Faef Rod Blong Faenem Wan Baebol Stadi
1. ?Sipos i had blong faenem wan Baebol stadi long ples blong yumi, yumi mas mekem wanem, mo from wanem?
1 ?Yu yu harem se i had blong faenem wan man we yu save stadi Baebol wetem hem? Yu mas gohed blong traehad. Jehova i blesem olgeta we oli no slak blong mekem wok blong hem. (Gal. 6:9) Ol haf we oli kam biaen, oli soemaot faef samting we i save givhan long yu.
2. ?Yumi save mekem wanem blong askem stret long man sipos hem i wantem stadi long Baebol?
2 Yu Askem Stret Long Man: Plante man oli save se yumi stap seremaot ol Wajtaoa mo Wekap!, be maet oli no save se yumi stap mekem Baebol stadi tu wetem ol man. Taem yumi prij long ol haos wanwan, i gud blong askem stret long man sipos hem i wantem stadi long Baebol. Yu save askem tu long ol man we yu stap visitim, sipos oli wantem stadi long Baebol. Sipos oli no wantem, yu save gohed blong givim ol magasin long olgeta, mo yu givhan long olgeta blong oli wantem save moa. Plante yia finis, wan brata i mekem rod magasin long wan man mo woman blong hem. Wan dei, brata ya i go givim ol niufala magasin long tufala, mo taem hem i wantem aot, wan tingting i kasem hem, nao i askem long tufala se: “?Yutufala i wantem stadi long Baebol?” Brata ya i sapraes bigwan taem tufala i talem yes. Naoia, tufala i baptaes finis.
3. ?I stret blong ting se evri man we i stap kam long ol miting, oli stadi Baebol finis wetem wan Witnes? Yu eksplenem.
3 Ol Man We Oli Stap Kam Long Miting: Yu no mas ting se ol niuwan we oli kam long ol miting, olgeta evriwan oli stadi Baebol finis. Wan brata i talem se: “Bighaf blong ol stadi blong mi, hemia olgeta we mi mitim olgeta long ol miting.” Wan sista i storian wetem wan woman we i stap semsem. Ol gel blong woman ya oli Witnes. Woman ya i stap kam long ol miting klosap 15 yia finis, mo oltaem hem i kam long Haos Kingdom long stret taem we miting i stat, mo i aot jes afta we miting i finis. Woman ya i glad blong stadi long Baebol mo biaen hem i kam long trutok. Sista ya i talem se: “!Mi sore we mi wet 15 yia blong askem long hem sipos hem i wantem stadi Baebol!”
4. ?Wanem wan narafala rod blong faenem stadi?
4 Yu Askem Long Baebol Studen Sipos Hem i Save Samfala We i Wantem Stadi: Wan sista i glad tumas blong folem ol narafala pablisa taem oli go blong mekem Baebol stadi blong olgeta. Long en blong stadi, hem i askem long studen sipos hem i save samfala we i wantem stadi. Be fastaem, sista ya i askem long tija blong studen ya sipos i oraet blong hem i askem kwestin ya long studen. Taem yu givim buk ya Baebol Tijim long wan man we yu stap visitim, maet yu save askem se: “?Yu yu save sam man we oli glad blong kasem wan buk olsem tu?” Samtaem, sam samting i blokem ol pablisa mo ol paenia blong oli mekem stadi blong man. Taswe, yu mas mekem ol narafala oli save se yu yu rere blong mekem wan Baebol stadi.
5. ?From wanem i gud we yumi askem long man no woman blong wan Witnes, sipos hem i wantem stadi long Baebol?
5 Man No Woman Blong Wan Witnes: Long kongregesen blong yu, ?i gat ol pablisa we man no woman blong olgeta i no Witnes? Samfala oli no laekem we man no woman blong olgeta we i Witnes, i tokbaot Baebol long olgeta. Be oli glad sipos wan narafala i stadi wetem olgeta. Plante taem, i gud blong storian wetem brata no sista fastaem, bifo we yumi toktok wetem man no woman blong hem we i no Witnes.
6. ?Taem yu traehad blong faenem wan Baebol stadi, prea i givhan olsem wanem?
6 Prea: Yu no mas ting se prea i no gat paoa. (Jem. 5:16) Jehova i promes blong lesin long ol prea blong yumi taem oli laenap wetem tingting blong hem. (1 Jon 5:14) Wan brata we i bisi gud, i stat blong prea long Jehova blong i save gat wan Baebol stadi. Woman blong hem i no save sipos man blong hem bambae i gat inaf taem blong lukaotgud long wan stadi, speseli sipos stadi ya i gat plante problem. Ale, hem talemaot wari blong hem long Jehova, mo i prea tu blong man blong hem i save faenem wan stadi. Klosap tu wik biaen, tufala i kasem ansa blong prea blong tufala. Wan paenia long kongregesen blong tufala i faenem wan man we i wantem stadi, nao i askem long brata ya blong i mekem stadi blong man ya. Woman ya i raetem se: “Yufala we i harem se yufala i no save mekem wan Baebol stadi, from we yufala i ting se bambae yufala i no save lukaotgud long hem, mi mi wantem talem long yufala se: Sipos yufala i wantem gat wan Baebol stadi, yufala i mas talemaot long Jehova, mo yufala i mas prea oltaem long saed ya. Mitufala i harem gud bitim mak. Mi neva tingbaot se bambae mitufala i harem gud olsem.” Sipos yu gat longfala tingting, bambae yu tu yu save faenem wan Baebol stadi mo kasem glad ya taem yu givhan long hem blong i folem ‘rod we i blong go kasem laef.’—Mat. 7:13, 14.