Yumi Prij Long Wan Wol We i Stap Jenis Oltaem
1 !Ol samting oli save jenis kwiktaem nomo! Long wan naet nomo, wan disasta i save hapen, i save gat bigfala trabol long ekonomi blong kantri, no long saed blong politik, no wan narafala trabol bakegen i save hapen. Ol samting ya oli save kam olsem bigfala toktok long eria blong yumi. Bambae ol man oli tokbaot samting ya gogo wan niufala samting i hapen, ale kwiktaem nomo oli jenisim storian blong olgeta. (Wok 17:21; 1 Kor. 7:31) Yes wol ya i stap jenis oltaem nomo. ?Taswe olsem wanem yumi save pulum intres blong man i go long gud nius blong Kingdom?
2 Luksave Wanem Wari i Stap Long Tingting Blong Man: Wan rod blong pulum intres blong ol man hemia blong tokbaot ol nius we oli stap hapen. Taem Jisas i wantem pulum ol man we oli lesin long hem blong oli tinghevi long fasin fren blong olgeta wetem God, hem i tokbaot wan trabol we i jes hapen mo we i stap long tingting blong olgeta long taem ya. (Luk 13:1-5) Long sem fasin, taem yumi talemaot gud nius, yumi save tokbaot sam nius we oli jes hapen no sam problem we i stap afektem laef blong ol manples blong yumi. Be taem yumi mekem olsem, yumi mas lukaot we long toktok blong yumi, yumi no sapotem wan saed blong ol bisnes blong politik no wan grup blong man agensem narawan.—Jon 17:6.
3 ?Olsem wanem blong save samting we i stap long tingting blong man long taem we yumi go prij? Ating beswan rod hemia blong askem kwestin nomo, mo lesingud. (Mat. 12:34) Sipos yumi intres long ol man bambae yumi luksave tingting blong olgeta mo, wetem waes fasin, bambae yumi traem save moa. Wan tok we man i talemaot, nating sipos hem i sot nomo, be i naf blong soem wari blong hem. Ale, maet bambae samting ya i openem rod blong prij long hem.
4 Rerem Wan Fastok: Buk ya Reasoning i save givhan bigwan long yumi taem yumi stap rere blong go prij long wol ya we i stap jenis oltaem. Long pej 10-11 blong buk ya, lukluk ol fastok we oli stap aninit long tufala tok ya “Crime/Safety” mo “Current Events” (Franis hemia “ Actualité ” mo “ Crime/Sécurité ” long pej 9 mo 11). I gat sam gudfala advaes we yumi save folem blong joenem nius blong wol i go insaed long toktok blong yumi. Yu save faenem moa advaes long Kingdom Wok Blong Yumi, Septemba 2000, pej 4. Taem yu rerem fastok we bambae yu yusum, meksua se yu jusum wan vas we i laenap gud wetem samting we yu talem.
5 Taem yumi luksave wanem ol defdefren wari we ol man oli gat long teritori blong yumi, yumi mas jenisim toktok we yumi yusum blong talemaot gud nius mo mekem i laenap wetem ol wari ya. Long rod ya, bambae yumi tokbaot samting we ol man wanwan oli harem se i impoten long laef blong olgeta. Ale, bambae yumi halpem plante moa man blong oli save God Jeova we ol fasin mo rul blong hem oli no stap jenjenis oltaem.—Jem. 1:17.