Akseptem Ol Responsabiliti Blong Mekem Ol Visit
1 I gat sam risen blong pusum yumi blong mekem moa visit. Yumi wantem finisim gud wok ya we God i givim long yumi, olsem Pol i mekem. (Ol Wok 20:21, 24) Sipos yumi mekem gud ol visit long ol man we oli intres, bambae tingting blong yumi i no jajem yumi taem yumi stap traehad blong finisim minista wok blong yumi fulwan.—2 Tim. 4:5.
2 Save i Mekem Se Yumi Wok: Yumi save se laef blong ol man i stap long trabol. Samting ya i pusum yumi blong traehad blong mekem ol visit. (Jon 17:3) Save we yumi gat long saed blong jajmen blong Jeova mo Amageden se i kolosap oli mas pusum yumi blong givim woning long ol nogud man. Be antap long samting ya, yumi givhan tu long ol man we ‘oli stap harem nogud mo oli stap krae from ol nogud samting we i stap kamaot long wol.’ (Esik. 9:4) Yumi mas tekem olgeta oli kam joen long ogenaesesen blong Jeova long wol ya.
3 Ol man oli nidim se narafala man i givhan long olgeta blong oli kasem stret save long trutok. (Ol Wok 8:30, 31; 18:26) Hemia narafala risen from wanem yumi mas akseptem responsabiliti blong yumi blong gobak mo “givim wora” long ol sid blong trutok we yumi planem finis. ?Olsem wanem yumi wanwan yumi save gohed gud long saed blong speret sipos wan man i no bin kambak bakegen blong luk yumi mo givhan long yumi blong kasem stret save long saed blong Jeova mo ol gudfala plan blong hem?—Mat. 7:12.
4 Soemaot Lav Mo Strong Tingting: Ol visit we yumi mekem hem i wan gudfala rod blong soemaot se yumi laekem ol man. Wan paenia brata we i blaen i talem se: “Stat long taem we mi tekem baptaes, tingting blong mi i strong se mi mas talem ol samting we mi bin lanem long Baebol long ol narafala man. Mi mi glad from trabol long ae blong mi i no stopem mi blong mekem olsem. . . . Mi mi lanem fasin blong tingbaot ol haos wanwan long rod, mo long fasin ya, mi save mekem ol visit bakegen long ol man we oli intres blong stadi Baebol.” Brata ya we i blaen i save lukluk wetem hat blong hem, mo hem i gohed blong mekem ol visit mo soemaot Kristin lav blong hem long ol narafala man.
5 Taem yumi mekem ol visit, plante taem yumi gat gudfala jans blong yusumgud Baebol mo givim ol ansa long saed blong hop blong yumi. (1 Pita 3:15) Samting ya i no givhan nomo long man blong haos, hem i mekem se tingting blong yumi i strong mo yumi stap soemaot fasin tangkyu blong yumi long trutok. Yumi glad taem yumi mekem ol visit, hemia nomo i rod blong harem gud moa. Mo fasin blong glad ya i no mas godaon. Oltaem hem i save kam strong bakegen taem yumi wok strong blong mekem ol visit.—Prov. 10:22.
6 Yumi mas tinghevi long responsabiliti blong yumi blong mekem ol visit. Ol man blong Jeova oli no stap kipim ol gudfala samting long olgeta nomo, ol man oli luksave samting ya from wok we yumi stap mekem long 1991 long olgeta ples long wol. (Prov. 3:27) Yumi mekem 344,926,952 visit mo 3,947,261 Baebol stadi. I gat 300,945 nyufala disaepol we oli givim laef blong olgeta long Jeova mo oli tekem baptaes. Bigfala namba ya i no save kamaot sipos yumi no rere blong akseptem responsabiliti blong yumi blong mekem ol visit.—1 Tes. 2:8.