Luksave Mining Blong Ol Samting We Oli Stap Kamaot Naoia
1 “Fasin blong wol ya i stap jenis.” (1 Korin 7:31, NW) Samting ya i klia taem yumi luk ol samting we oli stap kamaot kwiktaem nomo tede, olsem insaed long ogenaesesen blong Jeova tu. ?Wanem mining blong ol samting ya long yu?—Luk 21:28.
2 Ol profet tok blong Baebol oli stap kamtru tede long taem blong yumi. Samting ya i makem i klia se olgeta rabis fasin blong wol ya kolosap bambae oli lus. (Mat. 24:3-14; Luk 21:7-11) Jisas i talem se: “Tru mi talem long yufala, ol man we oli stap laef [long taem ya, NW] bambae oli no save ded evriwan, gogo olgeta samting ya bambae oli kamtru.” (Luk 21:32) ?Yu yu luksave mining blong samting ya, long ol man long teritori blong yu we oli no stap yet long saed blong Jeova? Sipos yes, ?yu yu tingting olsem wanem long wok blong prij?—Luk 21:34-36.
3 Halpem Ol Narafala Man Taem i Gat Taem Yet: Jisas i pulum ol disaepol blong hem blong tekem olgeta jans blong talemaot gud nyus. (Jon 9:4) Aposol Pol i talem bakegen tok ya taem hem i pulum ol brata blong Kolosi, i se: “Long ol fasin ya we yufala i stap mekem long fes blong ol man we oli no bilif long Kraes, yufala i mas waes gud. Mo yufala i mas yusumgud ol jans we bambae yufala i gat, blong yufala i tok long olgeta.”—Kol. 4:5.
4 I gat sam man we oli harem tok ya blong aposol nao oli yusum jans ya blong oli mekem fultaem paenia. Plante yangfala oli mekem wok blong fultaem paenia taem oli skul yet mo oli kasem gudfala frut long wok ya. Ol yangfala long skul oli save yusum gud jans ya blong halpem ol fren long skul blong luksave mining blong ol samting we oli stap kamaot tede mo blong gat hop long fyuja aninit long Kingdom blong God.—Ekles. 12:1.
5 Long Oktoba yumi save yusum gud taem blong yumi long wok blong prij taem yumi givimaot magasin ya Wekap! long olgeta jans we yumi gat. Magasin ya i givim mining blong ol samting we oli stap kamaot naoia. Soemaot long olgeta man we oli intres taem yu go long ol haos wanwan. Tekem jans blong soemaot long ol skul fren blong yu no long ol man we yu wok wetem olgeta. Tokbaot ol haf we maet ol man we yu save olgeta oli intres long hem. Hemia eksampel, long Oktoba 8, 1991, Wekap! i tokbaot fasin ya blong spolem pikinini. Plante man oli intres long haf ya.
6 ?Olsem wanem blong yusum Stampa Tok Blong Prij? Maet afta we yu talem nem blong yu, yu save askem man blong haos se: “?From wanem yumi stap kasem plante hadtaem tede?” Afta we hem i ansa, yu save talem se: “Baebol i talem se plante man oli ting se laef i blong nating nomo mo i had. Yu save luk long Eklesiastis 2:17. [Ridim.] ?Yu ting se i tru? [Letem hem i ansa.] ?Long tingting blong yu, wanem samting i save leftemap tingting blong man we i kasem plante trabol? [Letem hem i toktok.] Long ples ya Baebol i givim gudfala tingting long yumi long laef. [Ridim Sam 37:39, 40.] From samting ya ol Wetnes blong Jeova oli stap leftemap tingting blong ol man blong save Baebol. Eksampel: tingbaot fasin ya we nyufala Wekap! magasin i tokbaot.” Nao yu save mekem wan sabskripsen long magasin ya.
7 I tru, naoia i gudfala taem blong mekem wok blong Jeova. Ating samting ya i save pusum yumi blong tekem olgeta jans long manis ya blong givhan long ol man we oli intres blong save mining blong ol samting we i stap kamaot naoia.