!Sipos Wan Rod Blong Storeyan i Wokgud, Gohed Blong Yusum!
1 Oltaem, Kingdom Wok Blong Yumi i stap talem ol rod blong storeyan we yumi save yusum long wok blong prij. Hemia i givim ol nyufala tingting long yumi long saed blong fasin we yumi save yusum blong pulum ol man blong intres long mesej blong Kingdom. Maet yu stap traehad evri manis blong lanem wan no sam, nyufala rod blong storeyan. Be, maet sam pablisa oli faenem se oli jes lanem wan nyufala rod, ale Kingdom Wok Blong Yumi i talem sam narawan bakegen. I klia se, maet sam long yumi i no naf blong lanemgud olgeta rod blong storeyan we oli kamaot.
2 Be, i gat plante taosen paenia mo pablisa we oli spenem plante haoa long wok blong prij. Mo tu, plante kongregesen oli finisim olgeta teritori blong olgeta long sam wik nomo. From ol risen ya, sam pablisa oli laekem blong kasem ol nyufala tingting long saed blong ol fastok mo ol rod blong storeyan wetem ol man. Samting ya i givhan long olgeta blong kamgud moa long wok blong prij. Mo tu, i mekem se oli intres moa long wok blong prij, oli karem moa frut, mo oli naf blong winim ol tok we ol man oli talem blong traem blokem olgeta.
3 Nomata se i olsem wanem, sipos yu stap yusum wan rod blong storeyan we i wokgud mo i pulum intres blong ol man, !gohed blong yusum! Yu no nid blong jenisim wan gudfala rod blong storeyan sipos yu luk se hem i wokgud. Yu save jenisim sam tok blong hem nomo, blong mekem se i stret long buk we yumi seremaot evri manis. Taem yu ridim ol advaes we Kingdom Wok Blong Yumi i givim, traem faenem sam gudfala poen blong joenem long storeyan we yu stap yusum.
4 Taswe, taem yu kasem wan nyufala Kingdom Wok Blong Yumi, rimemba se ol rod blong storeyan we hem i talemaot oli advaes nomo. Sipos yu save yusum olgeta, hemia i gud. !Be, sipos yu ting se yu faenem finis wan rod blong storeyan we i stap karem gudfala frut long ples blong yufala, ale, gohed blong yusum! Samting we i impoten, hemia blong mekemgud mo ‘finisim olgeta wok we God i givim long yumi,’ mo faenem olgeta we oli stret blong kam disaepol mo we oli nidim help.—2 Tim. 4:5.