Ol Rod Blong Talemaot Gud Nius

JISAS i wok had blong talemaot gud nius. Hem i soemaot eksampol long ol man blong hem. Hem i no wet blong ol man oli kam long hem, be hem i go long haos blong olgeta mo long ol pablik ples, blong storian wetem olgeta mo blong tijim olgeta. (Mat. 9:35; 13:36; Luk 8:1) Jisas i toktok long ol man wanwan, mo i tijim ol disaepol blong hem taem olgeta nomo oli stap, mo i toktok long ol grup blong plante taosen man. (Mak 4:10-13; 6:35-44; Jon 3:2-21) Hem i tekem evri janis blong talem ol tok we i leftemap tingting blong ol man mo i pulum olgeta blong oli tingbaot wan laef we i moagud. (Luk 4:16-19) Nating se hem i taed mo i hanggri, be hem i no mestem wan janis blong prij. (Mak 6:30-34; Jon 4:4-34) Taem yumi ridim stori blong wok blong prij we Jisas i mekem, yumi harem olsem ol aposol we oli wantem folem eksampol blong hem.—Mat. 4:19, 20; Luk 5:27, 28; Jon 1:43-45.

² I gud yumi tingbaot ol rod we ol Kristin tede oli save folem, blong joen long wok ya we Jisas Kraes i statem klosap 2,000 yia bifo.

PRIJ LONG OL HAOS WANWAN

³ Ol Witnes blong Jehova oli luksave se taem oli talemaot gud nius blong Kingdom, i impoten blong folem wan gudfala plan blong prij long ol haos wanwan. From we oli yusum rod ya oltaem, ol man oli luksave olgeta kwiktaem nomo. Gudfala frut we i kamaot i soemaot se hemia wan gudfala rod blong talemaot gud nius long plante milian man long sot taem nomo. (Mat. 11:19; 24:14) I klia se, prij long ol haos wanwan i wan gudfala rod blong soemaot se yumi lavem Jehova mo ol man raonabaot long yumi.—Mat. 22:34-40.

⁴ I no naoia nomo we ol Witnes blong Jehova oli prij long ol haos wanwan. Aposol Pol i talem se hem i tijim ol man long haos blong olgeta. Hem i tokbaot wok blong prij long ol elda long Efesas, i se: “I stat long fas dei we mi putum leg long provins ya Esia, . . . taem mi stap tijim yufala . . . long ol haos wanwan, . . . mi mi no haedem wan samting nating we i save givhan long yufala.” Long fasin ya mo long plante narafala fasin, Pol i “eksplenem gud long ol man Jiu mo long ol man Gris se oli mas tanem tingting blong olgeta, oli kam long God, mo oli mas bilif long Jisas, Masta blong yumi.” (Wok 20:18, 20, 21) Long taem ya, ol hed gavman blong Rom oli pulum ol man blong oli wosipim aedol, mo oli “strong moa blong mekem wosip long ol god i bitim ol narafala man.” Taswe olgeta man oli mas hareap blong lukaot God ya we “i mekem wol ya, mo olgeta samting we oli stap long hem.” Hem nao “i stap talem long ol man long evri ples se oli mas tanem tingting blong olgeta.”—Wok 17:22-31.

⁵ Long taem blong yumi, i impoten moa blong talemaot gud nius long ol man, from we en blong rabis wol ya i stap kam kwik. Yumi luksave se i impoten, taswe yumi traehad blong prij moa. I no gat wan narafala rod we i gud moa i bitim rod ya we oli folem longtaem finis i kam, hemia blong prij long ol haos wanwan blong faenem ol man we oli hanggri from trutok. Tede rod ya i wok gud yet olsem long taem blong Jisas mo ol aposol.—Mak 13:10.

