Ol Miting Blong Wok Blong Prij
1. ?From wanem yumi wantem tumas we wok blong prij i mas folem wan gudfala plan?
1 Jisas i soem wan gudfala eksampol taem hem i lukaot long wok blong talemaot Kingdom. Hem i mekem gudfala plan mo i save olsem wanem blong lidimgud wok ya. Tede, olgeta we oli lukaot long wok blong talemaot Kingdom raon long wol, oli wantem tumas we wok ya i gohed long sem fasin we Jisas i mekem. Blong mekem olsem, ol kongregesen raon long wol oli gat ol miting blong wok blong prij. From ol miting ya, ol pablisa blong talemaot Kingdom oli save mekem wok blong olgeta folem wan stret plan.—Mat. 24:45-47, NW; 25:21; Luk 10:1-7.
2. ?Ol miting blong wok blong prij oli blong mekem wanem?
2 Wan Gudfala Plan: Ol miting blong wok blong prij oli wan rod blong leftemap tingting blong ol pablisa, blong givim advaes we ol pablisa oli save yusum long wok blong prij, mo blong lidim ol pablisa i go long ples we oli save prij long hem. Taem vas blong dei i tokbaot wan poen we i laenap wetem wok blong prij, i gud blong tokbaot poen ya long miting blong wok blong prij. Samtaem i gud blong tokbaot bakegen sam tingting we i kamaot long Kingdom Wok Blong Yumi, long Reasoning buk, no long buk ya Ministry School. Ol poen ya oli save rerem tingting blong evriwan we oli kam wanples, blong oli mekem gud wok blong prij long dei ya. Samtaem i gud tu blong mekem wan sotfala pleplei blong soem olsem wanem blong serem buk no magasin we yumi mas seremaot. Bifo we brata i mekem prea, evriwan long grup i mas save se bambae oli prij wetem hu mo wanem teritori we bambae oli go long hem. Miting ya i no bitim 15 minit. I gud sipos evriwan i no tektaem tumas blong go long ol teritori blong olgeta afta we miting ya i finis.
3. ?Hu i lukaot long ol plan blong ol miting blong wok blong prij?
3 ?Olsem Wanem Oli Mekem Plan Blong Ol Miting Ya? Elda we i lukaot long wok blong prij, hem nao i lukluk long saed blong ol plan blong ol miting blong wok blong prij. Ol elda we oli lukaot long wan grup no ol man blong givhan long olgeta, oli mas joen wetem grup blong olgeta taem oli prij long ol wiken. Sam elda mo sam man blong givhan maet oli gat janis tu blong prij wetem ol brata sista long ol dei blong wik. Ol elda we oli lukaot long wanwan grup blong olgeta, oli wokgud wetem elda we i lukaot long wok blong prij, blong mekem se taem ol grup blong olgeta oli go prij long ol haos wanwan long wiken, oli gat naf teritori. Elda we i lukaot long wok blong prij, hem nao bambae i lukluk long ol plan blong talem hu i mas lidim ol grup blong prij long ol dei blong wik.
4-6. (a) ?Ol miting blong wok blong prij oli save givhan long ol pablisa blong mekem wanem long teritori blong kongregesen blong olgeta? (b) ?Wanem i save givhan blong save nid we i stap long saed blong ol miting blong wok blong prij?
4 ?Weples Mo Wetaem i Stret Blong Mekem Ol Miting Blong Prij? I moagud blong holem ol miting blong wok blong prij long ol ples we i save givhan long ol pablisa. I no nid blong mekem we ful kongregesen i kam miting long sem ples nomo oltaem. Samtaem oli save mekem miting blong wok blong prij long haos blong sam brata no sista long defdefren ples long teritori. Samting ya i halpem kongregesen blong wokemgud olgeta haf blong teritori blong hem. Haos Kingdom hem i wan ples we yumi save yusum blong mekem miting blong wok blong prij. Plante kongregesen oli yusum Haos Kingdom blong mekem wan miting blong wok blong prij stret afta long pablik tok mo Wajtaoa Stadi blong Sande. Traehad blong mekem ol plan we oli givhan long ol pablisa blong oli no wokbaot i go longwe tumas blong kasem teritori. Taswe, wanwan taem, i gud blong lukluk bakegen long ol plan ya blong meksua se ol ples we kongregesen i yusum blong mekem ol miting blong wok blong prij oli stret yet no nogat. Long rod ya, bambae oli save sipos i gat nid blong jenisim sam long ol ples blong miting ya, blong mekem se ol pablisa oli wokemgud mo finisim fulwan ol teritori.
5 Ol taem mo dei we i moa stret blong mekem ol miting blong wok blong prij, mo hamas taem long wan wik no long wanwan dei we i stret blong mekem ol miting ya, i mas laenap wetem teritori blong kongregesen. Ol kwestin long nekis haf oli save givhan blong save weples mo wetaem i gud blong putum sam miting blong wok blong prij.
