?I Gat Sam Long Yumi We Oli Wantem Faenem Ol Baebol Stadi?
1 ?Yu yu gat sam Baebol stadi finis? ?Sipos yu no gat wan yet, yu wantem gat wan? Jisas i soemaot klia se wok blong yumi i no blong givim witnes nomo. Yumi mas halpem ol man we oli intres blong oli gru long saed blong spirit tu. (Jon 4:39-42) Plante pablisa oli neva gat janis ya blong mekem wan Baebol stadi. Mo maet sam pablisa oli bin gat ol Baebol stadi, be naoia oli no moa gat.
2 Buklet ya “Wanem” i wan gudfala tul blong halpem yumi blong statem ol Baebol stadi. Taem yumi stadi wetem man long buklet ya fastaem i olsem we yumi stanemap wan gudfala fandesen blong bildim haos antap long hem. Biaen yumi save pulum intres blong man ya blong mekem wan stadi we i dip moa wetem Save buk.
3 Olsem Wanem Blong Statem Wan Baebol Stadi: Taem wan man we yumi prij long hem i soem klia se hem i intres long wanem we yumi talem nao i tekem wan buk, i no min se naoia yumi save lego hem. Nogat. Maet yumi save statem Baebol stadi wetem hem stret long taem ya. Yumi save jusum wan japta long buklet we i stret blong tokbaot. Ale yumi save ridim wanwan kwestin antap long pej wetem ol paragraf we oli laenap long ol kwestin ya, mo jekemap mo eksplenem ol vas blong Baebol.
4 I tru se plante taem yumi statem ol stadi wetem man long wok blong prij. ?Be olsem wanem long ol man we oli laef klosap long yumi, ol fren blong yumi, no ol memba blong famle? ?Yumi traem statem sam Baebol stadi wetem olgeta ya? Maet yumi traem mekem samting ya finis bifo. ?Be olsem wanem naoia? ?Yumi save traem bakegen? Ol kwestin mo wari we i stap long tingting blong ol man long ples blong wok, ol fren long skul, mo ol tija, i save pulum yumi blong statem sam storian long Baebol mo sam stadi tu. Sipos yumi yusum Baebol blong givim wan ansa we i klia, i stret long wari no kwestin blong olgeta, mo we i leftemap tingting, yumi soemaot long olgeta se Baebol i save halpem yumi tede. Maet yumi save mekem stadi long medel dei, no afta long wok, afta long skul, no long eni taem we i stret long man ya. I gud we yumi traem mekem we ol stadi ya oli no bitim 15 no 20 menet.
5 I impoten tumas blong reregud. Taem yu mekem wan visit bakegen, meksua se ol poen we yu wantem tokbaot oli stap klia long tingting blong yu. Tingbaot olsem wanem yu save yusum storian blong yu blong statem wan Baebol stadi wetem man ya. Ol Wok 20:35 i halpem yumi blong luksave se yumi save kasem bigfala glad taem yumi serem samting we yumi gat wetem ol narafala. I gud yumi putum wan mak se yumi traem statem sam Baebol stadi.