Visitim Bakegen Ol Man We Yu Seremaot Magasin Mo Buklet Long Olgeta
1 Jisas i leftemap tingting blong ol man we oli folem hem blong wok blong mekem ol disaepol. (Mat. 28:19) Samting ya i minim moa bitim we yumi jes seremaot ol buk nomo; yumi wantem halpem ol man blong gohed long saed blong speret. Blong mekem olsem, yumi mas gobak blong givhan moa long olgeta we oli soem intres.
2 Sipos yumi bin tokbaot wan poen long wan magasin long fastaem we yumi toktok wetem man, i gud blong tokbaot sem poen taem yumi gobak:
◼ “Taem mi visitim yu lastaem, mi bin pulum tingting blong yu long wan atikol long Wajtaoa (no Wekap!) we i givhan long yumi blong luksave from wanem yumi nidim blong lukluk moa long Baebol. Stampa tingting blong God long saed blong wan gudfala fyuja blong ol man i stanap long Kingdom gavman blong hem. Maeka 4:3, 4 i tokbaot promes blong hem se bambae Kingdom ya i finisim olgeta faet.” Afta we yu ridim vas ya, soem buklet ya “Look!,” mo soem pija we i stap long faswan pej blong hem. Tokbaot faswan paragraf mo ol vas blong Baebol we i stap long hem, makem se Maeka 4:3, 4 i wan long olgeta. Mekem plan blong visit bakegen blong gohed blong storeyan long paragraf 2.
3 Sipos man blong haos i no gat taem blong storeyan, maet yu save mekem disisen blong raetem nem blong hem long lis blong rod blong magasin blong yu:
◼ “From we yu soem intres long ol magasin we mi bin livim wetem yu lastaem, mi ting se bambae yu glad blong kasem ol nyuwan we oli jes kamaot. Mi bilif se bambae yu faenem atikol ya i intres tumas long yu.” Soemaot wan atikol we yu ting se i stret long hem. Askem blong gobak wetem ol nekis magasin.
4 Mekem sabskripsen:
◼ “From i luk olsem se yu laekem Wajtaoa, mi bin glad blong stap karem ol nyuwan oli kam taem oli kamaot. Sipos yu laekem, mi save mekem plan blong sanem Wajtaoa long yu evritaem we i gat nyuwan i kamaot long pos ofis bokis blong yu, blong bambae yu no mestem wan namba blong hem.” Sipos hem i wantem wan sabskripsen, yu save fulumap wan fom mo eksplenem se bambae hem i kasem nekis namba blong magasin i no longtaem.
5 Sipos yu seremaot wan buklet be yu no gat jans blong soem olsem wanem blong mekem stadi long hem, mekem plan blong mekem samting ya long nekis visit.
Eksampel, sipos yu bin livim buklet ya “Gavman,” askem man blong haos blong karem buklet blong hem mo talem se:
◼ “Makem long ples ya long pej 3 wanem i talem long yumi long saed blong stampa mesej we Jisas i bin stap talemaot taem hem i stap long wol.” Nao ridim faswan paragraf. Nao blong smoltaem tokbaot ol save we oli stap long pej 3. Askem man blong haos wanem hem i ting se i mas mekem blong kasem moa save. Afta, talem se: “I impoten we yumi luksave from wanem yumi nidim bigwan Kingdom blong God. Mi glad blong kambak mo tokbaot from wanem yumi mas lukluk i go long gavman blong God olsem wan hop ya nomo we yumi gat.”
6 Yumi gat plante defren buklet. Makem ol poen we oli save pulum intres blong man long wan we yu gat plan blong yusum. Bambae samting ya i halpem yu blong leftemap tingting blong ol man we hat blong olgeta i stret, blong kasem save moa long ol samting we Jisas i talem long yumi blong mekem.—Mat. 28:20.