Joengud Long Minista Wok Blong Yumi We i Save Sevem Laef
1 Aposol Pol i skelemgud fasin blong hem blong talemaot gud nyus blong mekem se hem save “yusum olgeta rod evriwan blong sevem sam long olgeta.” (1 Kor. 9:19-23) Sem mak, bambae yumi karem moa frut long minista wok blong yumi sipos yumi wantem luksave wanem samting man blong haos i intres long hem mo yumi rere blong mekem storeyan blong yumi i laenap long ol nid blong hem. Samting ya i no strong tumas taem yumi seremaot Wajtaoa mo Wekap! no wan long ol buklet blong yumi.
2 Afta we yu talem halo, maet wetem prapa toktok blong yu yu save stat olsem:
◼ “Plante man oli harem nogud taem oli luk se ol gavman blong man oli no save givim wan ansa we i save finisim ol trabol long taem blong yumi. Samfala oli talem se ol gavman oli stampa blong ol trabol blong olgeta. ?Yu ting se i gat wan gavman we i naf blong lukaotgud long ol trabol blong yumi? [Wet long ansa.] ?Yu save se yumi gat wan gudfala promes long wan gavman we bambae i finisim ol trabol we yumi stap kasem?” Lesingud long ansa blong man blong haos. I dipen long wanem hem i talem, yu mas rere blong jenisim storeyan blong yu i go long wan long defren fastok.
3 Sipos long toktok blong man blong haos yu harem hem i stap talem se hem i wan kristin, yumi save askem long hem sipos hem i stap yusum “prea blong masta.” Sipos hem i ansa yes, yumi save talem bakegen prea ya go kasem ples we i talem se, “mo we yu yu kam king blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.” (Mat. 6:9, 10) Samting ya i soem se wan dei bambae Jeova i mas mekem ol samting we hem i wantem oli kamaot long wol ya. Yu save soem sam haf long Wajtaoa no Wekap! no long wan buklet we i tokbaot poen ya, olsem pej 3 blong buklet ya, Gavman Ya We Bambae i Mekem Paradaes.
4 Sipos fasin blong man blong haos i soem se hem i no bilif long God, yu save tokbaot Hibrus 3:4 mo openem i go long pej 4 blong buklet ya ?God i Rili Kea Long Yumi? Ridim haf 1 mo 2 mo askem kwestin we i stap daon long pej. No yu save yusum wan poen we i stap long wan nyufala magasin we i jes kamaot.
5 Sipos man blong haos i haremgud long ol samting long laef blong hem, yu save askem kwestin se:
◼ “?From wanem i impoten blong yumi tingtinggud long wanem Baebol i talem long saed long fyuja blong gavman?” Nao yumi save yusum poen long Reasoning buk pej 154 mo 155, tokbaot kwik taem nomo wan no moa long ol eit risen we oli stap long ples ya. Sipos man blong haos i soem intres, yusum traket ya ?Wol Ya Bambae i Lus No i Stap?, stat wetem haf wan long pej 2, blong mekem storeyan i gohed moa.
6 Faswan storeyan blong yu i no save karem frut sipos yu no pulum man ya blong wantem moa kakae blong speret long nekis visit blong yu. Taswe nao, yu mas rere blong askem wan gud kwestin mo promes long hem se bambae yu ansa long hem taem yu gobak nekis taem.
7 Folem haf we i stap antap, jusum wan we yu ting se i gud blong yu talem. Traem mekem se ol tingting ya oli stret long teritori blong yu. Traem savegud ol buklet, traket, mo ol haf blong magasin we bambae yu yusum blong mekem se yu save jenisim kwik taem nomo storeyan blong yu blong i stret long ol nid blong man blong haos. I gud blong yumi traehad blong reregud long ol toktok blong yumi blong “mekem olgeta samting ya from gud nyus” mo joengud long minista wok ya we i save sevem laef.—1 Kor. 9:23.