?Yu Save Mekem Wanem Blong Yu Harem Gud Long Grup Blong Wok Blong Prij?

1. ?Wanem gudfala samting long buk stadi we i stap yet long grup blong wok blong prij?

¹ ?Yu yu sore from we sam samting long Buk Stadi Blong Kongregesen, i no moa gat? Fastaem, grup blong buk stadi i smol nomo mo evriwan we oli joen oli harem gud, oli no fraet. Samting ya i mekem se i isi nomo blong oli fren gud wetem ol narafala, mo hemia i leftemap tingting blong olgeta. (Prov. 18:24) Elda we i lukaot long buk stadi, i savegud evriwan we i joen, mo hem i save givim gudfala advaes blong leftemap tingting blong olgeta. (Prov. 27:23; 1 Pita 5:2, 3) Yumi save kasem ol gudfala samting ya yet taem yumi joen long grup blong prij.

2. ?Yumi save mekem wanem blong yumi fren moa wetem ol narafala long grup blong yumi?

² Yu No Wet: Long grup blong wok blong prij, i gat smol man nomo olsem long ol buk stadi. Taem yumi wok wetem ol narafala “olsem wan tim nomo,” yumi save fren gud moa. (Fil. 1:27) ?Hamas brata sista long grup blong yu we yu prij wetem olgeta finis? ?Yu yu save “go moa” blong prij wetem ol narafala? (2 Kor. 6:13, NW) Samtaem i gud we yumi singaot wan brata no sista long grup blong yumi, blong i kam joen wetem yumi long naet blong Famle Wosip, no blong kakae. Long sam kongregesen, oli mekem plan se wanwan grup blong wok blong prij i singaot brata we i kam givim tok long kongregesen blong olgeta, blong i kam kakae wetem olgeta. Ale, taem wan brata i kam givim tok, grup we i save se i taem blong hem, bambae i rerem kakae. Biaen, evri wan long grup ya i joen wanples blong kakae mo oli storian blong lefleftemap tingting blong olgeta. Oli mekem olsem tu, nating se brata we i mas givim tok i no kam.

3. ?Long grup blong yumi, wanem ol janis we yumi gat blong ol elda oli save visitim yumi?

³ Nating se naoia yumi joen wanples tu taem nomo long wan wik, be hemia i no min se ol elda oli no moa visitim ol pablisa wanwan. Ol elda we oli lukaot long ol grup wanwan, oli leftemap tingting blong ol pablisa long grup blong olgeta, mo oli trenem olgeta long wok blong prij. Sipos elda we i lukaot long grup blong yu, i no prij wetem yu yet, i gud yu go askem long hem blong yu wok wetem hem. Long wan wiken blong evri manis, elda we i lukaot long wok blong prij i joen long wan defren grup blong prij. Long ol smol kongregesen we i no gat tumas grup blong wok blong prij, hem i save mekem plan blong visitim wanwan grup ya, tu taem long wan yia. ?Yu yu mekem plan finis blong yu go long wok blong prij long taem we hem i visitim grup blong yu?

4. (1) ?Olsem wanem blong mekem ol miting blong prij? (2) ?From wanem i gud we yumi tingbaot blong letem se oli yusum haos blong yumi, blong mekem miting blong prij?

⁴ Taem i gat ol defren grup blong prij long wiken, plante taem samting ya i gud from we oli mekem miting blong prij long ol defdefren ples mo klosap long sem taem. Olsem nao, i isi long ol pablisa blong oli joen long miting ya mo blong oli go long teritori. Mo i isi blong brata we i lidim grup blong i seraotem ol pablisa, nao oli save go long ples blong prij kwiktaem. Mo hem i save kea gud long ol brata sista long grup blong hem. Be, maet sam samting i hapen we i mekem se tu grup i mas joen tugeta blong wok blong prij. Sipos ful kongregesen i joen wanples blong mekem miting blong prij long fas Sarede blong manis no afta long Wajtaoa stadi, plante taem i gud we ol pablisa blong wan grup, oli sidaon wanples. Olsem nao, ol elda wanwan oli save seraotem ol man long prapa grup blong olgeta, bifo we oli finisim miting blong prij wetem wan prea.—Yu lukluk bokis ya “?Yu Yu Wantem Blong Oli Yusum Haos Blong Yu?”

5. Nating se yumi no moa gat Buk Stadi Blong Kongregesen, ?yumi save sua fulwan long wanem samting?

⁵ Nating se yumi no moa gat Buk Stadi Blong Kongregesen, be Jehova i gohed blong givim evri samting we yumi nidim blong mekem wok blong hem. (Hib. 13:20, 21) God i lukaotgud long yumi, taswe yumi no sot long wan samting. (Sam 23:1) I gat plante blesing we yumi save kasem long grup blong wok blong prij. Sipos yumi no wet, be yumi joen oltaem wetem grup blong yumi, bambae yumi “kasem plante” blesing.—2 Kor. 9:6.

[Bokis blong pija long pej 6]

?Yu Yu Wantem Blong Oli Yusum Haos Blong Yu?

Long sam kongregesen, moa long wan grup blong wok blong prij i joen wanples long wiken blong mekem miting blong prij. Hemia from we oli no gat ples blong mit long hem. Ol miting blong wok blong prij oli ol narafala haf blong ol wok blong kongregesen, taswe i wan blesing long samfala we miting ya i stap long haos blong olgeta. ?Yu yu wantem blong oli yusum haos blong yu? Yu no mas wari se haos blong yu i no naes tumas. Ol elda bambae oli tingbaot ples we yu stap long hem mo sam narafala samting olsem, sem mak olsem taem oli jusum wan ples we buk stadi i stap long hem. Sipos yu wantem se oli yusum haos blong yu, i gud yu talem long elda we i lukaot long grup blong yu.