?Yu Yu Askem Baebol Stadi?
1 Plante pablisa oli gat gudhan blong statem ol Baebol stadi taem oli yusum fasin ya blong askem stret long ol man sipos oli wantem stadi Baebol. Wan man we i no stap wantem tekem ol magasin no buk long plante taem i wantem wan Baebol stadi taem oli askem hem. Hem i ansa se: “Oltaem mi stap wantem blong stadi Baebol.” Nao oli statem wan Baebol stadi, mo ful famle blong hem i gohed gud long trutok.
2 Evriwan i mas wantem statem ol Baebol stadi. Blong ol man oli kam disaepol blong Kraes, oli mas lanem sam samting. (Mat. 28:19, 20) Blong tijim olgeta, oli nidim wan Baebol stadi. Yu save statem Baebol stadi sipos yu soemaot long man blong haos olsem wanem hem i save lanem plante samting long Baebol mo ol promes blong God. Wan brata we i wok long Betel long Bruklin i statem faef Baebol stadi long wan manis, hem i yusum traket ya Laef Blong Pis Long Nyufala Wol, blong statem Baebol stadi wetem olgeta. Tru ya, hem i no save mekem plante Baebol stadi olsem from wok we hem i mekem long Betel, taswe hem i givim ol stadi ya long ol narafala pablisa blong mekem.
3 Sipos yumi stap faenemaot se i isi blong statem ol Baebol stadi, yumi save tekem ol narafala pablisa wetem yumi mo givhan long olgeta blong oli kasem ol Baebol stadi tu. No maet yumi save givim ol Baebol stadi we yumi bin statem long ol narafala pablisa insaed long kongregesen. Sipos yu wantem gat wan Baebol stadi, traem askem stret Baebol stadi long ol man we yu stap toktok wetem olgeta long wok blong prij. Wan taem wan pablisa i visitim wan yangfala gel we i no soemaot bigfala intres. Nating se i olsem, pablisa ya i askem Baebol stadi long hem, mo hem i agri blong stadi. Naoia gel ya i baptaes, mo sista blong hem mo hasban blong sista blong hem tufala i stap kam long ol miting tu.—Gal. 6:6.
4 I no evri man we yumi statem Baebol stadi wetem olgeta bambae oli gohed blong stadi. I no evri man we yumi stadi wetem olgeta bambae oli kam long trutok. Be samfala, yes. Sipos yumi statem plante Baebol stadi, i gat jans we yumi save givhan long plante man blong oli kam man blong presem Jeova.