Seremaot Ol Magasin We Oli Talemaot Trutok
1. ?Wanem wok blong ol Wajtaoa mo Wekap!?
1 Tufala magasin ya Wajtaoa i Talemaot Kingdom Blong Jeova mo Wekap!, tufala i givhan bigwan long wok blong talemaot gud nius blong Kingdom mo pulum ol man oli kam disaepol. (Mat. 24:14; 28:19, 20) Taem yumi joen long ol defren haf blong wok blong prij, yumi glad blong serem ol magasin ya oltaem wetem narafala.
2. ?Long ol yia we oli pas, i gat wanem jenis long ol Wajtaoa mo Wekap! magasin, mo from wanem i gat ol jenis ya?
2 Long ol yia we oli pas, i gat sam jenis long saes blong ol magasin ya mo samting we oli tokbaot. Mo i gat jenis tu long rod we yumi yusum blong seremaot ol magasin ya. Yumi mekem ol jenis ya from we yumi wantem we moa man i intres long ol magasin, mo yumi wantem we ol magasin ya oli wokgud blong mekem mesej blong Kingdom i kasem hat blong enikaen man. Long rod ya nao, bambae God i save “sevem olgeta” mo “olgeta man bambae oli save trutok blong hem.”—1 Tim. 2:4.
3. ?Olsem wanem blong seremaot ol magasin long wok blong prij?
3 Long Jenuware 2006, yumi stat blong kasem ol Wekap! wan taem evri manis long Franis mo Inglis. Long sem manis, ol Wajtaoa long Bislama oli stat blong kamaot wantaem long manis nomo, mo yumi lan finis blong yusum ol defren fastok blong seremaot olgeta. Naoia, long sem fasin, long tufala Wajtaoa we yumi kasem evri manis long ol bigfala lanwis olsem Franis mo Inglis, bambae i gat wan nomo we yumi serem long ol man. Magasin blong yumi long Bislama, bambae yumi gohed blong givimaot long olgeta man, nating we olgeta stadi blong manis oli stap insaed long hem. Long laswan pej blong Kingdom Wok Blong Yumi, i gat sam fastok blong ol wanwan magasin. Plante taem ol fastok ya oli laenap wetem ol faswan haf blong magasin, be samtaem oli laenap wetem wan narafala haf blong magasin we i tokbaot wan samting we plante man oli intres long hem. Ol fastok ya long Kingdom Wok Blong Yumi oli wokgud taem yumi savegud haf blong magasin we i laenap wetem ol fastok ya, mo taem yumi jenisim fastok i kam long prapa toktok blong yumi blong mekem se i stret long teritori we yumi stap long hem.
4. ?Nating se i gat ol fastok long Kingdom Wok Blong Yumi, from wanem maet i gud blong yusum wan narafala fastok?
4 Long Kingdom Wok Blong Yumi, i gat tu fastok blong wanwan magasin. Ol fastok ya oli eksampol long wanem we yumi save talem long wok blong prij. Be i oraet sipos yu yu wantem talem wan narafala fastok we yu nomo yu jusum. Maet yu mekem olsem from we yu harem se long ples blong yu ol man bambae oli intres moa long wan narafala haf blong magasin. No maet yu harem se fastok blong yu bambae i moa gud sipos yu yusum wan haf blong magasin we yu yu intres moa long hem.
5. ?Bifo we yu rerem wan fastok blong wan magasin, yu mas mekem wanem?
5 ?Olsem Wanem Blong Rerem Fastok Blong Yu?: Faswan samting hemia se yu mas save gud haf blong magasin we yu plan blong yusum long wok blong prij. Maet yu no naf blong savegud evri haf blong magasin bifo we yu stat blong serem hem long wok blong prij. Be yu mas toktok wetem glad mo soemaot se yu laekem tumas haf blong magasin we yu jusum blong tokbaot. Blong mekem samting ya, yu mas savegud wanem we haf ya i talem.
6. ?Olsem wanem blong rerem ol fastok blong yumi?
6 Nekiswan samting, hemia blong rerem ol faswan tok blong yu long wan fasin we yu save jenisim olgeta folem ol defren man we yu mitim. Maet blong statem storian blong yu, yu save askem wan kwestin we i pulum intres blong man mo we i laenap stret wetem haf we yu wantem tokbaot long magasin. Dipen oltaem long Tok blong God we i gat paoa blong kasem hat blong man. (Hib. 4:12) Jusum wan vas we i stret long samting we yu wantem tokbaot. I gud sipos yu jusum wan vas we i stap long haf blong magasin we bambae yu tokbaot. Tingbaot olsem wanem yu save joenem vas wetem haf blong magasin.
7. ?Olsem wanem yumi save mekem ol fastok blong yumi i kam gud moa?
7 Tekem Evri Janis: Sipos yu wantem se fastok blong yu i rili wokgud, yu mas yusum fastok ya. Joen wetem kongregesen long wok blong seremaot magasin long Sarede. Yu save serem magasin long ol man we maet yu save se bifo oli bin glad blong tekem mo ridim sam narafala buk blong yumi. Sipos yu gat ol Baebol stadi, i gud yu tingbaot oltaem blong givim magasin long olgeta. Mo taem yu mekem visit long wan man, i gud yu serem magasin wetem ol narafala man we oli stap taem yu gobak blong luk man ya. Maet yu save givim sam magasin long ol man we yu mitim taem yu go long stoa, taem yu wokbaot i go long narafala ples, no taem yu stap wet blong luk dokta. Taem yu yusum ol fastok blong yu long wan ful manis, traehad blong mekem ol fastok ya oli kam gud moa.
8. ?From wanem ol Wajtaoa mo Wekap! oli no olsem ol narafala buk mo magasin?
8 Ol Wajtaoa mo Wekap! magasin oli no olsem ol narafala buk no magasin from we oli leftemap Jeova olsem Hae Rula blong heven mo wol. (Wok 4:24) Oli talemaot gud nius blong Kingdom we i mekem ol man oli haremgud bakegen, mo oli pulum ol man blong bilif long Jisas Kraes. (Mat. 24:14; Wok 10:43) Mo tu, oli soemaot olsem wanem ol samting we oli hapen long wol oli stap mekem ol profet tok blong Baebol oli kamtru. (Mat. 25:13) Yu save halpem ol man long teritori blong yu blong oli kasem plante gudfala samting from ol magasin ya, sipos yu rere gud blong serem ol magasin ya long evri janis we yu gat.
9. ?Olsem wanem yumi save mekem rod blong gobak blong storian wetem wan man?
9 Taem man i glad blong karem wan magasin, no hem i glad blong storian long Baebol, i gud we yumi rerem wan kwestin no wan sot toktok we i pulum hem blong tingting, mo olsemia yumi save mekem rod blong go visitim hem bakegen mo storian moa long Baebol. Sipos yumi wok strong blong planem ol sid blong trutok, yumi save sua se Jeova bambae i openem hat blong olgeta we oli rili wantem save hem mo mekem wok blong hem.—1 Kor. 3:6.