?Olsem Wanem Blong Rerem Wan Fastok Blong Seremaot Magasin?

1. ?From wanem i moagud we yumi rerem wan fastok blong seremaot magasin, i bitim we yumi lanem baehat ol fastok we oli stap long Kingdom Wok Blong Yumi?

¹ Maet yu stap askem se: ‘?Ol fastok blong seremaot magasin i stap long evri Kingdom Wok Blong Yumi, taswe from wanem yumi mas rerem wan fastok bakegen?’ Plante pablisa oli luk se ol fastok ya oli givhan long olgeta. Nating se i olsem, i nidim yet blong oli rerem wan prapa fastok blong olgeta. Maet fastok we i wokgud long wan ples, i no save wokgud long narafala teritori. Taswe, yumi no mas harem se yumi mas talem ol toktok stret olsem i stap long Kingdom Wok Blong Yumi. Sipos yumi wantem yusum wan long ol fastok ya, i moagud we yumi talem folem ol prapa tok blong yumi.

2. ?Olsem wanem blong jusum haf we bambae yu tokbaot?

² Jusum Wan Haf: Fastaem yu mas ridim magasin. Nao jusum wan haf we i stret long ples blong yu mo we i pulum intres blong yu. Sipos yu tokbaot haf ya long man blong haos mo yu toktok wetem bilif mo glad, hemia i save pulum man ya blong hem tu i wantem ridim. Ating bambae yu tokbaot wan haf we plante man long ples blong yu oli intres long hem. Be i gud blong save ol narafala haf blong magasin ya tu. Hemia bambae i givim janis long yu blong jenisim fastok blong yu sipos yu mitim wan man we i intres long wan narafala haf.

3. ?Wanem ol faswan tok we yu save yusum blong kasem gudfala frut?

³ Askem Wan Kwestin: Afta, rerem gud ol faswan tok we bambae yu talem. Ol faswan tok oli impoten. Maet i gud blong askem wan kwestin blong mekem man i tingting, mo blong pulum intres blong hem i go long haf we yu wantem tokbaot. Plante taem yumi kasem gudfala frut taem yumi askem tingting blong man long saed blong wan poen. Yu no mas askem ol kwestin we oli save mekem man i sem no i rao.

4. ?From wanem i gud blong ridim wan vas long man?

⁴ Ridim Wan Vas: Biaen, jusum wan vas we yu save ridim sipos man blong haos i gat taem. Ating yu save jusum wan vas we i stap insaed long haf we yu yusum long magasin. Sipos yu ridim wan vas, man blong haos bambae i luk se tok blong yu i kamaot long Baebol. (1 Tes. 2:13) Nating sipos man ya i no wantem karem magasin, be vas ya we yu ridim i givim witnes long hem finis. Samfala oli ridim vas blong pulum intres blong man, nao biaen oli askem wan kwestin long saed blong vas ya. Maet bifo we yu ridim vas, yu save talem se: “Mi wantem save tingting blong yu long saed blong tok we i stap long vas ya blong Baebol.” Biaen, bifo we yu givim magasin long man, yu save pulum tingting blong hem i go long wan poen long magasin we i laenap wetem vas ya, mo talem sam sot toktok blong pulum hem blong wantem save moa.

5. ?Wanem ol stamba samting we yu mas tingbaot taem yu rerem wan fastok blong seremaot ol magasin?

⁵ I no gat ol rul long saed blong ol stret tok we yumi mas talem taem yumi seremaot ol magasin. Plante taem, i moagud blong mekem toktok blong yu i sot mo i isi. Yusum wan fastok we i isi long yu mo i karem gudfala frut. Pulum tingting blong man i go long ol nambawan save long ol magasin, mo soem se yu glad long olgeta. Sipos yu yu rere gud, bambae yu seremaot plante moa Wajtaoa mo Wekap! long ol man “we oli stret blong kasem laef blong olwe.”—Wok 13:48, NW.