Seremaot Save Blong Lidim Man Long Laef We i No Save Finis
1 Jeova, hem i “tija blong olgeta man.” (Sam 94:10) Hem i yusum yumi blong givimaot save blong hem long ol man we oli no save olsem wanem blong mekem wok blong hem. Buk ya Save Blong Lidim Yu Long Laef We i No Save Finis i wan nambawan tul blong tijim ol man. Tru long buk ya, olgeta we hat blong olgeta i stret, oli save kasem stret save blong God we i kamaot long Tok blong Hem, Baebol. (1 Tim. 2:3, 4) Buk ya Save i eksplenem trutok long klia mo isi fasin, blong halpem ol man blong kasem ol samting we Jeova i wantem tijim long olgeta. Long manis ya, yumi mas traem storeyangud wetem ol man, blong mekem se oli wantem ridim buk ya. Hemia nao sam rod we yu save yusum. Yu no mas traem lanem ol tok ya baehat, be traem yusum prapa toktok blong yu blong talem ol bigfala poen, olsem prapa fasin blong yu blong storeyan.
2 Bighaf blong ol man oli bin lusum wan we oli laekem hem tumas long ded, taswe yu save tokbaot hop blong laef bakegen. Fastaem yu save talem samting olsemia:
◼ “Bighaf blong yumi i bin lusum wan we yumi laekem hem tumas long ded. ?Yu bin tingbaot sipos bambae yu luk hem bakegen samtaem? [Wet long ansa.] Fastaem, God i no gat tingting se bambae man i ded. Jisas i pruvum se olgeta we yumi laekem olgeta tumas we oli ded, oli save girap bakegen. [Ridim Jon 11:11, 25, 44.] Nating se samting ya i hapen plante handred yia bifo, hem i soemaot samting we God i promes blong mekem long yumi. [Openem buk ya Save i go long pija long pej 85 mo ridim tok kolosap long pija. Nao soem pija long pej 86 mo tokbaot smol.] Sipos yu laekem blong ridim moa long saed blong hop ya we i mekem yumi haremgud, mi mi glad blong livim buk ya wetem yu.”
3 Taem yu gobak long wan we yu bin tokbaot laef bakegen wetem hem, yu save gohed blong storeyan wetem hem long rod ya:
◼ “Ating yu rimemba we yumi bin tokbaot se, fastaem God i no gat tingting ya se bambae man i ded. Sipos samting ya i tru, ?from wanem yumi kam olfala mo yumi ded? Samfala totel oli laef blong bitim 100 yia, mo sam tri oli laef blong plante taosen yia. ?From wanem ol man oli laef blong 70 no 80 yia nomo? [Wet long ansa.] Ded i kasem yumi from we faswan man mo woman tufala i no obei long God.” Ridim Rom 5:12. Openem Save buk i go long pej 53 mo ridim nem blong japta. Tokbaot haf 1 kasem 3, mo soem ansa blong ol kwestin we oli stap. Mekem plan blong kambak bakegen blong tokbaot ol narafala haf long japta ya. Askem man blong haos blong traem ridim ol haf ya bifo we yu kambak.
4 Sipos yu stap toktok wetem wan man we i luk olsem se i strong long skul blong hem, maet yu talem se:
◼ “I gat plante handred defren kaen skul tede. Oli tijim ol defren bilif we oli no laenapgud. Samfala oli talem se olgeta skul oli gud, mo i oraet blong bilif long enikaen rod nomo. ?Wanem tingting blong yu? [Wet long ansa.] Jisas i tijim ol man blong folem trufala skul nomo, mo i soem se God i no save agri long ol narafala fasin blong wosip. [Ridim Matyu 7:21-23.] Sipos yumi wantem mekem God i glad, yumi mas wosip long hem stret olsem hem i wantem.” Openem Save buk i go long japta 5, ridim nem blong japta, mo soem sam smol stampa tok long japta ya. Eksplenem se ol save ya bambae i givhan long man blong lanem olsem wanem blong mekem God i glad. Askem man blong haos blong karem buk.
5 Ol man we tingting blong olgeta i fasfas from we i gat plante tumas skul, maet oli glad blong kasem ansa long kwestin ya taem yu gobak:
◼ “I gat plante defren kaen skul tede, taswe ?olsem wanem yumi save weswan i trufala skul? ?Yu yu ting se wanem fasin nao i makemaot trufala skul? [Wet long ansa.] Jisas i talem long yumi olsem wanem blong makemaot ol trufala man blong hem.” Ridim Jon 13:35. Tokbaot haf 18 mo 19 long japta 5 blong buk ya Save. Soem long hem se taem yumi yusum ol vas blong Baebol mo skelem ol skul wetem ol rul blong Baebol, yumi save luksave trufala skul. Talem se ol man oli save ol Wetnes blong Jeova long fulwol, from we oli gat trufala lav mo oli folem ol stret rul long laef blong olgeta. Talem se sipos oli yusum Save buk blong mekem wan stadi long Baebol, bambae oli luksave klia wanem skul we God i glad long hem.
6 Sipos yu mitim wan papa no mama, maet i gud blong yusum toktok olsem:
◼ “Evri dei, yumi harem ol ripot long saed blong stronghed fasin blong ol yangfala, we i luk olsem se oli no folem enikaen rul long laef blong olgeta. Sam papa mo mama oli talem se i fol blong ol skul, from we oli no tijimgud ol pikinini long samting we i stret mo samting we i no stret. ?Yu ting se hu nao i mas trenem ol pikinini? [Wet long ansa.] Lesin long ansa we Baebol i givim. [Ridim Efesas 6:4.] Vas ya i talem se ol papa mama nao oli mas tijim ol pikinini blong olgeta long ol stret fasin.” Openem buk ya Save i go long pej 145, ridim haf 16, mo tokbaot ol pija long pej 147. Eksplenem se buk ya i blong ful famle i stadi long hem. Yusum haf 17 mo 18 long pej 146, mo talem se yu glad blong soem olsem wanem yumi stap mekem stadi wetem ol famle.
7 Sipos yu statem wan stadi long fastaem we yu bin storeyan wetem wan papa mama we i wari long ol pikinini blong hem, taem yu gobak, maet yu gohed moa. Yu save talem samting olsemia:
◼ “Wol blong yumi tede i stap pulum ol yangfala blong mekem plante nogud fasin. Samting ya i mekem se i hadwok long olgeta blong fraet long God taem oli stap gruap. Maet yu rimemba se, lastaem yumitu bin makem tu impoten poen. Yumi ol papa mama we yumi wantem obei long God, yumi mas givim gudfala eksampel long ol pikinini blong yumi. Mo tu, yumi mas soemaot lav long olgeta oltaem. I gat wan narafala samting we Baebol i talem se ol papa mama oli mas givim long ol pikinini blong olgeta.” Ridim Proveb 1:8. Openem buk ya Save long pej 148 mo gohed blong stadi long haf 19 kasem 23. Talem se yu glad blong kambak bakegen blong stadi wetem ful famle, stat long japta 1.