Talemaot Gud Nyus—Askem Stret Ol Baebol Stadi
1 Jisas i talem long yumi blong “mekem disaepol.” (Mat. 28:19, NW) From samting ya, yumi mas statem Baebol stadi wetem ol man we oli intres. Long ol haos wanwan, long fas tok blong yumi, yumi save askem stret Baebol stadi long ol man, olsemia nao maet yumi save statem kwik wan Baebol stadi. Mo tu, rod ya i soemaot klia risen from wanem yumi go long ol haos wanwan.
2 ?Olsem wanem yumi save askem Baebol stadi? Yu save talem nomo se: “Mi mi intres blong givhan long ol man blong save long Baebol. Mo mi glad sipos mi kam long haos blong yu mo stadi wetem yu mo famle blong yu, hem i fri nomo. Yumi save yusum Baebol blong yu. Be sipos yu no gat, mi save givim wan long yu.”
3 Narafala rod blong talem, maet i olsem, se: “Mi jes pas tede blong stap leftemap tingting blong ol man blong oli stadi Baebol long haos blong olgeta. Stadi ya bambae i givhan long yu blong save wanem bambae i kamaot long wol ya mo wanem promes blong God long yumi. Mi glad blong soem long yu olsem wanem yu save kasem plante samting long Baebol blong yu. Hem i fri nomo.” Nao sipos man blong haos i agri yu save yusum traket ya Laef Long Pis Blong Nyufala Wol.
4 Yusum Ol Traket: Plante oli faenemaot se ol traket oli gud blong yusum blong statem Baebol stadi. Sipos wan man blong haos i openem doa, givim traket ya Laef Long Pis Blong Nyufala Wol long hem mo openem blong hem i luk olgeta samting we i stap insaed. Yu mas gat narafala traket we i sem mak blong ridim no askem ol kwestin long tufala fas haf. Tokbaot ol ansa, mo ridim ol vas long Baebol blong sapotem ol tok blong yu. Talemaot long hem se yu glad long storeyan blong yutufala, mo mekem plan blong gobak bakegen. Sipos hem i glad, yu save eksplenem wei blong mekem Baebol stadi long haos, we i fri nomo. No sipos no, maet yu save talem nomo se bambae yu kambak mo tokbaot bakegen ol nekis poen we i stap long traket ya.
5 Taem yu mekem rod blong gobak bakegen, hem i gud blong talem wan samting we man blong haos i save intres long hem. I gud sipos hem i wan kwestin. Samting ya i save mekem man blong haos i tingbaot mo bambae i stap wet blong yu gobak bakegen blong ansarem kwestin ya we yu stanemap.
6 Famle Hapi buk hem i gud long plante rod. Mifala i sua se bambae yufala i agri nomo se buk ya hem i gud blong givhan long ol famle long teritori blong yufala. Taswe taem yufala i traehad blong mekem disaepol, tingbaot blong halpem evriwan long famle. I gud we yumi evriwan i tekem jans blong statem ol Baebol stadi mo blong “mekem disaepol.”—Mat. 24:14; 28:19, 20, NW; Mark 13:10.