Gobak Long Ol Man We Oli Soem Intres
1 Plante blong yumi oli bin seremaot plante buklet mo magasin. I impoten se yumi gobak mo traem blong mekem intres i gru moa. Gudfala frut we i save kamaot from, i dipen long fasin blong yumi blong reregud bifo yumi mekem visit bakegen.
2 Tingbaot se bighaf blong ol yangfala oli wari long ol semfala samting we ol bigman oli intres long hem. I gat sam atikol long tufala Wekap! blong Mei we oli lukluk long sam problem we oli hapen tede long sem fasin we ol yangfala oli stap lukluk olgeta. Ol atikol ya oli givim sam poen we oli save halpem ol yangfala, mo ol papa mama tu, blong luksave wanem samting oli rili impoten long laef.
3 Sipos yu bin seremaot “Wekap!” blong Mei 8 (Engglis no Franis), maet yu save plan blong gobak mo givim “Wekap!” blong Mei 22 (E. no F.). Yu save talem se:
◼ “Lasfala magasin we mi bin livim wetem yu i tokbaot ol atikol long saed blong hop blong ol pikinini. Ol yangfala blong yumi oli mas gruap long wan wol we i givim smol hop nomo long fyuja. Plante long olgeta oli mekem ol stronghed fasin blong soemaot kros blong olgeta. Be i gat samfala we oli holemtaet stret tingting mo ol gudfala fasin. Atikol ya long Wekap! we i jes kamaot i eksplenem olsem wanem wan hae kot i sapotem disisin blong wan yangfala. Mi ting se bambae yu laekem store ya.”
4 Maet yu gat tingting blong seremaot wan buklet taem yu yusum fastok ya:
◼ “Mi glad long smol storeyan blong yumitu lastaem long saed blong fyuja blong wol ya. ?Long tingting blong yu, laef bambae i olsem wanem taem God bambae i finisim ol fasin nogud mo ol trabol? [Soem pija long pej 31 blong buklet ya What Is The Purpose of Life—How Can You Find It?] Traem lukluk ol vas blong Baebol we oli stap long pej 29 mo 30 we oli soemaot ol blesing we Kingdom blong God bambae i karem. [Jusum wan vas, mo ridim stret long buklet.] Mi glad blong livim smol buklet ya wetem yu long wan smol praes blong 40 VT.”
5 Taem yu gobak, maet bambae yu lanem se man blong haos i gat ol buk blong skul blong hem mo hem i harem se i no nidim moa. Yu save talem se:
◼ “Nating se yumi folem wan skul, yumi evriwan i wari long ol samting olsem—raf fasin, ol bigfala sik, fasin blong spolem ol samting raonabaot long yumi we yumi nidim blong stap laef—?i tru? [Wet long ansa.] ?Yu ting se i gat wan trufala ansa long ol problem ya? [Ridim 2 Pita 3:13.] Plan blong ol buk blong mifala i stap long pej 2 blong Wajtaoa. [Ridim wan no tu sentens we yu jusum.] Plante man we oli no Wetnes blong Jeova oli laekem blong ridim ol buk blong mifala from mesej we i stap insaed long olgeta we i stanap long Baebol i givim hop.” Yu no fraet blong askem man blong mekem sabskripsen.
6 Maet yu yusum fastok ya:
◼ “Lastaem we mi bin kam, yumi tokbaot fyuja blong wol blong yumi. ?Wanem tingting blong yu long ripot ya? [Talem sam nyus we oli jes kamaot we ol man oli wari long hem.] Taem ol man oli harem ol samting olsem, oli wari se wol ya bambae i kam olsem wanem, ?i tru? Mifala i bilif se ol samting olsem oli soem se yumi stap laef long ‘ol lasdei’ we Baebol i tokbaot long 2 Timote 3:1-5.” Afta we yu ridim ol bigfala poen long ol vas ya, yu save askem long man ya sipos hem i save sam man we vas ya i stret long olgeta. Gohed blong storeyan long wan long ol smol stampa tok long pej 234-238 (F. 89-93) long Reasoning buk.
7 Sipos yumi reregud mo soem tru se yumi wantem givhan, yumi save sua se ol man we hat blong olgeta i stret bambae oli lesin.—Jon 10:27, 28.