Ol Buk Stadi
Haf 3: Oli Ples Blong Mekem Miting Blong Prij
1 Ples we oli stap mekem Buk Stadi long hem, hem i wan ples blong mekem miting blong prij tu. I mas gat ol stret taem blong ol miting olsem, we bighaf blong ol pablisa long grup ya oli save glad long hem. Long ol miting olsem, ol pablisa oli save kasem help mo rere gud long wok blong prij.
2 Sipos brata i lukaot gud long stadi mo long miting blong prij, samting ya i save givhan long ol pablisa long saed blong speret. From we i gat sam pablisa we oli no save olsem wanem blong ansa taem ol man oli putum kwestin blong blokem olgeta, sam oli no save olsem wanem blong statem wan toktok. Mo tu, sam oli no save olsem wanem blong tokbaot Baebol stadi long ol man, no oli no save wanem bambae oli save talem long wan visit. Taswe ol paenia mo ol pablisa we oli stap mit long ples blong Buk Stadi, oli save givhan long olgeta ya.—Gal. 6:9, 10.
3 Wok Blong Brata We i Lidim Buk Stadi: Brata we i lidim Buk Stadi i mas lukaotgud long ol wok we grup ya i mas mekem. Oltaem brata ya i mas wok wetem ol pablisa long wok blong prij. (1 Pita 5:2, 3) Taem brata ya i mekemrere gud ol miting blong prij, hem i save givim ol advaes we oli wok gud mo oli stanap long Baebol, we ol pablisa oli nidim long wok blong prij. I gud we ol Buk Stadi wanwan oli gat prapa ples blong mekem miting blong prij. I nogud blong olgeta grup oli kam wanples. Be sipos i gat tu smol grup, maet oli save joen wanples.
4 Sipos i gat miting blong prij evri wik, bambae ol pablisa oli gat strong tingting blong joen oltaem long wok ya. Mo sipos i gat ol prapa taem blong ol miting long prapa ples blong ol, ol pablisa oli save mekem gud plan blong olgeta. Mekem se ol pablisa wanwan oli save gud se i gat teritori blong wokem mo i gat sam narafala pablisa we oli save joen wetem. (Ridim Luk 10:1.) Sipos brata we i lidim Buk Stadi i no save kam, hem i mas givim teritori mo mekemrere ol samting we grup i nidim. (om [E/F] pej 44-45) Sipos i no gat wan brata we i naf blong lukaot long miting blong prij, brata we i lidim Buk Stadi i save givim long wan sista blong mekem. (om pej 77-8; km-E/F 4/88 pej 3) Sipos wan grup i gat prapa taem mo prapa ples we oli stap go oltaem long hem, bambae ol pablisa oli no save konfyus. Be sipos i gat sam jenis, i gud blong mekem ol pablisa oli save long hem wan wik bifo.
5 Yumi Mas Wok Tugeta: Evriwan i mas traehad blong joen long olgeta haf blong wok blong prij. Ol pablisa oli mas rere gud fastaem bifo oli go prij. Blong mekem olsem, ol pablisa nomo oli save tingbaot blong mekem sam pleplei long haos fastaem. Ol pleplei ya oli soemaot olsem wanem ol pablisa oli save ansa long ol kwestin mo winim ol traem we i save kamaot long teritori blong olgeta.—Prov. 27:17.
6 Sipos yu wantem wan pablisa we i gat ekspiryens blong givhan long yu blong gat gudhan long wok blong mekem disaepol, toktok wetem brata we i lidim Buk Stadi blong yu. Hem i save talem long wan pablisa olsem blong givhan long yu. Nao taem yu folem ol advaes ya we yu kasem mo yu holemgud ol plan we yu yu mekem, bambae yu save kasem ol blesing from.
7 Ol pablisa we brata we i lukaot long Buk Stadi i wantem olgeta blong givhan long ol narafala, oli mas glad blong mekem. Mo oli no mas strong tumas long olgeta we oli stap halpem. Olgeta we oli glad oltaem long wok blong prij, mo oli skelemgud wok ya mo oli gat gudhan long hem, oli save trenem ol narafala. Sipos pablisa we i stap lan i stap gohed gud, i gud blong talem long hem. Ale, hem i save putum ol narafala mak blong kasem.—Ridim Luk 19:17-19.
8 Yumi wantem givhan long ol narafala blong oli gat gudhan blong talemaot gud nyus mo mekem disaepol. From we laef tede long wol i stap kam moa nogud, taswe i impoten tumas blong mekem wok ya. Laef blong ol man i dipen long wok ya tu. Mo Jeova i stap mekem wok blong karem kakae long garen i spid moa. (Aes. 60:22) Taem yumi tingtinggud long wok ya blong yumi, bambae yumi save wok kolosap moa long Buk Stadi grup blong yumi. Ale yumi save finisimgud wok ya blong yumi mo leftemap tingting blong ol narafala.—Rom 12:6-8; 2 Tim. 4:1, 2, 5.