Mekemrere Prapa Toktok Blong Yu Blong Seremaot Ol Magasin
1 Yumi gat bigfala tangkyu long ol Wajtaoa mo Wekap! from we oli tokbaot ol samting we i stret long taem blong yumi, mo oli givim plante save long yumi, stat long ol impoten samting we oli stap hapen long wol go kasem “ol tingting blong God we man i no save faenemaot.” (1 Kor. 2:10) Yumi evriwan i save tingbaot plante nyufala poen we oli givim paoa long yumi taem yumi ridim. Jeova i stap yusum ol magasin ya blong mekem trutok i kam moa klia sloslou. (Prov. 4:18) Yumi mas wantem blong seremaot olgeta long evri man we yumi mitim.
2 Tingbaot Teritori Blong Yu: ?Wanem kaen man oli stap long ples blong yu? Sipos oli stap hareap oltaem, maet yu mas mekemrere wan storeyan we i sot mo i talemaot mesej blong yumi kwiktaem nomo. Sipos ol man oli no hareap tumas, maet yu save toktok moa wetem olgeta. Sipos bighaf blong olgeta oli wok evri dei, maet i moagud we yu go luk olgeta long aftenun no long sapa. Maet yu save mitim samfala long dei, sipos yu prij long rod no long ol stoa. Wok blong sam pablisa i karem gudfala frut, taem oli tekem jans blong toktok wetem ol man long ples blong putum ol trak mo long ol ples blong spel.
3 Ridimgud Ol Magasin: Ridim evri magasin taem yu kasem. Makem sam haf we yu ting se ol man long teritori blong yu oli save intres long olgeta. ?Wanem ol samting we oli wari from? Lukaot wan stret poen insaed long haf we jusum blong soem long olgeta. Tingbaot wan kwestin we yu save stanemap blong pulum intres blong olgeta. Jusum wan vas we i stret long poen ya, blong ridim long man blong haos sipos yu gat jans. Tingbaot olsem wanem yu save askem hem blong karem sabskripsen, mo stanemap wan poen blong tokbaot taem yu kambak bakegen.
4 Mekemrere Fastok Blong Yu: Jusumgud ol fastok blong yu, blong talemaot se yu yu hu, mo blong statem wan storeyan. Samfala oli faenem se i gud blong talem olsem: “Mi bin ridim wan gudfala haf long magasin ya, mo mi wantem serem wetem ol narafala.” Plante oli stat wetem wan kwestin we i joen wetem poen we oli wantem tokbaot. Olsem:
5 Sipos yu wantem tokbaot wan haf long saed blong fasin blong kilim man we i stap kam antap, yu save askem se:
◼ “?Yumi nidim wanem samting, blong mekem se yumi save slipgud long naet we yumi no fraet se wan man bambae i kam stilim olting blong yumi no i kilim yumi?” Nao talem se yu gat sam save i stap wetem yu, long saed blong rod blong winim problem ya. Olgeta narafala problem bitwin ol man tu, bambae oli finis. Tokbaot wan poen long magasin we i givim wan hop olsem. Taem yu gobak, yu save pulum man blong haos blong lukluk japta 1 blong Save buk.
6 Taem yu soemaot wan haf long saed blong famle laef, maet yu talem se:
◼ “Bighaf blong ol papa mama oli faenem se i hadwok tumas blong lukaot mo trenem ol pikinini naoia. Ol man blong hae save oli raetem plante buk long saed ya, be olgeta tu oli no agri fulwan. ?Yu ting se i gat wan man we i save lidim yumi long bisnes ya, mo we yumi save trastem hem?” Talem wan stret poen long magasin we i soem waes advaes blong Baebol. Taem yu gobak bakegen, tokbaot ol tingting blong Baebol long saed blong fasin blong trenem pikinini. Oli stap long Save buk, pej 145 kasem 148.
7 Taem yu tokbaot wan haf blong magasin long saed blong wan problem we i kasem ol man tede, yu save talem se:
◼ “Plante man oli harem nogud from ol hadtaem we oli kasem long laef tede. ?Yu ting se God i wantem we laef blong yumi i olsemia?” Poen i go long wan haf we i tokbaot olsem wanem blong stanap strong tru long ol problem tede, no we i givim risen blong lukluk i go long fyuja we bambae i fri long wari. Long nekis visit, tokbaot pija mo tok aninit long hem, we i stap long pej 4 mo 5 blong Save buk, nao statem wan Baebol stadi wetem olgeta.
8 Jenisim Storeyan Blong Mekem i Stret Long Ol Man: Bambae yu mitim plante man we oli intres long ol defren samting mo oli kamaot long ol defren kaen laef. Mekemrere wan rod blong storeyan we yu save jenisim smol, blong mekem i stret long ol defren kaen man. Tingbaot olsem wanem yu save jenisim storeyan ya blong mekem i stret long wan man, wan woman, wan olfala, no wan yangfala. I no gat ol strong rul long saed blong samting we yu mas talem. Talem samting we yu faenem i isi long yu, mo we yu bin kasem frut from. Be, tok wetem laef, talem ol tok we i kamaot long hat, mo lesingud. Olgeta we ‘oli stret blong kasem laef,’ bambae oli luksave se tok blong yu i kamaot long hat, mo bambae oli lesin.—Wok 13:48.
9 Yumi Givgivhan Long Yumi: Sipos yumi talem ol tingting blong yumi long narafala brata no sista mo hem i talem ol tingting blong hem long yumi, yumitufala i lanem ol nyufala fasin blong toktok. Taem yumi kam wanples wetem sam brata mo sista blong lanem ol rod blong storeyan, samting ya i mekem se yumi toktok moagud mo yumi no moa fraet. (Prov. 27:17) Sipos yu talem bakegen mo bakegen, bambae yu save toktok isi taem yu go long haos blong ol man. I impoten tumas we ol papa mama oli tekem taem blong halpem ol pikinini blong olgeta blong mekemrere wan storeyan. Mo tu, oli mas lesin long olgeta taem oli stap lanem toktok blong olgeta, mo oli mas talem sam advaes blong halpem olgeta blong kamgud moa. I save givhan long ol nyufala pablisa sipos oli wok wetem ol pablisa we oli stap prij longtaem finis.
10 I no nid blong kam olsem wan hadwok long yu, blong mekemrere prapa toktok blong yu blong seremaot ol magasin. Yu nidim nomo blong gat wan gudfala poen long tingting blong yu blong tokbaot, mo blong tokbaot long fasin we i pulum man blong lesin. Sipos yu tingtinggud fastaem mo traehad blong faenem ol nyufala rod, yu save mekemrere wan gudfala storeyan we bambae i pulum ol man blong lesin.
11 Wan bigfala fasin blong talemaot mesej blong Kingdom long olgeta ples blong wol, hemia tru long ol magasin. Sipos yu save givimaot ol Wajtaoa mo Wekap! long ol man we hat blong olgeta i gud, mo sipos yu save kasem sam sabskripsen tu, i olsem we ol magasin nao oli stap toktok. Yumi neva mas fogetem se oli impoten tumas, mo se mesej blong olgeta i save sevem laef blong man. Sipos yu ‘mekem ol gudfala fasin mo givhan long ol narafala,’ samting ya i save mekem Jeova i glad tumas.—Hib. 13:16.