Stret Rod Blong Mekem Miting Blong Prij
1. ?Miting blong prij i blong mekem wanem?
1 Wan taem, Jisas mo ol 70 disaepol blong hem oli mekem wan miting, bifo we oli go prij. (Luk 10:1-11) Hem i leftemap tingting blong olgeta, taem hem i talem se Jehova we i “masta blong garen,” bambae i givhan long olgeta. Hem i trenem olgeta, taem hem i talem samting we oli mas mekem long wok blong prij. Mo hem i lidim gud olgeta, taem hem i seraot olgeta blong oli wok “tutu.” Tede tu, ol miting blong prij oli blong leftemap tingting blong yumi, trenem yumi, mo lidim yumi blong wok folem plan.
2. ?Miting blong prij i mas longwan olsem wanem?
2 Tede, ol miting blong prij oli blong 10 no 15 minit. Long taem ya, brata we i lidim i seraot ol pablisa long ol grup blong prij, i talemaot teritori, mo i mekem prea. Naoia, samting ya i jenis. Stat long manis Eprel, miting blong prij i bambae i stap blong 5 no 7 minit nomo. Be, sipos miting ya i stap afta long wan miting blong kongregesen, hem i mas sot moa. Hemia from olgeta we oli kam long miting blong prij, oli bin lesin finis long ol Tok blong Baebol we i kamaot long miting blong kongregesen. Sipos miting blong prij i sotfala nomo, bambae evriwan i spenem moa taem long wok blong prij. Mo ol paenia no pablisa we oli stat prij eli, bifo long miting blong prij, bambae oli stop smoltaem nomo.
3. ?Olsem wanem blong mekem se ol miting blong prij oli givhan long ol pablisa?
3 Ol elda oli mas mekem gudfala plan blong miting blong prij blong i save givhan long ol pablisa. Plante kongregesen oli mekem ol grup blong miting blong prij long defdefren ples, i bitim we fulwan kongregesen i joen wanples long Haos Kingdom. Plan ya i givhan long ol pablisa blong oli joen long miting blong prij, mo blong oli stap klosap long teritori we bambae oli prij long hem. From we ol grup ya oli smol, i isi blong brata we i lidim i seraot ol pablisa, mo i lukaot long olgeta. Kampani blong ol elda i save luk wanem we i moa stret long ples blong olgeta. Bifo we oli finisim miting ya wetem wan prea, evriwan i mas save finis se oli prij wetem hu, mo long weples.
4. ?From wanem yumi mas tingbaot ol miting blong prij se oli impoten olsem ol narafala miting?
4 OIi Impoten Olsem Ol Narafala Miting: Miting blong prij i blong givhan long ol pablisa we oli go prij. Taswe, i no nid blong evri man long kongregesen i go long miting ya. Be nating se i olsem, hemia i no min se miting blong prij i no impoten. Miting blong prij i wan presen we i kam long Jehova, sem mak olsem ol narafala miting. Ol miting ya oli blong givhan long yumi blong yumi lavlavem yumi mo blong yumi mekem ol gudfala wok. (Hib. 10:24, 25) From samting ya, brata we i lidim miting blong prij i mas rere gud, blong samting we hem i tokbaot i leftemap nem blong Jehova, mo i givhan long olgeta we oli kam long miting ya. Taswe, sipos brata i mas rere gud olsem, i min se ol pablisa we oli go prij oli mas traehad blong go long miting ya.
Yumi no mas ting se miting blong prij i no impoten olsem ol narafala miting blong kongregesen
5. (1) ?Wanem wok blong elda we i lukaot long wok blong prij? (2) Sipos wan sista i lidim miting blong prij, ?hem i mas mekem olsem wanem?
