Statem Stadi Wetem Buklet Ya Wanem
1 Ol ripot we oli kamaot long ful wol oli soemaot se buklet ya ?Wanem Samting We God i Wantem Yumi Blong Mekem? i wan nambawan tul blong tijim trutok long ol man. Ol Witnes oli statem evri wik plante taosen Baebol stadi wetem buklet ya. ?Yu yu naf blong statem mo lidim wan Baebol stadi wetem buklet ya Wanem?
2 Nating se plante oli luk se i isi blong seremaot buklet ya, samfala oli no save wanem tok oli mas talem blong statem wan stadi. ?Wanem sam gudfala rod we sam pablisa oli faenem blong statem wan Baebol stadi wetem buklet ya Wanem? Bambae ol advaes we oli kam biaen oli save givhan.
3 Soem Olsem Wanem Yumi Mekem Wan Stadi: Fastaem we yumi faenem wan man, no taem yumi mekem wan visit, i moagud blong soem olsem wanem bambae yumi lidim wan Baebol stadi, i bitim we yumi askem nomo long man ya sipos hem i wantem stadi. Samting ya bambae i tekemaot wari mo fraet we plante man oli gat taem oli harem tok ya “stadi.” Ale, taem yumi save soem olsem wanem blong mekem wan stadi, bambae yumi luk se wetem wan fas tok we i isi, wantaem nomo yumi save statem wan stadi.
4 Yumi Mas Reregud Sipos Yumi Wantem Karem Sam Frut: Bambae yumi wantem tumas statem sam Baebol stadi sipos yumi reregud. Fasin blong reregud bambae i givhan long yumi blong faenem ol stret tok mo blong no fraet long wok blong mekem Baebol stadi. Sipos yumi mekem pleplei long ol fastok blong yumi plante taem, bambae yumi toktok isi moa, yumi naf blong tok fri mo wetem prapa tok blong yumi. Samting ya bambae i givhan long yumi blong stap bos long tingting blong yumi, be tu, man blong haos bambae i haremgud moa long tok blong yumi.
5 Taem yu mekem pleplei blong yu, i gud blong kaontem hamas taem tok ya i tekem. Biaen, bambae yu naf blong talem long man blong haos hamas taem i tekem blong soem long hem olsem wanem blong mekem stadi. Wan brata i givim nem blong hem, mo hem i talem se: “Mi kam smol taem nomo, blong soem long yu program blong mifala blong stadi Baebol. Mi nidim raonabaot faef menet nomo blong soem samting ya long yu. ?Yu yu gat faef menet?” Yu save soemaot Lesen 1 blong buklet ya Wanem, long faef menet. I tru se yu no save ridim olgeta vas long sotfala taem ya. Be sipos yu finisim fas lesen long smol taem ya, man blong haos i kasem finis faswan stadi blong hem. Nao, talem long hem se taem yu kambak blong mekem stadi long Lesen 2, bambae yu tekem 15 menet nomo.
6 Ol Tok We Oli Kam Biaen Oli Givhan Plante Finis: “Mi wantem soem long yu wan isi mo sotfala rod blong stadi Baebol long haos blong yu wetem buklet ya: ?Wanem Samting We God i Wantem Yumi Blong Mekem? Plante man oli faenem se, wetem 15 menet nomo blong wan wik, long 16 wik, oli kasem ansa stret from Baebol long ol impoten kwestin ya.” Soem kwiktaem nem blong ol japta. Go long Lesen 1, mo talem se: “Sipos yu gat faef menet, mifala i wantem soem long yu olsem wanem blong mekem stadi ya. Stamba tok long Lesen 1, hemia: ‘?Olsem Wanem Yu Save Fanemaot Samting We God i Wantem Yu Blong Mekem?’ Afta, ridim ol tri kwestin, mo eksplenem wanem ya ol namba we oli stap wetem ol kwestin. Ridim haf 1, mo soem long man olsem wanem blong faenem ansa. Maet man blong haos i save ridim haf 2. Nao, talem long hem se: “?Olsem wanem yu save ansa long kwestin ya wetem ol tingting we oli stap long haf 2? [Ridim kwestin ya bakegen, mo letem man i toktok.] Makemgud se i gat sam vas long evri haf. Ol vas ya oli pusum yumi blong lukluk ansa we Baebol i givim long ol kwestin ya. Eksampel, i gud we yumi ridim 2 Timoti 3:16, 17 mo bambae yu skelem sipos vas ya i sapotem ansa we yu givim long saed blong man we i stamba blong Baebol.” Afta we yu ridim haf 3, lukluk kwestin blong hem, mo ridim Jon 17:3. Ale, yu save pulum man blong tingtingbak long Lesen 1, mo tokbaot ol tijing we hem i kasem tru long stadi ya. Nao yu save go long Lesen 2 mo ridim laswan kwestin, “?Wanem tufala rod blong kasem save long saed blong God?” Askem long hem se: “?Wetaem bambae yu gat 15 menet blong yumi save mekem Lesen 2 mo faenem ansa long kwestin ya?”
7 I impoten tumas blong yusum sam tok we man i save kasem isi nomo, mo blong leftemap tingting blong hem taem i stret blong mekem olsem. Taem yu mekem plan blong nekis visit, i moagud blong leftemap hem blong gohed long nekis lesen, i bitim we yumi askem long hem sipos hem i wantem gohed long stadi. Talem long hem se bambae yu glad blong kam luk hem bakegen. Sam pablisa oli talem se bambae oli glad blong mekem wan lesen long telefon sipos man i bisi tumas. Yu save talem tu long studen ya se i gud blong putum buklet blong hem long wan ples we i stret, mo i isi blong hem i save faenem taem yu visitim hem bakegen.
8 Soemaot Tingting We i Strong: Nating se stamba blong wan gudfala stadi, hemia fasin blong stap reregud, yumi mas soem se yumi gat strong tingting blong gohed long rod ya. Tijim wan lesen long smol taem nomo i no isi, taswe yu mas gat strong tingting blong mekem pleplei bakegen mo bakegen. Bambae taem yu soem olsem wanem blong mekem stadi, tok blong yu i kamaot isi nomo. Traem blong soem olsem wanem blong mekem wan stadi long olgeta man we yu mitim long ol haos wanwan, long rod, mo taem yu prij long telefon. Sipos i had blong yu faenem wan Baebol stadi, tingting blong yu i no mas foldaon. Sipos yu holemstrong mo yu wantem tumas seremaot trutok long narafala, ale bambae yu kasem mak blong yu blong statem wan Baebol stadi.—Gal. 6:9.
9 Sipos yu folem ol advaes ya, ale bambae yu tu, yu statem mo lidim wan Baebol stadi long buklet ya Wanem, mo yu kasem jans ya blong givhan long wan man blong folem rod blong laef.—Mat. 7:14.