Yusum Ol Nius Blong Pulum Intres
1 ?Yu yu wantem gat ol gudfala rod we bambae oli mekem se long wok blong prij, oltaem yu gat ol niufala fastok mo yu naf oltaem blong pulum intres blong ol man i go long mesej blong Baebol? Ale, yusum ol samting we oli stap hapen olbaot long wol mo raonabaot long ples blong yu blong statem storian wetem ol man. Ol samting ya oli stap jenis oltaem. (1 Kor. 7:31) Tingbaot sam eksampol.
2 Ol laswan lokol mo wol nius: Problem blong ekonomi mo praes blong ol samting i kam antap, hemia wari blong plante man. Taswe, maet yu save talem se:
◼ “?Yu harem long nius se praes blong [talem nem blong samting ya] i go antap bakegen?” No sipos wan bigfala kampani i sakemaot plante wokman blong hem, maet yu save tokbaot problem ya blong no gat wok. I dipen long wanem we yu wantem talem long storian blong yu, be maet yu save askem ol kwestin olsem se “?Yu yu tingbaot finis se, from wanem i hadwok tumas blong kasem mane we yumi nidim blong laef?” no “?Yu ting se bambae i hadwok oltaem blong kasem ol samting blong laef?”
3 Ol ripot blong raf fasin, olsem ol trabol we oli kamaot insaed long famle no bitwin ol studen long skul, i wan gudfala rod blong statem storian. Yu save askem se:
◼ “?Yu ridim stori long niuspepa we i tokbaot [talem trabol we i bin hapen long komuniti]?” Ale, askem wan long tufala kwestin ya “?Yu ting se wanem samting nao i stamba blong ol raf fasin long wol?” no “?Yu ting se wan dei bambae yumi save harem se yumi sef gud?”
4 Wol nius: Ol nius long saed blong wota we i ron bigwan, graon i seksek, no ol faet bitwin ol man blong wan kantri long ol defren ples long wol, hemia tu ol gudfala rod blong yusum blong pulum intres blong man. Eksampol, maet yu askem olsem se:
◼ “?Yu ting se God nao i stamba blong [talem nem blong disasta] we i kamaot?” No maet yu tokbaot wan trabol we i kamaot bitwin ol man blong wan kantri mo yu talem se: “?Sipos evri man i wantem pis, from wanem i hadwok tumas blong kasem pis ya?”
5 Lesingud long olgeta laswan nius we yu save yusum long fastok blong yu. Yu save faenem sam narafala gudfala rod blong yusum, long pej 10- 11 long Reasoning buk, aninit long haf ya “Current Events,” (long Inglis). Be, lukaot se long toktok blong yu, yu no tekem saed blong politik no ol bisnes we ol grup blong man oli traem stretem. I moagud blong pulum tingting blong man i go long Baebol mo Kingdom blong God olsem wan rod nomo blong winim ol problem blong man blong olwe.