5 Brata We i Lidim i Mas Rere Gud: Long ol miting blong kongregesen, ol brata we oli gat tok oli mas save sam wik bifo se oli gat tok. Hemia i sem mak long miting blong prij. I tru se sipos ol grup blong prij oli stap long defdefren ples, brata we i lukaot long grup no brata we i givhan long hem, tufala nao i mas mekem miting blong prij. Be taem fulwan kongregesen i joen wanples, elda we i lukaot long wok blong prij bambae i jusum wan brata blong mekem miting ya. Long sam kongregesen, elda we i lukaot long wok blong prij i mekem wan program blong ol brata we oli lidim miting blong prij mo i givim wan kopi long ol brata ya wanwan. Mo hem i pinim narafala kopi long notisbod long Haos Kingdom. Taem elda ya i stap mekem program ya, hem i mas tingbaot se miting blong prij i blong givhan long ol pablisa, taswe brata we hem i jusum i mas naf blong tij gud mo i lidim gud ol brata mo sista. Sipos long sam dei blong wik, i no gat elda mo man blong givhan, no wan narafala brata we i naf blong mekem miting ya, elda we i lukaot long wok blong prij i mas jusum wan sista we i naf blong mekem miting ya.—Yu luk bokis ya “Taem Wan Sista i Mas Lidim.”
6. ?From wanem i impoten we brata we i lidim miting blong prij i rere gud fastaem?
6 Taem yumi gat wan tok long Tiokratik Skul no long Miting Blong Kingdom Wok, yumi rere gud from we yumi tinghae long hem. !Ating bambae yumi no wet kasem las minit blong mekem tok ya! Hemia i sem mak long miting blong prij. From we naoia miting ya bambae i sot moa, i impoten we brata we i lidim i rere gud, blong miting ya i save givhan long ol pablisa mo i save finis long stret taem. Wan narafala samting we brata we i lidim i mas rere long hem, hemia teritori. Hem i mas save weswan teritori bambae oli prij long hem, bifo we hem i mekem miting blong prij.
7. ?Wanem sam samting we brata i save tokbaot long miting blong prij?
7 Yu Save Tokbaot: From we fasin blong prij i no sem mak long evri ples, ‘slef we i stret mo waes’ i no givim wan plan blong tok blong mekem miting blong prij. Bokis ya “Yu Save Mekem Samting Ya Long Miting Blong Prij,” i tokbaot sam rod blong mekem miting blong prij. Klosap oltaem, long miting blong prij i gat wan sotfala tok nomo wetem sam kwestin mo ansa. Sam samtaem, i save gat wan smol pleplei, no sipos i stret, brata i save soem wan video we i stap long jw.org. Taem brata i stap rerem miting ya, hem i mas tingbaot samting we i save leftemap tingting mo givhan long ol pablisa we oli go prij long dei ya.
Taem brata i rerem miting blong prij, hem i mas tingbaot samting we i save leftemap tingting mo givhan long ol pablisa
8. ?Wanem samting we i gud blong tokbaot long miting blong prij long Sarede mo Sande?
8 Yu traem tingbaot. Yumi stap givimaot ol Wajtaoa mo Wekap! long ol Sarede. Plante pablisa oli prij long Sarede nomo, taswe oli save fogetem ol fastok we oli lanem long Famle Wosip blong olgeta. Taswe, i gud we brata we i lidim miting blong prij i tokbaot bakegen wan long ol fastok we i stap long las pej blong Kingdom Wok Blong Yumi. Mo sipos i gat wan samting we i jes kamaot long nius, no i jes hapen, no wan lafet, brata ya i save joenem ol tingting ya long fastok blong seremaot ol magasin. Mo hem i save tokbaot olsem wanem blong stanemap wan kwestin blong mekem rod blong kambak luk man we i tekem magasin. Sipos samfala oli givimaot sem magasin ya finis, brata i save askem long olgeta blong oli tokbaot olsem wanem oli seremaot magasin ya, no oli save tokbaot sam gudfala stori blong prij. Long ol Sande, brata we i lidim miting ya i save folem sem fasin, be hem i tokbaot ol narafala buk we yumi seremaot long manis. Eni dei, yumi save givimaot ol buk blong mekem stadi wetem ol man, olsem buklet ya !Gud Nius We i Kamaot Long God! mo buk ya Baebol Tijim. Taswe brata we i lidim miting blong prij i save tokbaot olsem wanem blong seremaot ol buk ya.
9. ?Wanem samting we i gud blong tokbaot long wiken, long taem blong spesel wok?
9 Sipos kongregesen i stap mekem wan spesel wok long wiken, olsem blong singaot ol man oli kam long Memoriol no blong seremaot wan spesel traket, brata we i lidim miting blong prij i save tokbaot olsem wanem blong givimaot ol magasin, long semtaem we ol pablisa oli givimaot pepa blong Memoriol no traket. Mo hem i save tokbaot sam samting blong mekem sipos wan man i intres. Wan narafala samting blong mekem hemia blong tokbaot ol stori we oli kamaot long taem blong spesel wok ya.
