?Olsem Wanem Blong Yusum Ol Fastok Long Kingdom Wok?
1. ?Wanem tingting we yumi mas gat long ol fastok long Kingdom Wok Blong Yumi?
1 Ol fastok we oli soemaot olsem wanem blong seremaot ol magasin mo ol narafala buk blong yumi, oli kamaot oltaem long Kingdom Wok Blong Yumi. Taem yumi prij, i no nid blong yumi ripitim ol fastok ya stret olsem oli raetem. Ol fastok ya oli givhan long yumi nomo blong yumi save wanem blong tokbaot. Sipos yumi yusum prapa tok blong yumi, bambae samting we yumi stap talem i save gat moa paoa. Taem yumi toktok long prapa fasin blong yumi, hemia bambae i givhan long man blong haos, blong hem i no fraet, mo blong hem i luk we tok blong yumi i kamaot long hat blong yumi, mo se yumi rili bilif long samting we yumi stap talem.—2 Kor. 2:17; 1 Tes. 1:5.
2. ?From wanem yumi mas tingbaot kastom blong ol man ples taem yumi rerem ol fastok blong yumi?
2 Toktok Blong Yu i Mas Laenap Wetem Ol Man Ples: Taem yumi talemaot gud nius, yumi mas tingbaot kastom blong ol man ples blong yumi. ?Long ples blong yu, i stret we yu yu tekem smoltaem fastaem blong talem halo long man blong haos nao sloslo yu joenem i go long ol tok blong prij long hem, no oli wantem se yu talemaot kwiktaem samting we yu yu kam blong talem? Kastom blong ol ples oli defdefren mo fasin blong ol man wanwan i defdefren tu. Mo tu, yumi mas gat fasin luksave sipos yumi wantem askem kwestin. Kwestin we i oraet nomo blong askem long ol man long sam ples, i save mekem man i sem long narafala ples. Taswe, yumi mas skelem gud mo yumi mas mekem toktok blong yumi i laenap wetem fasin blong ol man long ples blong yumi.
3. ?From wanem i gud blong tingbaot famle we ol man oli gruap long hem mo tingting blong olgeta?
3 Antap long hemia, taem yumi stap mekem rere from wok blong prij, yumi mas tingbaot ol man long ples blong yumi se oli gruap long wanem kaen famle, mo wanem tingting blong olgeta. Olsem nao, sipos yu toktok long wan man we i strong long skul Katolik, ating yu save tokbaot Matiu 6:9, 10. Be yu no save tokbaot vas ya long wan man we i neva harem prea blong “Masta.” Sipos yumi tekem taem blong reregud, bambae yumi save toktok long ol man we yumi mitim long wok blong prij long fasin we i mekem olgeta oli glad blong lesin.—1 Kor. 9:20-23.
4. ?From wanem i impoten blong yumi reregud?
4 Nating sipos yumi plan blong yusum wan fastok we oli raetem i stap, be yumi mas reregud yet. Yumi mas ridim gud ol haf no japta we yumi wantem tokbaot, mo yumi mas lukaotem ol poen we oli save pulum intres blong man. Nao yumi save yusum olgeta taem yumi toktok long ol man. Blong toktok wetem glad long ol man long saed blong ol buk we yumi stap seremaot, yumi mas savegud ol nambawan save we oli stap insaed long ol buk ya.
5. ?From wanem maet yumi rerem wan narafala fastok, mo olsem wanem blong mekem olsem?
5 Sam Narafala Rod: ?Olsem wanem? ?Yumi mas yusum ol fastok ya nomo we oli raetem daon long Kingdom Wok? No gat. Sipos yumi harem se i moa isi blong folem wan narafala rod bakegen no yusum wan defren vas, yumi save mekem olsem. I gud sipos yumi tekem janis tu blong tokbaot ol haf blong magasin we oli stretgud long ples blong yumi. Long Miting Blong Kingdom Wok, taem oli mekem pleplei long ol fastok long Kingdom Wok, oli save mekem plan blong yusum wan narafala fastok we i wokgud long ples blong yumi. Long fasin ya, yumi evriwan i save kasem help blong talemaot gud nius long fasin we i karem frut.