Ol Blesing We Oli Kamaot Taem Yumi Wok Wetem Ol Narafala
1 ?Yu yu harem se i save givhan long yumi taem yumi wok wetem ol narafala long minista wok? Jisas i bin harem olsem. Nating se i gat plante kakae long garen mo ol man blong wok oli smol nomo, hem i sanem 70 disaepol oli go “tutu” long garen. !I wan taem blong blesing we olgeta evriwan oli gat taem oli prij long “ol velej mo ol narafala ples we bambae i no longtaem, hem i save pas long olgeta”!—Luk 10:1, 17; Mat. 9:37.
2 Taem yumi wok wetem ol narafala, samting ya i mekem yumi haremgud. Sam long yumi oli sem mo oli faenem i had blong toktok long ol strenja. Taem yumi gat wan narafala man i stap kolosap long yumi i save mekem tingting blong yumi i strong moa blong talemaot Tok blong God we yumi no fraet. Taem yumi gat wan man wetem yumi, maet i isi long yumi blong mekem wok long fasin we oli trenem yumi long hem. (Prov. 27:17) Wan waes man i talem se: “Tu oli moa gud bitim wan.”—Ekles. 4:9.
3 I gud blong wok wetem ol defren pablisa mo paenia. Ol fren blong Pol we oli wok wetem hem i gat, Banabas, Saelas, Timote, mo Jon Mak, mo oli haremgud long plante blesing taem oli prij tugeta. Sem samting i save tru tede. ?Yu yu bin wok wetem wan narafala we i bin stap long trutok longtaem finis? Afta we yu lukluk gud fasin blong hem blong prij, ating yu bin kasem sam gudfala tingting we oli bin halpem yu blong kamgud moa. ?Yu yu bin prij wetem ol nyufala pablisa? Ale maet yu bin serem sam samting we yu lanem finis mo maet samting ya i bin halpem olgeta blong kamgud moa mo blong kasem moa glad long minista wok blong olgeta.
4 ?Yu yu stap mekem wan Baebol stadi naoia? Sipos yes, i gud blong askem wan long ol elda no seket elda blong go wetem yu long stadi ya. Ol Baebol studen blong yumi bambae oli kasem gudfala samting taem oli savegud ol elda blong yumi. Sipos yu fraet blong mekem stadi from elda i stap, maet hem i glad blong mekem mo letem yu yu lukluk. Afta, yu no mas fraet blong askem sam advaes long hem olsem wanem yu save halpem studen blong gohed moa kwik.
5 Yu mas wan fren we i leftemap tingting taem yu wok wetem ol narafala. Yu mas talem ol positif tok long saed blong teritori. Yu neva mas toktok blong daonem ol narafala no komplen long saed long ol plan blong kongregesen. Holem maen blong yu i stap long minista wok mo long ol blesing we Jeova i save givim. Sipos yu mekem olsem, bambae yu mo ol fren blong yu i gobak long haos we yufala i haremgud long saed blong speret.
6 Maet ol samting long laef blong yu oli save mekem i had long yu blong wok oltaem wetem ol narafala brata mo sista. Be, sipos i gat rod, mekem plan blong gat sam taem blong wok wetem wan narafala pablisa. !Yutufala tugeta i save kasem blesing from!—Rom 1:11, 12.