Haf 1—Givhan Long Ol Baebol Stadi Blong Oli Gohed Gud
?Wanem Ya Wan Baebol Stadi?
1 Long ful wol, evri manis, ol man blong God oli mekem klosap sikis milian Baebol stadi. Taem yumi yusum ol rod blong tij gud, yumi save halpem ol Baebol stadi ya blong gru long saed blong spirit kasem mak we oli givim laef blong olgeta i go long Jeova mo tekem baptaes. Ale, olgeta tu oli kam “naf blong tijim ol narafala man.” (2 Tim. 2:2) ?Yu yu wantem halpem ol stadi blong yu blong oli kasem ol mak ya? Stat naoia bambae Kingdom Wok Blong Yumi i gat wan haf we i eksplenem sam stamba rod blong givhan long ol Baebol stadi blong oli gohed gud.
2 ?Wetaem Yumi Save Putum Ripot Blong Wan Baebol Stadi?: Sipos oltaem yu visitim wan man we i intres blong storian long Baebol, mo yu folem ol save long wan buk we yumi yusum blong stadi, nating sipos storian i sot nomo, be hemia wan Baebol stadi. Nating se yu mekem samting ya taem yu stanap long doa blong haos blong man no long telefon, be hem i wan Baebol stadi. Sipos yu mekem stadi bitim tu taem finis afta we yu soem long hem olsem wanem blong mekem wan Baebol stadi, mo sipos i luk olsem se man ya i soem intres mo yu save gohed blong mekem stadi wetem hem, ale, yu save putum ripot blong Baebol stadi.
3 Buklet ya Wanem mo Save buk hemia nao ol buk we yumi yusum blong mekem plante Baebol stadi. Afta we studen i finisim tufala buk ya mo i klia se hem i stap gru long saed blong spirit, nating sipos hem i stap gru slo nomo, mo sipos i klia se hem i rili gat tangkiu from ol samting we hem i lanem, ale, yumi mas gohed blong stadi Baebol wetem hem long buk ya Wosipim God. Maet yumi save yusum buklet ya !Yu Save Kam Fren Blong God! blong mekem stadi wetem olgeta we oli no bin go long skul no maet oli no save rid.
4 Wok blong mekem ol Baebol stadi i karem gudfala frut taem i halpem plante milian man blong oli kam ol disaepol blong Jisas Kraes. (Mat. 28:19, 20) Taem yumi yusum ol rod we bambae oli kamaot long ol haf ya blong Kingdom Wok, bambae yumi save givhan long Baebol stadi blong i gohed gud.