?Yu Yu Stap Mekem Ol Man Oli Tingtinggud Long Ol Vas Blong Baebol?
1 Wan soldia we i gat ekspiryens we i stap go long faet bambae i karem ol tul blong faet mo samting blong blokem hem. Wan man we i gat gud han blong bildim haos we i rere blong wok long wan bigfala haos bambae hem i karem olgeta tul we hem i nidim blong finisim wok ya. Wan man blong wok blong Jeova we i stap prij bambae hem i karem “naef blong faet” blong hem mo yusumgud long ol jans we hem i gat. (Efes. 6:17) ?Samting ya i tru long saed blong yu? Taem yu joen long wok blong prij, ?yu letem Tok blong God i tok blong mekem se tabu speret i openem hat blong ol man we oli stap lesin long yu?—Prov. 8:1, 6.
2 Wok blong prij i no oltaem wan isi wok. Long sam teritori ol man oli no stap oltaem long haos, mo plante taem olgeta we yumi faenem oli bisi oltaem, yumi gat smol jans nomo blong storeyan long Baebol. Be from we Baebol i stampa buk we yumi yusum, ?olsem wanem yumi save yusum moa long wok blong prij mo letem ol tok blong hem we oli kamaot from tabu speret i pulum ol man we oli lesin long yumi?
3 Long Olgeta Jans: Long evri doa, yumi wantem yusum Baebol blong pulum tingting blong man blong haos. Yumi mas rere blong mekem samting ya nomata wanem buk we yumi stap seremaot. Sipos man i bisi mo i no gat inaf taem blong openem Baebol mo ridim wan no tu vas long hem, ?yu save talem wan vas no talem ol poen long wan vas bifo yu askem man blong karem buk? Samting ya nomo i save mekem man i stap kwaet mo lesin.—Hib. 4:12.
4 Eksampel, sipos yu stap seremaot Wekap! blong Desemba 8, 1993, we haf ya “Wan Wol We i No Gat Sik” i stap long hem, afta we yu soem pija we i stap long skin blong magasin ya askem kwestin se, “?Yu bilif se wan dei bambae ol sik oli finis, wan taem we evriwan bambae oli glad long gud helt?” I nating wanem ansa man blong haos i givim, maet yu save ridim stret long Baebol blong yu, no talem ol poen long wan vas, olsem Aesea 33:24 no Revelesen 21:4. Long rod ya yu letem Tok blong God i mekem toktok.
5 Long Ol Visit Bakegen: Yumi mas rere bifo yumi mekem visit bakegen. Be, plante taem, poen we yumi no rere long hem blong tokbaot i save kamaot. Hemia nao taem we buk Reasoning From the Scriptures i save kam wan nambawan tul blong yusum. Taem yumi talem no ridim sam vas we i sapotem tok blong yumi we i kamaot long Reasoning buk bambae samting ya i halpem ol man blong luksave se yumi ol minista blong God mo yumi no man blong salem Tok blong God.—2 Kor. 2:17.
6 Taem yumi gobak long ol man we yumi no bin tokbaot wan stret poen wetem olgeta, maet yu jes openem Reasoning buk long wan poen we yu ting se i gud, olsem “Jisas Kraes,” “Lasdei,” no “Laef Bakegen,” mo yusum wan long ol smol stampa tok blong statem storeyan. Yu save askem ol man blong haos blong ridim sam vas long prapa Baebol blong olgeta. Long rod ya bambae Baebol i gat moa mining long olgeta, mo bambae tabu speret blong Jeova i wok sipos oli laekem stret fasin.
7 Responsabiliti we yumi gat blong talemaot gud nyus mo givim woning long ol rabis man i wan samting we i impoten tumas. Hem i mesej blong Jeova, i no blong yumi. Letem Tok blong Hem, naef blong faet blong speret i halpem yu.