⁶ ?Olsem wanem? ?Yu yu joen fulwan long wok blong prij long ol haos wanwan? Sipos yes, yu save sua se Jehova i glad long yu. (Esik. 9:11; Wok 20:35) Maet yu harem se wok blong prij long ol haos wanwan i no isi. Maet bodi blong yu i no strong, o maet yu stap prij long teritori we ol man oli no wantem lesin. Maet gavman i putum tabu long sam wok blong yumi. Ating yu yu stap sem, mo i had blong yu statem wan storian wetem ol man we yu no save olgeta. Taswe, yu fraet taem yu prij long ol haos wanwan. Be yu no mas letem samting ya i blokem yu. (Eks. 4:10-12) Plante Kristin brata mo sista long ol narafala ples blong wol oli fesem semkaen trabol.

⁷ Jisas i promes long ol disaepol blong hem se: “!Luk! Mi mi stap wetem yufala oltaem, gogo kasem lashaf blong sistem blong wol.” (Mat. 28:20) Promes ya i mekem yumi strong blong gohed long wok blong mekem disaepol. Yumi gat tingting olsem aposol Pol, we i talem se: “Mi mi gat paoa blong fesem olgeta samting from God ya we i givim paoa long mi.” (Fil. 4:13) Yu mas joen fulwan long plan blong kongregesen blong go prij long ol haos wanwan. Taem yu prij wetem ol narafala, oli leftemap tingting blong yu mo oli givhan long yu. Yu mas prea long Jehova blong i givhan long yu blong yu no fraet taem yu kasem trabol long wok blong prij, mo gohed strong blong talemaot gud nius.—1 Jon 5:14.

⁸ Taem yu stap talemaot gud nius long ol narafala, bambae yu gat janis blong ansa long eni ‘kwestin long saed blong hop blong yu.’ (1 Pita 3:15) Bambae yu luksave se ol man we oli putum tingting blong olgeta long gudfala laef aninit long Kingdom, oli defren long ol man we oli no mekem olsem. (Aes. 65:13, 14) Bambae yu harem gud from we yu stap obei long tok blong Jisas blong ‘letem laet blong yu i saenaot.’ Mo maet bambae yu gat janis blong givhan long samfala blong oli save Jehova mo trutok ya we i save givim laef blong olwe.—Mat. 5:16; Jon 17:3; 1 Tim. 4:16.

⁹ Ol kongregesen oli mekem plan blong prij long ol haos wanwan long wiken mo long medel wik. Long sam ples we i no gat plante man i stap long haos long dei, kongregesen i mekem plan blong prij long sapa. Maet ol man oli glad moa blong storian long aftenun mo long sapa, i bitim long moning.

FAENEM OLGETA WE OLI WANTEM HAREM GUD NIUS

¹⁰ Jisas i talem long ol disaepol se oli mas “faenem” olgeta we oli wantem harem gud nius. (Mat. 10:11) I no long ol haos wanwan nomo we Jisas i faenem ol man we oli wantem lesin. Hem i tekem janis blong prij long evri ples. (Luk 8:1; Jon 4:7-15) Ol aposol tu oli prij long ol man long ol defdefren ples.—Wok 17:17; 28:16, 23, 30, 31.

¹¹ Tede tu, yumi wantem talemaot gud nius blong Kingdom long olgeta man. Taswe yumi folem fasin blong Jisas mo ol disaepol blong hem. Be yumi luksave se wol ya i stap jenis mo laef blong ol man tu i stap jenis. (1 Kor. 7:31) Naoia plante pablisa oli kasem gudfala frut taem oli prij long ol stoa mo ofis. Long plante kantri, ol Witnes oli luk se i gud blong prij long rod, long ol ples blong spel, ol ples blong paking, mo long ol narafala ples we i gat man. Sam kongregesen oli putum ol tebol mo ol troli long ol defren ples long teritori blong olgeta, blong soemaot ol buk blong yumi. Mo tu, maet branj ofis i askem long samfala long defdefren kongregesen blong oli mekem spesel wok blong prij long ol bigfala taon, long ol ples we i gat plante man i stap wokbaot i gokam. Olsem nao, ol man we oli no stap long haos, oli save harem gud nius long narafala ples.

