taem ol famle oli kam eli long miting, samting ya i save givhan blong mekem tingting blong olgeta i rere blong presem Jeova mo blong kasem ol gudfala tijing we hem i stap givim. ?Famle blong yu i stap kam eli? Blong mekem olsem, yufala i mas gat wan gudfala plan long haos mo evriwan i mas joengud blong mekem plan ya i wok. Sipos yu luk se famle blong yu i stap hareap tumas mo ronron olbaot long ol naet blong miting, ating i gud blong traem jenisim program blong yufala lelebet. ?I gat sam samting we yufala i save mekem longtaem lelebet bifo long miting? ?Sipos wan long famle i gat tumas wok, ol narafala oli save givhan long hem? Ating bambae yufala i haremgud moa sipos evriwan i traehad blong jenis eli blong go long miting. Wan gudfala plan i save givhan blong mekem pis i stap long famle mo long kongregesen.—1 Kor. 14:33, 40.
12 Wok Blong Prij: Wan narafala haf blong wan gudfala program long saed blong spirit, i blong putum wan stret taem blong joen long wok blong prij. Wan yangfala man, nem blong hem Jayson, i tingtingbak long taem we hem i pikinini, i se: “Long famle blong mifala, Sarede moning hem i taem blong prij. Hemia i gud long mi, from we moa mi go prij, moa mi luk olsem wanem wok ya i halpem ol man, mo tu, mi mi haremgud moa long hem.” Plante we oli gruap long ol Witnes famle oli talem sem samting. From we oli bin gat wan stret taem evri wik blong prij, samting ya i givhan long olgeta blong gohed gud olsem ol Kristin minista.
13 Sipos yu folem wan program, samting ya i save halpem famle tu blong haremgud moa long ol aoa we oli spenem long wok blong prij, mo halpem olgeta blong karem moa frut long wok ya. ?Olsem wanem wan program i save mekem samting ya? Wajtaoa blong Julae 1, 1999, pej 21 i givim advaes ya: “?Samtaem yu stap tekem taem long famle stadi blong yu blong halpem ol memba blong famle blong rerem wok blong prij long wik? Fasin ya i save givhan bigwan. (2 Timoti 2:15) Hem i save givhan blong mekem se wok blong yufala i gat mining mo i karem frut. Wanwan taem, maet i gud we yufala i yusum fulwan taem blong famle stadi jes blong rerem wok blong prij. Maet i gud se oltaem, yufala i tekem smoltaem long en blong famle stadi no wan narafala taem long wik, blong tokbaot sam haf blong wok blong prij.” ?Olsem wanem? ?Yufala i traem samting ya finis long famle blong yufala?
14 Gohed Blong Kamgud Moa: ?Yu yu luk sam samting we yumi tokbaot long haf ya we famle blong yu i stap mekemgud? Ale, talem ol gudfala toktok long olgeta from. Mo leftemap tingting blong olgeta blong kamgud moa yet. Sipos yu luk se yufala i nidim blong kamgud long plante samting, jusum wan no tu poen nomo we yufala i save wok long olgeta fastaem. Taem yufala i joenem finis tufala poen ya long program blong yufala long saed blong spirit, traem wok long wan no tu narafala poen bakegen. Holem wan gudfala tingting mo no mekem i strong tumas long famle blong yu. (Fil. 4:4, 5) I tru se, i hadwok blong putumap wan gudfala program long saed blong spirit long famle, be sipos yu mekem samting ya, bambae i no blong nating nomo. Jeova i mekem promes se: ‘Man we i stap [“gohed long rod ya we hem i stap,” NW ] obei long mi, mi bambae mi sevem hem.’—Sam 50:23.