Yu Yusum Buklet Ya Gud Nius Blong Tijim Man
1. ?Oli wokem buklet ya Gud Nius olsem wanem?
1 Wan impoten tul we yumi yusum blong tijim ol man long Baebol hemia buklet ya !Gud Nius We i Kamaot Long God!, we yumi tokbaot long Kingdom Wok Blong Yumi blong manis Julae. Long buklet ya, oli no raetem ol toktok blong ol vas, olsem nao ol man blong haos bambae oli glad blong lanem samting we oli ridim stret long Baebol. Plante buk blong stadi blong yumi oli wokem long wan fasin we man i save lanem ol samting we i stap long Baebol hem wan nomo. Be man we i yusum buklet ya blong stadi long Baebol i nidim wan tija. Taswe, taem yumi seremaot buklet ya, yumi mas soemaot olsem wanem yumi mekem Baebol stadi. Long rod ya, man blong haos bambae i glad blong luk olsem wanem hem i save lanem gud nius we i stap long Baebol.—Mat. 13:44.
2. ?Yumi save yusum buklet ya Gud Nius olsem wanem taem yumi mitim wan man?
2 Fastaem We Yu Mitim Wan Man: Maet yu talem se: “Plante man oli stap wari long fiuja blong wol. ?Yu yu ting se ol samting bambae oli kam gud? [Yu letem man i ansa.] Baebol i tokbaot gud nius we yumi save putum tingting blong yumi i stap strong long hem. Hemia sam long ol kwestin we Baebol i givim ansa long olgeta.” Yu givim buklet long man blong haos, mo yu askem long hem blong i jusum wan kwestin we i stap biaen long buklet ya. Afta, yu yusum haf wan blong kwestin we hem i jusum blong soemaot long hem olsem wanem blong stadi. Wan narafala rod, hemia blong askem wan kwestin we yu jusum long buklet ya we bambae i pulum tingting blong man blong haos. Biaen yu soemaot long hem olsem wanem buklet ya i save givhan long hem blong hem i faenem ansa long Baebol. Sipos kwestin we yu jusumaot i gat wan video blong hem long jw.org, i gud we yu soemaot video ya taem yu givim buklet long hem.
3. Yu eksplenem olsem wanem yu save yusum buklet ya Gud Nius blong mekem wan Baebol Stadi.
3 Olsem Wanem Blong Mekem Baebol Stadi: (1) Yu ridim kwestin we i gat namba i stap klosap long hem blong givhan long man blong haos blong hem i tingbaot bigfala tingting we i stap long paragraf. (2) Yu ridim paragraf we i stap aninit long kwestin ya. (3) Yu ridim ol vas we oli stap long raeting we i lei, mo yu askem ol gudfala kwestin long hem blong givhan long hem blong hem i luk olsem wanem Baebol i givim ansa long kwestin we i stap. (4) Sipos i gat sam narafala paragraf aninit long kwestin ya, yu save folem bakegen poen namba 2 mo 3. Sipos i gat wan video we i joen gud wetem kwestin ya, i gud yu soemaot video ya long hem taem yutufala i stadi. (5) Bifo we yu go long nekis kwestin, i gud yu askem bakegen kwestin we i stap long blak raeting, blong meksua se hem i kasemsave.
4. ?Wanem bambae i givhan long yumi blong yumi yusum gud tul ya?
4 I gud yu save olsem wanem blong yusum gud nambawan tul ya. Long taem we yu luk se i stret, i gud yu yusum. Bifo we yu mekem stadi, i gud yu tingbaot studen blong yu mo olsem wanem yu save storian wetem hem long ol vas we i stap long haf we yutufala i stadi long hem. (Prov. 15:28; Wok 17:2, 3) !Taem yu stap lanem blong yusum gud tul ya, bambae yu yu laekem tumas blong yusum blong tijim trutok long ol man!