Program Blong Famle—Famle Stadi
1 Presen we i bigwan moa we yu, Kristin papa no mama, yu save givim long ol pikinini blong yu, hemia blong mekem olgeta oli lavem Jeova olsem we yu yu lavem hem. Wan impoten taem blong mekem olsem, hemia taem “yufala i stap long haos” mo yufala i mekem famle stadi long Baebol evri wik. (Dut. 6:5-7) Nating sipos hasban no waef blong yu i gat sem bilif olsem yu no i joen long wan narafala jos, no sipos yu yu stap yu wan nomo blong lukaot long ol pikinini blong yu, be i gud we yufala i mekem famle stadi evri wik. Olsem nao yu save halpem ol pikinini blong yu blong oli kam klosap moa long yu mo long Jeova.
2 Statem Famle Stadi: Faswan samting, hemia blong mekem famle i joen tugeta evri wik blong stadi, we fasin ya i kam olsem wan kastom blong yufala. Sipos yu yu no suagud long dei mo taem we yufala i save stadi long hem, i gud yu tokbaot samting ya wetem famle. (Prov. 15:22) Sipos yu yu gat ol smosmol pikinini, maet yu luk se i moagud blong mekem plante sotfala stadi long wan wik. Faenemaot wanem program nao i stretgud long famle blong yu. Makem stret taem blong stadi long program blong famle, mo yu mas gat strong tingting blong folem program ya.
3 ?Yufala i save stadi long wanem samting? Samfala oli mekem rere ol haf we bambae oli stadi long hem long Buk Stadi no long Wajtaoa Stadi blong kongregesen. Sam narafala oli stadi long ol buk we oli wokem blong ol yangfala. Wan papa we i gat wan smol boe mo wan smol gel, i talem se: “Wan samting we i mekem se stadi blong mifala i wan spesel taem blong wik long tingting blong ol pikinini, hemia from we mifala i mekem ol pleplei we oli laenap wetem ol defren stori long Buk Blong Ol Baebol Stori. Rod ya i putum tijing i go dip insaed long hat mo i isi long ol pikinini blong oli kasem save, samting ya nao i impoten moa i bitim hamas paragraf we mifala i mekem.”
4 Stadi Evri Wik: Famle stadi i mas stap evri wik mo olgeta memba blong famle oli mas glad blong joen long stadi ya. Sipos long taem blong stadi, wan samting i hapen nao i blokem famle blong stadi, i gud blong putum stadi ya i go long wan narafala taem mo dei. Mo tu, maet samtaem i nidim we yufala i stadi long wan poen we i defren long hemia we yufala i stap stadi long hem oltaem. Be ol jenis olsem oli no mas stap longtaem tumas from we oli save spolem program we yu putumap finis blong famle stadi. Wan gel long wan famle, i talem se: “Sipos mifala i mas jenisim taem blong stadi, ale papa i raetem wan not wetem niufala taem long hem, nao i fasem long doa blong aesbokis, blong mifala evriwan i savegud niufala taem ya.” !I gud tumas blong luk ol traehad olsem we ol famle oli mekem blong stadi Baebol evri wik! Taem yu gohed olsem blong tijim ol pikinini blong yu, yu ‘stretem olgeta mo yu trenem tingting blong olgeta olsem we Jeova i wantem,’ yu yu stap soemaot lav blong yu long olgeta mo long Papa blong yumi we i stap long heven.—Efes. 6:4, NW.