6 ?Weswan teritori blong kongregesen we yumi mas prij moa long hem? ?Wetaem nao hem i gudfala taem blong prij long ol haos wanwan? ?Yumi mas putum wan miting blong wok blong prij long sapa, blong ol pablisa oli save prij long haos wanwan mo mekem ol visit? Olgeta plan long saed blong wok blong prij oli mas stap long notisbod blong kongregesen. Olgeta pablisa we oli stap talemaot Kingdom oli wantem mekem gud wok blong olgeta blong prij fulwan long teritori we oli givim long olgeta. Long rod ya nao, bambae oli save talem sem toktok ya we aposol Pol i bin talem se: “Naoia, ol wok blong mi long ples ya i finis.”—Rom 15:23.
7. ?Wanem wok i stap long han blong brata we i mekem miting blong wok blong prij?
7 Ol Miting Blong Wok Blong Prij: Brata we oli jusum hem blong mekem miting ya, hem i soem bigfala respek long tiokratik oda taem hem i rere gud. Ol miting ya oli mas stat long stret taem, oli mas tijimgud man, mo oli mas sot nomo, samting olsem 10 mo 15 minit nomo. Bifo we miting ya i stat, brata i mas gat ol teritori ya finis we bambae oli go wok long hem. Taem miting i finis, i no nid blong wet long olgeta we oli kam let, be samtaem i gud blong livim wan mesej i stap blong letem olgeta ya oli save se grup i stap prij wea. Stret afta we miting i finis, evri pablisa oli mas go long teritori we bambae oli prij long hem. Taem brata i rere gud mo i tokbaot samting we i save tijimgud ol pablisa, ale samting ya bambae i givim ol save we olgeta oli nidim blong oli mekemgud wok blong olgeta long wok blong prij long dei ya.—Prov. 11:14, NW.
8. ?Olsem wanem yumi save wokgud wetem olgeta we oli lidim yumi, taem yumi kam long miting blong wok blong prij?
8 Olgeta We Oli Kam Long Miting Blong Wok Blong Prij: I impoten tumas we yumi wokgud wetem olgeta we oli lidim yumi. (Hib. 13:17) Taem i gat janis, brata we i lidim grup i mas givhan long ol pablisa we oli nidim wan narafala pablisa blong wok wetem olgeta. I gud sipos ol pablisa we oli gat ekspiriens oli kam long miting blong wok blong prij, olsem nao bambae oli save givhan long ol niufala pablisa, mo long olgeta we oli no gat plante ekspiriens yet long wok ya. Ol pablisa we, wanwan taem, oli glad nomo blong prij wetem defdefren pablisa, oli save givhan bigwan long narafala. (Prov. 27:17; Rom 15:1, 2) I gud yumi evriwan i traehad blong kam long stret taem. Sipos yumi gat respek long tiokratik oda mo yumi tingbaot ol Kristin brata sista blong yumi, samting ya i save pusum yumi blong traem bes blong yumi long saed ya.—2 Kor. 6:3, 4; Fil. 2:4.
9. ?Olsem wanem ol paenia oli save sapotem plan blong ol miting blong wok blong prij?
9 Sapot Blong Ol Paenia: Ol paenia we oli kam long ol miting blong prij, oli givhan bigwan mo oli leftemap tingting blong ol narafala. I tru, ol paenia oli gat plante wok blong mekem. Oli gat plante Baebol stadi mo visit, be antap long hemia maet oli gat wan famle blong lukaot long hem mo oli mas wok tu. Taswe wan paenia i no mas ting se hem i mas stap long evri miting blong wok blong prij we kongregesen i stanemap, antap moa sipos i gat miting evri dei. Be i sua se i gat sam miting we ol paenia oli save sapotem evri wik. Ol miting blong wok blong prij oli lelebet olsem wan rod blong trenem ol pablisa, taswe save we ol paenia oli gat long saed blong Baebol mo long wok blong prij, i save givhan bigwan long ol narafala. From we ol paenia oli prij oltaem, samting ya i givim moa save long olgeta long saed blong wok ya. Oli save serem save ya wetem ol narafala. Strong tingting we oli gat blong joen long wok blong prij mo long ol miting blong wok blong prij, i stap olsem wan gudfala eksampol we ol narafala oli save folem. Yumi tangkiu bigwan long olgeta from fasin blong olgeta blong joen long ol miting ya.
10. ?From wanem olgeta pablisa blong Kingdom oli mas sapotem ol miting blong wok blong prij?
10 Bighaf blong wok ya blong talemaot Kingdom, yumi stap mekem long ol haos wanwan olsem we Jisas mo ol man blong hem oli mekem bifo. Yumi mekem ol miting blong wok blong prij blong pulum yumi blong joen wanples blong leftemap tingting blong yumi mo blong yumi karem gudfala frut long wok ya. Olgeta pablisa blong gud nius oli mas sapotem tiokratik plan ya go kasem mak we oli naf blong mekem. (Wok 5:42; 20:20) I gud yumi evriwan i mekem plan blong sapotem ol miting blong wok blong prij. Taem yumi mekem olsem, yumi sua se bambae Jeova i blesem yumi, mo Lida blong yumi, Jisas Kraes, bambae i glad tumas long wok blong yumi blong talemaot gud nius ya blong Kingdom blong God.—Mat. 25:34-40; 28:19, 20.