Givhan Long Ol Man We Hat Blong Olgeta i Stret
1. ?Long taem blong yumi, hu ol man we Jeova i stap pulum olgeta?
1 Evri man i gat prapa fasin blong hem we i kamaot long hat blong hem. (Mat. 12:35) Baebol i tokbaot man we “long [hat] blong hem hem i no laekem ol narafala man, i agens long olgeta.” (Sam 55:21) Be i gat ol man tu we hat blong olgeta i “stret blong [oli] kasem laef blong olwe.” (Wok 13:48, NW ) Long taem blong yumi, Jeova i stap pulum ol man we hat blong olgeta i stret. (Hag. 2:7) ?Olsem wanem yumi save halpem olgeta blong oli kam ol man blong Jeova?
2. ?Wanem samting i joen wetem wok blong mekem disaepol?
2 Mekem Ol Visit: Blong mekemgud wok ya blong pulum ol man oli kam disaepol, yumi mas gat strong tingting blong mekem ol visit. (Mat. 28:19, 20) ?Yu yu gobak kwik long ol man we oli intres? ?Yu yu gobak long ol man we oli tekem ol buk mo magasin, mo olgeta we oli soem se oli laekem gud nius? ?Yu yu gobak plante taem blong halpem olgeta blong gru long saed blong spirit? Laef blong ol man i stap long denja, taswe yumi mas traehad blong mekem intres blong olgeta i gru.
3. ?Afta we yu lego haos blong wan man we i intres, yu mas mekem wanem?
3 Taem yu lego haos blong wan man we i intres mo yu stap tingbaot yet ol samting we yutufala i bin tokbaot, tekem smoltaem blong raetemdaon nem mo adres blong hem. Makem tu ol samting we yutufala i bin tokbaot, ol vas we yu bin soem long hem, mo wanem buk yu bin givim. Biaen, meksua se yu kambak kwik blong luk hem bakegen.
4. ?Olsem wanem yumi save mekem ol gudfala visit?
4 Olsem Wanem Blong Mekem Visit: Taem yu mekem wan visit, i gud blong soem kaen fasin mo frengud wetem man, soem se yu rili intres long hem. Storian blong yu i mas klia mo isi blong kasem save long hem, mo i mas stanap long Baebol. Rerem wan storian blong Baebol we bambae i pulum tingting blong hem, nao long en blong storian ya, stanemap wan kwestin we yu save ansarem long nekis visit. I moagud blong no raorao from sam tingting we man i talemaot we maet oli no laenap wetem Baebol. Traem faenem ol gudfala tingting blong hem mo stori long samting ya.—Kol. 4:6.
5. ?Wan paenia i traehad blong mekem wanem, mo wanem frut i kamaot?
5 Blong mekem ol visit, yumi mas traehad, be i gat gudfala frut i save kamaot. Wan paenia long Japan i wantem mekem moa visit evri manis. Ale, hem i raetemdaon nem blong olgeta man we hem i mitim long wok blong prij, nao bifo we seven dei i pas, hem i go luk olgeta bakegen. Hem i reregud ol samting we bambae hem i tokbaot, mo hem i soemaot se hem i rili bilif long ol tok we hem i talem. Ale, hem i statem Baebol stadi long wan visit. Visit ya i talem se: “Bifo, mi mi neva wantem storian wetem yufala. Hemia faswan taem we mi bin lesin.” Kaen fasin blong paenia ya we i gobak plante taem long visit ya, i karem frut. Long en blong wan manis, paenia ya i gat ten Baebol stadi.
6. ?From wanem yumi mas gat strong tingting oltaem blong mekem ol visit?
6 Laef blong ol man i stap jenis oltaem. (1 Kor. 7:31) Maet yumi mas gobak plante taem blong faenem wan man bakegen. Be sipos yumi no mestem blong mekem ol visit blong yumi, ale yumi save givhan long ol man we hat blong olgeta i stret, blong oli faenem rod we i go kasem laef.—Mat. 7:13, 14.