Yumi Kasem Help
1 Jisas i rili intres long kongregesen blong hem, taswe “hem bambae i givhan long yumi, stret long taem we yumi trabol.” (Hib. 4:16) Long Efesas 4:8, 11, 12, Jeova i mekem promes blong givim “ol presen oli go nomo long ol man,” mo hem i putumap sam man blong mekem sam defren wok. Hemia nao bighaf blong help we Jeova i stap givim long yumi tede. Be long evri kongregesen wanwan, yumi gat wan blong ol presen ya, hemia elda we i lukaot long wok blong prij.
2 ?Be elda we i lukaot long wok blong prij i save givhan long yumi blong mekem wanem? Hem i save givhan long yumi long plante wei: 1) Fastaem, hem i wok had blong mekem se long tingting blong yumi, i impoten tumas we yumi prij mo yumi mekem ol disaepol. 2) Hem nao i lukaot long evri buk-stadi. Ol buk-stadi oli mas gohed gud, mo taem i gat miting blong prij, evri samting i mas stret gud nomo. 3) Hem i gat wok blong go luk olgeta pablisa wanwan blong save sipos oli nidim sam advaes blong kam sam minista we oli mekem gud wok mo oli gat gudhan.
Ol Visit Blong Elda We i Lukaot Long Wok Blong Prij
3 Taem yumi go long buk-stadi, yumi glad tumas from we long ples ya nao yumi stap kasem help. Be Jeova i stanemap sam narafala rod bakegen blong givhan long yumi wanwan. Plante taem, elda we i lukaot long wok blong prij i lidim wan buk-stadi tu, mo wan taem wan manis, hem i lego grup blong hem blong go joen wetem wan narafala grup. Elda ya bambae i jusum wan brata blong tekem ples blong hem taem we hem i no stap long grup blong hem. Longtaem bifo, hem i talemaot long narafala brata we i lukaot long buk-stadi we bambae hem i visitim buk-stadi blong hem, ale evriwan long buk-stadi oli save joen gud long spesel wik mo oli kasem plante blesing from.
4 Long taem blong spesel wik ya, stadi i gohed long 45 menet. Be long ol 15 menet we i stap, elda we i lukaot long wok blong prij i save mekem wan tok we i givhan long yumi blong kam gud moa long wok blong talemaot gud nyus. I impoten tumas we evri pablisa mo ol man we oli jes intres long trutok oli stap long naet ya.
5 Evri pablisa blong grup we i kasem visit blong elda we i lukaot long wok blong prij oli mas mekem plan blong joen bigwan long wok blong prij long wik ya, mo samting ya i tru moa long en blong wik. Sipos evri ting i oraet, ol elda oli save putumap sam miting blong go prij long aftenun. Taem wan elda we i lukaot long wok blong prij i mekem visit olsem, plan blong hem i blong prij wetem plante moa pablisa. Ating hem i save joen wetem samfala blong go mekem sam nyufala visit no sam Baebol-stadi. Sipos wan pablisa i nidim help no i wantem se elda we i lukaot long wok blong prij i leftemap tingting blong hem, hem i save go tokbaot bisnes ya long hem. Be moa yet, sipos yumi joen long ol miting blong prij we elda ya i lidim long spesel wik, bambae yumi save harem gud from ol gudfala advaes we hem i givim long taem ya.
6 Elda we i lukaot long wok blong prij i tektaem blong toktok wetem brata we i lukaot long buk-stadi we hem i visitim. Tufala i save tokbaot gudfala wok we olgeta long grup i mekem. Tufala i save tokbaot ol defren miting blong prij we grup ya i gat evri wik mo tufala i save luk sipos ol rod ya oli stret gud long evriwan. Sipos samfala oli nidim help no sam toktok blong givhan long olgeta blong joen oltaem long minista wok, elda we i lukaot long wok blong prij i save go toktok wetem olgeta. Long fasin we i kaen gud, hem i save talemaot sam advaes we oli save folem blong kam gud moa. Hem mo brata we i lukaot long buk-stadi, tufala i save mekem plan blong go visitim sam pablisa we oli no joen oltaem long wok blong prij. Tufala i save lukluk tu ol ripot blong ol Baebol stadi we grup i mekem. Tufala i save go mekem sam Baebol stadi wetem samfala mo sipos i gat nid, bambae tufala i givim sam gudfala advaes long ol.
7 Taem wan kongregesen i gat fulap buk-stadi, brata we i lukaot long wok blong prij i no gat tumas jans blong visitim oltaem ol defren grup ya. Taswe, taem hem i visitim wan grup, evriwan long grup ya oli mas traehad blong kasem sam blesing from visit blong hem. Taem brata ya i stap wetem yufala, i gud yufala i raetemdaon ol gudfala advaes we hem i givim long yufala blong mekem minista wok blong yufala i kam gud moa. Mo yufala i mas traehad blong mekem ol advaes ya oli wok long laef blong yufala bifo we hem i visitim yufala bakegen. Be, tru tumas, yufala i save askem help blong brata ya taem yufala i gat nid. Sipos long wan kongregesen i no gat tumas buk-stadi, elda we i lukaot long wok blong prij i mas traehad blong visitim olgeta grup wanwan evri 6 manis.
8 Sipos yumi joen oltaem wetem elda we i lukaot long wok blong prij mo yumi sapotem oltaem ol visit we hem i mekem long buk-stadi blong yumi, samting ya i save givhan long yumi blong kam sam man we i naf gud blong mekem wok we Jeova i askem long yumi. Bambae yumi naf blong mekem disaepol mo bambae yumi glad nomo blong mekem minista wok blong yumi.