Statem Baebol Stadi
1 Wan bigfala glad mo ekspiryens we yumi save haremgud long hem olsem wan trufala Kristin, hemia blong tijim wan narafala long trutok long wan Baebol stadi. Be, maet samfala oli no stap glad blong joen long gudfala haf ya blong minista wok from oli harem se oli no naf blong statem mo mekem wan Baebol stadi. Plante we naoia oli gudfala pablisa mo paenia oli harem olsem fastaem. Be, taem oli trastem Jeova mo folem ol advaes blong Kingdom Wok Blong Yumi, oli lanem olsem wanem blong statem mo lidim wan Baebol stadi, mo oli save mekem glad blong olgeta long minista wok i gru moa. Yu save gat sem mak ya tu.
2 Askem Stret Mo Yusum Ol Traket: Wan isi rod blong statem wan stadi i blong askem stret. Samfala man i nidim nomo blong yumi askem olgeta long kaen fasin blong stadi Baebol. Yumi save askem man blong haos se: “?Yu yu laekem blong gat wan prapa Baebol stadi we i save mekem ol save blong yu i gru moa long Baebol mo long stampa tingting blong God long wol ya?” No yu save talem long man blong haos we yu yu glad blong soemaot olsem wanem blong mekem wan Baebol stadi. Nating se plante oli no wantem, !be tingbaot glad blong yu taem yu faenem wan we i akseptem wan Baebol stadi!
3 Wan narafala rod blong statem wan Baebol stadi, hemia taem yumi yusum wan long ol traket blong yumi. Nating we saes blong hem i smol, be oli givim wan mesej we i gat paoa mo i save pulum man blong bilif. ?Olsem wanem blong statem wan stadi long traket? I isi blong givim wan traket we yu bilif se man blong haos i save gat intres long hem. Yu nao yu statem, askem man blong haos blong ridim fas paragraf wetem yu. Lukluk ol vas, mo tokbaot olsem wanem oli laenap wetem ol save ya. Long faswan visit, maet yu save mekem wan no tu paragraf nomo. Taem man blong haos i stat blong luksave ol samting ya we i stap lanem long Baebol, maet yu save spenem longfala taem lelebet long nekis storeyan.
4 Yusum Baebol Nomo: Samtaem wan man i agri blong tokbaot Baebol be i luk olsem we hem i no wantem blong akseptem wan stadi no yusum wan long ol buk blong yumi. Be nating yu save stat mo mekem wan Baebol stadi, taem yu mekemrere sam storeyan blong Baebol we i stanap long buk ya Laef Foreva no Reasoning buk, be yu yusum Baebol nomo taem yu stap visitim man ya we i intres. Storeyan olsem i save stap 15 no 20 menet, no maet moa, i dipen long ol samting we oli save hapen. Sipos yu mekem olsem oltaem mo yu stap gohed blong folem wan program blong tijim trutok blong Baebol, yu stap mekem wan Baebol stadi, mo yu save mekem wan ripot long hem. Nao long stret taem blong hem, soemaot buk ya Laef Foreva, mo mekem wan Baebol stadi long hem.
5 Antap long jans we yu gat blong faenem stadi long wok blong prij, ?yu stap traehad blong statem Baebol stadi wetem ol man we oli stap kolosap long yu, ol fren, no ol memba blong famle blong yu? ?Samtaem bifo yu mekem olsem? ?Yu stap traem bakegen naoia? ?Sipos wan rod i no wok bifo, yu stap tingbaot blong traem wan narafala rod?
6 Yu save statem ol stadi sipos yu folem ol advaes ya, stap gohed long wok blong prij, mo trastem Jeova blong givim ol blesing blong hem. Neva daonem paoa blong trutok mo help we Jeova i givim. Taem yu statem mo mekem ol Baebol stadi, samting ya i save mekem glad blong yu i gru moa long minista wok blong yu.