Yusumgud Ol Impoten Tul
1 Taem yu stap prij long ol haos wanwan, mak we yu mas kasem i blong pulum ol wanwan man blong haos blong storeyan taem yu mas traem blong yusum Baebol mo narafala impoten tul blong toktokgud wetem ol wanwan man blong haos. (Skelem wetem 2 Korin 6:1; 2 Timote 2:15.) ?Wanem samting nao ol man long teritori blong yufala oli tingting tumas long hem tede? ?Oli wari long saed long ekonomik mo fasin blong famle we i stap godaon? Sam long ol fastok olsem i save lidim yumi long wan gud storeyan long Baebol.
2 Yu save talem se:
◼ “Long ol taem olsem we laef i strong tumas, plante man oli faenem i had blong winim ol trabol long laef. ?Yu ting se gavman blong man i save winim ol trabol long saed long mane long wan rod we i stret long evriwan? [Lesin long ansa.] Mi mi faenem se samting ya i leftemap tingting blong yumi . . . ”
3 Nao yu save ridim Ol Sam 72:12-14 mo blong mekem storeyan i gohed yu save jusum wan long ol vas we i stap long pej 154-155 blong Reasoning buk. No afta we yu ridim wan vas blong Baebol, yu save tokbaot wan haf long traket ya Laef Long Pis Long Nyufala Wol. Plante pablisa wetem ol yangfala tu, oli nafgud blong statem Baebol stadi long wan long ol traket ya taem oli ridim wan haf long hem mo askem long man blong haos blong talem tingting blong hem long haf we oli ridim.
4 Long sam ples yu save yusum wan tok olsem:
◼ “Plante man oli wantem luk se famle i gobak long gudfala fasin blong laef blong hem bifo. ?Yu ting se i stap long wanwan man blong jusum wanem kaen fasin oli mas gat, no i moagud sipos i mas gat wan fasin blong laef nomo long evriwan? [Letem ansa.] Plante man oli agri se sipos oli folem ol waes advaes blong Baebol, fasin blong laef blong famle bambae i kamgud moa.”
5 Long taem olsem maet yu save tokbaot tok blong aposol long Kolosi 3:12-14 no traehad blong statem wan Baebol stadi long fastaem we yu toktok wetem man taem yu yusum ol poen aninit long stampa tok ya “?Wanem Rod Blong Win?” long traket ya Mekem Laef Blong Famle i Glad.
6 Yu mas glad taem yu stap soemaot buklet long hem, soem se ol buklet we Sosaeti i mekem we yumi stap seremaot long manis ya oli impoten. Sipos yu sua long intres blong man, yu mas waes blong yusumgud ol narafala impoten tul taem yu tokbaot wan stret poen long traket, magasin, no wan buklet.
7 Sipos yu naf blong statem wan Baebol stadi long fastaem we yu toktok wetem man, mekem ol stret plan blong gohed long storeyan long wan stret dei mo taem. Yu save putum faondesen blong nekis visit blong yu sipos yu talem long man blong haos se taem bambae yu kambak yu wantem givim ansa long sam kwestin we ol man oli askem oltaem olsem: ?From wanem God i letem fasin nogud i stap? Haf we i stap daon bambae i tokbaot moa olsem wanem blong tokbaot samting ya long visit bakegen.