Soem Intres Long Ol Man—Taem Yumi Reregud
1 Taem yumi reregud long wok blong prij, hemia i givhan long yumi blong soem intres long ol narafala. ?Olsem wanem? Taem yumi reregud, yumi no stap wari tumas long tok we bambae yumi talem, nao yumi save intres moa long man we yumi stap toktok long hem. Mo tu, hemia i givhan long yumi blong no fraet mo yumi save talem ol tok we i kamaot long hat blong yumi. ?Be olsem wanem yumi save rerem toktok blong yumi?
2 Toktok We i Stret Long Wanwan Man: Jusum sam fastok long Kingdom Wok Blong Yumi blong Jenuware 2006 we oli stret long ples blong yufala, mo tingting gud olsem wanem yu save talem olgeta long prapa tok blong yu. Mekem tok blong yu i laenap wetem ol man long ples blong yu. Olsem nao, sipos plante taem yu faenem ol man we oli blong wan jos no oli blong wan laen, yu save tingbaot olsem wanem tok blong yu i save pulum intres blong olgeta. Taem yu mekem tok blong yu i laenap wetem ol wanwan man we yu stap toktok long olgeta, hemia i soemaot se yu intres long olgeta.—1 Kor. 9:22.
3 Taem yu stap yusum toktok we yu rerem, sloslo yu save jenisim lelebet blong mekem i kamgud moa. Ol faswan tok we yu talem oli impoten, taswe i gud blong makem fasin blong ol man taem yu talem ol tok ya. ?Oli intres long poen we yu talem? ?Oli ansa long kwestin blong yu? Sipos oli no ansa, jenisim tok blong yu gogo yu faenem wan rod we i wokgud.
4 Help Blong Tingbaot Tok Blong Yu: Plante oli faenem i had blong tingbaot tok blong olgeta taem oli stap long doa blong ol man. Sipos samting ya i hapen long yu, i gud yu mekem pleplei wetem wan narafala long haos, mo yu yusum tok we yu rerem. Hemia i save givhan long yu blong putum olgeta i stap klia long tingting blong yu mo talemaot olgeta long fasin we i klia mo stret. Samting ya i save givhan long yu tu blong ansa long ol defdefren toktok we ol man blong haos oli save talem long yu.
5 Wan narafala rod blong givhan long yu blong tingbaot tok blong yu, hemia se yu save raetem sam haf blong tok blong yu long wan smol pepa mo ridim kwiktaem bifo we yu go long doa. Samfala oli luk se ol smol pepa olsem i givhan long olgeta blong oli no fraet mo blong oli toktok gud wetem ol man. Long rod ya, fasin blong reregud i save givhan long yumi blong soem intres long ol narafala, mo i save mekem se toktok blong yumi long saed blong gud nius i kam moagud.