Naoia i Taem
1 Taem aposol Pol i bin raetem seken leta blong hem long ol man Korin, hem i pulum tingting blong olgeta se oli bin mekem disisen blong sakem kleksin blong givhan long ol brata blong olgeta we oli trabol long Jerusalem. Be, wan yia i pas nao, mo oli no finisim yet wok we oli bin statem. Taswe hem i talem long olgeta se: “Ale, yufala i gohed, yufala i finisim wok ya. I gud yufala i strong blong finisim, olsem we yufala i strong fastaem blong mekem plan blong hem.”—2 Kor. 8:11, The New English Bible.
2 Samtaem, yumi evriwan i bin putum wan mak blong yumi wanwan. Maet yumi mekem disisen blong joen moa long wok blong prij, blong save moa ol brata blong yumi, blong kam naf blong mekem wan spesel wok, no blong winim wan nogud fasin. Nating se yumi stat wetem gudfala plan, maet yumi no moa stap traehad blong kasem mak blong yumi. Yumi no luksave se ol wik, ol manis, no maet ol yia oli pas finis be yumi no gohed nating. ?Yu ting se yumi nidim blong mekem advaes ya i wok long laef blong yumi wanwan se ‘gohed mo finisim’ wanem we yumi bin statem?
3 Kasem Ol Mak Blong Yumi: I isi blong putum wan mak be i had moa blong kasem mak ya. Tingting blong lego samting we yumi mas mekem i save mekem se yumi no gohed. Yumi nidim blong mekemap maen blong yumi, mo afta, yumi mas strong blong gohed we yumi no wet. I nidim we yumi wanwan i gat wan gudfala program. I impoten blong makemaot hamas taem yumi nidim blong mekem wok ya mo blong mekem sua se yumi yusum taem ya long rod ya nomo. I gud blong putum wan stret dei we yumi mas kasem mak ya long hem, mo wokem fasin ya blong stretem yumi wanwan blong mekem sua se yumi kasem mak ya long stret dei ya.
4 Taem yumi faenem i had blong kasem mak blong yumi, i isi nomo blong tingting se: ‘Bambae mi mekem afta.’ Be yumi no save wanem bambae i hapen long fyuja. Proveb 27:1 i talem se: “Yu no tok flas from samting we bambae yu mekem tumora, from we yu no save wanem samting bambae i kamaot long dei ya.” Disaepol Jemes i givim woning agensem fasin blong trastem yumi wanwan bitim mak long saed blong fyuja, from ‘yumi no save nating wanem bambae i kamtru long laef blong yumi tumora. . . . Man we i save wanem fasin i stret blong mekem, be i no mekem, hem i mekem sin.’—Jem. 4:13-17.
5 Plante samting we i pulum tingting blong yumi mo ol samting we ol narafala oli askem long yumi blong mekem, oli save mekem we ol mak blong yumi oli no moa klia. I nidim fasin traehad blong holem ol mak oli stap klia long tingting blong yumi oltaem. I givhan tu blong tingbaot bisnes ya long ol prea blong yumi oltaem. I save givhan bigwan blong askem ol narafala we yumi savegud olgeta blong mekem yumi tingbaot ol mak ya oltaem mo leftemap tingting blong yumi. Raetem wan not long kalenda blong yumi, samting ya i save mekem yumi tingbaot blong jekem fasin blong yumi blong gohed. Wan man i mas mekemap maen blong hem ‘blong mekem samting we hem i plan from long hat blong hem.’—2 Kor. 9:7.
6 Manis blong Oktoba i wan gudfala jans blong wok from ol mak blong yumi. Bambae yumi no fraet blong askem sabskripsen blong Wajtaoa mo Wekap! long faswan storeyan blong yumi. ?Yumi save putum sam mak we yumi naf blong kasem? Maet yumi save traem blong seremaot moa magasin no kasem wan no tu sabskripsen. Mekem disisen blong mekem moa visit bakegen mo blong statem wan nyufala Baebol stadi i save kam wan mak we plante oli naf blong kasem.
7 I no waes blong livim samting we i impoten i stap, from we ‘wol ya i stap lus.’ (1 Jon 2:17) Spesel wok mo blesing long wok blong Jeova oli rere blong yumi naoia. I stap long yumi blong haremgud long olgeta.