?Yu Yu Stap Mekem Gud Mo Finisim Gud Minista Wok Blong Yu?
1 Buk blong Ol Wok i tokbaot ol disaepol blong Jisas se, blong mekem gud minista wok blong olgeta, oli “talem bakegen” mo “talemgud” olgeta tok blong God long ol man. (Wok 2:40; 8:25; 28:23) Hemia nao samting we aposol Pol i wantem mekem. (Wok 20:24) ?Yu tu we yu man blong talemaot gud nius, yu yu wantem mekem samting ya? ?Olsem wanem yu save mekem?
2 Reregud Storian Blong Yu: Blong givim wan gudfala witnes, i impoten blong reregud fastaem. Hemia i tru tumas taem yumi stap seremaot ol magasin, from we ol wanwan magasin oli gat ol defdefren save insaed. Blong givhan moa long yumi, Kingdom Wok Blong Yumi long manis ya i gat wan niufala haf long hem. Long lefsaed blong pej, i gat wan lis blong ol rod blong seremaot ol laswan Wajtaoa mo Wekap! Bambae haf ya i tokbaot wan poen long evri magasin we i save pulum tingting blong ol man. ?Olsem wanem yu save yusum ol sot fastok ya?
3 Jusum wan long ol fastok ya we yu ting se bambae i gud long ples blong yu. Nao ridimgud haf blong magasin we fastok ya i talem, mo makem sam poen insaed long hem we i save pulum intres blong man. Lukaot wan vas we oli raetem fulwan long magasin, mo we i laenap wetem poen we yu yu jusum. Traem ridimaot tok blong vas ya long man blong haos. Joenem smol tok i go blong pulum man blong haos blong ridim magasin ya, mo blong mekem hem i tingbaot se i save givim smol presen mane blong givhan long wok blong ol Witnes blong Jeova long fulwol, sipos hem i wantem. Naoia, yu save lanem fastok ya.
4 Mekem Plan Blong Yusum Baebol: Sipos yu reregud, plante taem yu save ridimaot wan vas stret long Baebol. Long plante ples, ol pablisa we oli bin prij longtaem finis, oli luk se i gat gudfala frut i kamaot taem oli karem Baebol long han blong olgeta nomo. Ale, oli talem halo long man blong haos, nao oli gohed olsem:
◼ “Mifala i stap askem long ol man sipos oli bilivim tok ya . . .” Ridim Jenesis 1:1, nao askem se: “?Yu yu agri long tok ya?” Sipos man blong haos i talem ‘yes’ yu save gohed se: “Mi tu mi bilivim. ?Be, sipos God i wokem olgeta samting, yu ting se hem i stamba blong ol rabis fasin tu?” Wet long man blong ansa, mo talem smol tok blong soem se yu bin lesin long ansa blong hem. Nao ridim Prija 7:29. Openem Save buk i go long pej 71, mo ridim haf 2. Leftemap tingting blong man blong haos blong ridim buk ya. Sipos hem i no agri long tok blong Jenesis 1:1, traem pulum hem blong ridim buk ya Creation.
5 Gobak Long Ol Man We Oli Intres: Blong mekem gud minista wok blong yu, yu mas gobak long ol man we oli intres. Sipos yu storian gud wetem wan man, raetemdaon nem mo adres blong hem, nating se hem i karem buk no magasin, no nogat. Gobak kwik blong traem mekem intres blong hem i gru moa. Mo yu no mas foget blong askem hem blong stadi Baebol.
6 Ol disaepol long faswan handred yia oli save se Jisas i putum tok long olgeta blong “givim wan gudfala witnes long ol man.” (Wok 10:42, NW ) Tok ya i stap long yumi yet tede, hemia nomo rod blong pulum ol man oli kam man blong Jisas. (Mat. 28:19, 20) Yumi mas traehad fulwan blong mekem gud mo finisim gud minista wok blong yumi.—2 Tim. 4:5.