!Yumi Mas Go “Stret Long Poen”!
1 Yu yu mitim wan man finis long wok blong prij, we i blokem tok we yu yu bin reregud blong talem, mo i se: “?Be, wanem samting stret, we yu yu kam from?” ?Yumi save lanem wanem taem samting ya i hapen long yumi?
2 Plante man tede oli no gat longfala tingting. Oli wantem save se yumi hu mo from wanem yumi kam luk olgeta. Taem oli faenemaot se yumi visitim olgeta blong tokbaot Baebol, maet oli no wantem lesin. Fasin blong ridim Baebol mo tokbaot ol samting long saed blong spirit oli no impoten tumas long laef blong plante man. ?Be olsem wanem yumi save givhan long ol man blong luksave se oli nidim blong spenem smol taem blong tokbaot wan poen long Baebol wetem yumi?
3 Wanem i Wokgud Moa: Mak we yumi wantem kasem, hemia blong soem long man blong haos, wetem wan storeyan we i sot nomo, olsem wanem Baebol i save givhan long hem blong winim ol wari mo problem blong hem. Tok blong yumi i save wokgud moa sipos yumi yusum wan kwestin we i pulum tingting blong man, mo biaen, yusum wan vas blong Baebol blong ansarem kwestin ya. Maet bambae yu save traem sam long ol fastok we oli stap long ples ya. Ol fastok ya oli blong givhan long yumi blong talem kwiktaem “from wanem” yumi kam mo long semtaem pulum intres blong man.
4 Long teritori we plante man oli stap talem se oli no intres, askem wan kwestin we i laenap stret long man.
◼ “Naoia we yumi stap kam klosap moa long yia 2000, ?yu ting se i gat wan hop blong ol man no yu ting se man i no gat fiuja? [Wet long ansa.] Baebol i talemaot ol trabol we oli stap kasem man tede, mo hem i talem tu, wanem bambae i hapen biaen.” Ridim 2 Timoti 3:1, 2, 5 mo Ol Proveb 2:21, 22.
◼ “Plante man long ples blong yumi oli wari from helt blong olgeta. ?Yu save se God i promes blong winim olgeta problem long saed blong helt mo finisim olgeta blong olwe?” Ridim Revelesen 21:3, 4.
◼ “Sipos evri man long eria blong yumi oli traehad blong folem ol rul blong Baebol long laef blong olgeta, ?yu ting se laef blong yumi bambae i save kam moagud?” Ridim Matiu 22:37-39.
5 From we wok blong yumi i blong talemaot gud nius blong Kingdom, taem yumi gat jans yumi mas pulum tingting blong ol man i go long wanem we Kingdom bambae i mekem. Maet yu talem se:
◼ “Yu yu save se buk ya, Baebol, we i olfala moa i bitim ol narafala buk long wol, i talemaot se bambae i gat wan gavman nomo we i rulum ful wol?” Ridim Daniel 2:44.
◼ “?Yu ting se sipos Jisas Kraes i rulum wol ya, bambae laef i olsem wanem?” ridim Ol Sam 72:7, 8.
6 Long ol teritori we ol man oli intres long skul, maet yu save traem wan long ol fastok ya:
◼ “Plante man oli harem nogud from fasin seraot we i stap bitwin ol man mo woman, ol defren kaen skul, no kala blong skin. ?Yu ting se God i harem olsem wanem long fasin ya?” Ridim Ol Wok 10:34, 35.
◼ “Yumi save se Jisas Kraes i bin mekem plante merikel taem hem i stap long wol. Sipos yu yu save askem hem blong mekem wan moa merikel, ?bambae yu askem wanem?” Ridim Ol Sam 72:12-14, 16.
7 Sipos i luk olsem se man blong haos i no wantem storeyan, maet yu save statem toktok blong yu olsem:
◼ “Plante man tede oli les blong harem ol nius long saed blong ol problem. Oli wantem save olsem wanem blong winim ol problem ya. Ating yu tu yu harem olsem. [Letem man i ansa.] ?Be long weples nao, yumi save faenem ol stret ansa long ol problem blong yumi?” Ridim 2 Timoti 3:16, 17.
8 ?From Wanem Yu No Traem Samting Ya? Plante taem wan kwestin we i sot mo i klia, i naf blong pulum intres blong man. Wan woman we fastaem i agens, i askem tu sista blong kam insaed long haos blong hem afta we wan long tufala sista ya i askem kwestin ya se: “?Yu save wanem ya Kingdom we yumi prea from long Prea blong Masta?” Woman ya i intres long kwestin ya, mo hem i glad blong stadi Baebol. !Naoia hem i givim laef blong hem finis i go long Jeova!
9 Taem yumi storeyan wetem man blong haos, ol tok blong yumi oli mas kamaot long hat blong yumi. Ol man bambae oli glad moa blong lesin sipos oli luksave se yumi rili intres long olgeta.—Ol Wok 2:46, 47.
10 Wok blong talemaot gud nius tede, i save stap olsem wan traem blong yumi. Sam man oli no trastem ol strenja. Sam narafala oli bisi tumas long laef blong olgeta. Nating se i olsem, yumi save sua se i gat plante man i stap yet we oli nidim trutok. (Mat. 10:11) !Maet hadwok blong yumi blong faenem olgeta i save karem moa frut sipos ol toktok blong yumi oli sot mo yumi “go stret long poen!”