10, 11. ?From wanem i impoten we ol pablisa oli rere gud from miting blong prij?
10 Ol Samting We Ol Pablisa Oli Mas Rerem: Ol pablisa tu oli save mekem se miting blong prij i rongud. Bifo we oli go prij, oli mas rere gud fastaem, maet long Famle Wosip blong olgeta. Nao bambae oli gat sam samting blong tokbaot long ol narafala pablisa. Oli mas karem ol magasin mo ol buk blong olgeta, bifo we oli go long miting blong prij. Sipos oli rere gud olsem, bambae oli no westem taem, be oli go stret long teritori afta we miting blong prij i finis.
11 Long olgeta miting blong kongregesen, yumi mas traehad blong kam long stret taem. Long sem fasin, i impoten we evriwan i kam bifo we miting blong prij i stat. Sipos yumi kam let, yumi spolem ol narafala. ?Yumi spolem olgeta olsem wanem? Yu traem tingbaot. Brata we i lidim wok blong prij i tingbaot plante samting, bifo we hem i mekem ol plan blong prij. Taem i no gat plante pablisa oli kam long miting ya, hem i save sanem evriwan oli go mekem wan teritori we oli no finisim. Taem teritori i stap longwe mo sam pablisa oli no gat trak, hem i save putum ol pablisa ya oli prij wetem olgeta we oli gat trak. Taem teritori i stap long wan ples we i no sef, hem i askem sam brata blong oli prij klosap long ol sista no wetem grup blong ol sista. Taem i gat ol pablisa we oli sik no oli olfala, hem i talem long olgeta blong oli prij long ol teritori we i no gat hil mo long ol haos we i no gat lada. Hem i putum ol niufala pablisa blong oli prij wetem olgeta we oli prij longtaem finis. Be sipos ol pablisa oli kam let long miting blong prij, brata ya i mas jenisim evri plan blong hem bakegen. I tru se samtaem, i save gat sam samting we i mekem yumi let. Be sipos yumi stap let oltaem, i gud yumi tingbaot se: ?Mi mi tinghae long ol miting blong prij no nogat? ?Mi mi rere gud bifo we mi go long miting blong prij?
12. Sipos oltaem yu yu stap mekem prapa plan blong yu, ?i gud yu tingbaot wanem?
12 Ol pablisa oli save jusum blong wok wetem wan narafala pablisa taem oli kam long miting blong prij mo bifo we miting ya i stat. Be sipos no, brata we i lidim miting blong prij nao i jusum hu pablisa we bambae yu prij wetem hem. Sipos oltaem yu yu stap mekem prapa plan blong yu blong prij wetem narafala, i gud yu tingbaot blong ‘mekem lav blong yu i bigwan’ moa. I gud yu traem prij wetem defdefren brata mo sista, i bitim we yu prij wetem semfala pablisa oltaem. (2 Kor. 6:11-13, NW) I gud yu mekem plan blong prij wetem wan niufala pablisa blong givhan long hem blong i kam gud moa long fasin blong tij. (1 Kor. 10:24; 1 Tim. 4:13, 15) Yu mas lesin gud taem brata we i lidim miting blong prij i talem wanem teritori we bambae yufala i wok long hem. Taem miting ya i finis, i nogud yu jenisim ol plan we brata i mekem, mo yu mas aot kwik i go long teritori blong prij.
13. Sipos yumi evriwan yumi rere gud, ?olsem wanem miting blong prij i save givhan long yumi?
13 Afta we ol 70 disaepol blong Jisas oli prij finis, oli kambak we “oli glad tumas.” (Luk 10:17) I sua se miting we Jisas i mekem wetem olgeta bifo we oli go prij, i givhan bigwan long olgeta. Tede, ol miting blong prij oli save givhan bigwan long ol pablisa. Sipos yumi evriwan i tinghae long ol miting ya mo yumi rere gud bifo we yumi kam long ol miting ya, bambae ol miting ya oli leftemap tingting blong yumi, oli trenem yumi, mo oli lidim yumi blong wok folem plan. Nao yumi save finisim gud wok ya blong talemaot Kingdom long olgeta man.—Mat. 24:14.