Glad Blong Gobak Blong Halpem Ol Man We Oli Intres
1 Evriwan we oli stap joen long wok blong prij long ol haos wanwan oli wantem halpem ol man we oli intres. Taem yumi givhan long olgeta olsem, yumi save glad mo haremgud from. (Ol Sam 126:5, 6.) Samting ya i nidim se yumi mas reregud.
2 Fasin blong rere i stat taem yumi raetemgud ol samting long pepa blong prij blong yumi. Makem poen we yu bin tokbaot taem yu mitim man blong haos fastaem mo tingting blong hem. Maet yu wantem raetemdaon olsem wanem blong statem storeyan blong yu taem yu gobak.
3 Eksampel, sipos yu tokbaot prea blong masta long faswan storeyan blong yu, mo yu livim buklet ya “Gavman,” maet yu save talem wan samting olsem:
◼ “Long lastaem we mi kam, yumi bin tokbaot olsem wanem wil God bambae i kamaot long wol mo bambae pis i kamaot long olgeta haf blong laef blong man. Insaed long buklet we mi bin livim wetem yu, plis yu save makem wanem i talem long pej 29 long saed long ol narafala blesing we Kingdom blong God bambae i givim long ol man.”
4 Sipos man ya i soem se hem i no bilif long God, talem wan samting olsem:
◼ “Taem mi kam lastaem, yumi bin tokbaot poen we Pol i mekem long Hibrus 3:4, we i givim pruf se i mas gat Wan we i gat save we i wokem olgeta samting.” Ridim vas ya bakegen mo lukluk long pej 4 kasem 9 blong buklet ya ?God i Rili Kea Long Yumi?, stat long ples we yu bin stop long hem long faswan storeyan blong yu. Askem kwestin mo afta ridim haf ya, letem taem blong man blong haos i ansa long kwestin ya. Sipos i save wok, askem hem blong karem buklet blong hem mo blong yutufala i save lukluk long hem.
5 Sipos yu luk se man blong haos i haremgud long laef, hem i gat plante samting no i gat, taem yu toktok wetem hem blong fastaem yu save yusum traket ya, ?Wol Ya Bambae i Lus No i Stap? mo ridim wanem oli talem long pej 6. Askem man blong haos sipos hem i wantem laef long wan naesfala paradaes long wol. Blong givhan long yu blong luksave intres blong hem, yu save askem hem blong talem tingting blong hem long saed wan pija no wan tok we i leftemap tingting we i stap insaed long magasin we yu yusum.
6 Yu save yusum sem fasin blong statem storeyan olsem long wan poen we maet yu bin yusum blong storeyan wetem hem long Wajtaoa no Wekap! Luk bakegen long poen we yu bin tokbaot long faswan storeyan blong yu mo biaen tokbaot wan narafala poen long sem haf no long wan narafala magasin we yu gat wetem yu. Sipos i oraet, ridim wan vas tugeta, mo askem man blong haos blong givim tingting blong hem long vas ya.
7 Yu save askem sabskripsen taem hem i soem se hem i intres. Oltaem, yu save mekem olsem long fastaem we yu toktok wetem man.
8 Tingbaot se mak blong yu i blong statem wan Baebol stadi. Plante taem yumi mas mekem tu no tri visit blong mekem intres i gru bifo yumi kasem mak ya blong statem Baebol stadi. Fasin blong gobak kwik taem i soem se yu intres long man blong haos.
9 Gud nyus ya we yumi stap talemaot i givim bigfala glad. (Luk 2:10) Taem yumi wok strong mo ol man we oli intres oli lesin, samting ya i mekem yumi glad. (Fil. 4:1) Sipos yumi gobak blong halpem ol man we oli intres we yumi faenem olgeta long wok blong prij, bambae yumi kasem glad from.