Olsem Wanem Evriwan Long Famle Oli Wok Tugeta—Long Fasin Blong Stadi Baebol
1 Trutok i givim trufala mining long famle laef, be i no minim se bambae yu stanap strong oltaem long fored blong Jeova. I tekem taem mo hadwok blong mekem famle i kam strong long saed blong spirit. Taswe, ol memba blong wan famle oli rili nidim blong wok tugeta. Bambae i gat tri defren haf olsemia we oli kamaot biaen. Faswan atikol ya i soemaot olsem wanem ol famle oli save gat gudfala fasin blong stadi.
2 Ridim Baebol Evri Dei: Proveb 24:5 i talem se: “I moa gud blong yu gat save, i winim we yu gat paoa.” Save we man i kasem taem hem i ridim Tok blong God evri dei, i givim paoa we hem i nidim blong agensem ol traem blong Setan. (Sam 1:1, 2) ?Famle blong yu i ridim Baebol evri dei? Tiokratik Skul i givim wan Program Blong Ridim Baebol we yumi save folem evri wik long wan yia. Blong folem program ya, i tekem ten menet nomo evri dei. Jusum wan taem we i stret long evriwan long famle. Maet yu save ridim Baebol mo vas blong dei long buklet ya Ridimgud Ol Tok Blong Baebol taem yufala i drink ti long moning, afta we yufala i kakae finis long sapa, no bifo we yufala i go slip. Fasin ya i mas kam wan haf long laef blong famle blong yu evri dei.
3 Mekem Stadi Tugeta Evri Wik: Famle Baebol stadi i wan impoten samting long laef blong wan famle. Evriwan i save sapotem stadi ya, sipos oli givim fulap ansa. Hed blong famle i mas tingbaot ol nid blong famle blong hem, taem hem i jusum stret buk blong stadi, dei, taem, mo longfala blong stadi ya. Famle stadi i mas stap long fasples long program blong wik. Yu no mas letem ol narafala bisnes we i no impoten tumas, oli blokem stadi.—Fil. 1:10, 11.
4 Wan papa we plante taem ol bisnesman oli telefon i kam long hem long haos, hem i tekemaot telefon taem oli mekem famle stadi. Sipos sam man blong pem samting oli kam luk hem long haos, papa ya i askem olgeta blong joen long stadi wetem famle, no i askem olgeta blong wet kasem we stadi i finis. Tingting blong Papa ya i strong tumas blong no letem ol narafala samting oli blokem famle stadi. Fasin ya i gat paoa long ol pikinini blong hem. Mo bisnes blong hem i rongud.
5 I nambawan tumas, taem ol famle oli traehad tugeta blong mekem ol wok long saed blong spirit. Sipos yumi traehad blong mekem famle stadi oltaem, bambae yumi kasem blesing blong Jeova.—Sam 1:3.