¹² Taem yumi prij long pablik ples mo yumi faenem wan man we i intres, yumi save givim wan buk long hem. Blong mekem se hem i kasem save moa, maet yu givim nem mo namba blong telefon blong yu mo mekem plan blong go luk hem bakegen. Maet yu tokbaot jw.org long hem, o givim adres blong Haos Kingdom we i klosap long hem. Ating bambae yu harem gud blong traem niufala rod ya blong prij long pablik ples.

¹³ God i givim wok long ol Kristin blong oli talemaot gud nius long ol man. Be i no hemia nomo. Sipos yu wantem givhan long ol narafala blong oli bilif long trutok we i save givim laef long olgeta, yu mas gobak plante taem blong luk olgeta. Nao sloslo bambae oli gohed gogo oli kam bigman olsem Kraes.

OL VISIT

¹⁴ Jisas i talem long ol man blong hem se: ‘Bambae yufala i witnes blong mi gogo yufala i kasem olgeta ples long wol.’ (Wok 1:8) Mo hem i talem tu se: “Yufala i mas go long ol man long olgeta nesen, yufala i pulum olgeta oli kam disaepol blong mi. . . . Mo yufala i tijim olgeta blong oli folem olgeta tok ya we mi mi talem finis long yufala.” (Mat. 28:19, 20) Yumi kasem bigfala glad long wok blong Jehova, taem yumi gobak blong luk ol man we oli intres. Wan man we i laekem gud nius bambae i glad sipos yu gobak bakegen. Yu serem sam moa save blong Baebol wetem hem, nao bilif blong hem i kam strong, mo hem i luksave se hem i nidim God long laef blong hem. (Mat. 5:3) Sipos yu reregud fastaem mo yu gobak long wan taem we i stret long man ya, maet yu save statem wan Baebol stadi wetem hem. Taem yu mekem wan visit, yu mas traehad blong statem Baebol stadi. Yumi no planem sid blong trutok nomo, be yumi putum wota long hem tu.—1 Kor. 3:6.

¹⁵ Samfala oli faenem i had blong mekem ol visit. Ating yu save finis olsem wanem blong talemaot gud nius long man, mo yu harem gud blong prij. Be taem yu tingbaot se yu mas gobak blong storian moa long Baebol, maet yu harem se yu no naf. Sipos yu rere gud fastaem, mo folem gud ol advaes we yu kasem long miting blong medel wik, bambae yu no fraet. Yu save tekem wan narafala pablisa tu we i gat gudhan blong go wetem yu long ol visit.

OL BAEBOL STADI

¹⁶ Wan man blong prij long taem bifo, nem blong hem Filip, i storian wetem wan man Jiu we i stap ridim Baebol. Filip i askem long hem se: “?Yu yu kasemsave long samting we yu stap ridim?” Man ya i ansa se: “?Bambae mi mi save olsem wanem? I no gat man blong givhan long mi.” Ol Wok japta 8 i talem se Filip i yusum ol vas we man ya i stap ridim, blong “i talemaot gud nius blong Jisas long hem.” (Wok 8:26-36) Yumi no save sipos Filip i storian longtaem wetem man ya o olsem wanem. Be hem i eksplenem gud nius long fasin we i klia, nao man ya i bilif mo i wantem baptaes. Hem i kam wan disaepol blong Jisas Kraes.

¹⁷ Plante man tede oli no save gud Baebol. From samting ya, ating yu mas gobak plante taem mo stadi wetem man blong plante wik o manis, o ating bitim wan yia, blong hem i save bilif mo i kam naf blong baptaes. Be sipos yu soemaot longfala tingting mo lav taem yu givhan long man ya we hat blong hem i stret, blong hem i kam wan disaepol, bambae yu kasem bigfala glad. Jisas i talem se: “Man i harem gud moa taem hem i givim samting, i bitim we hem i kasem samting.”—Wok 20:35.

¹⁸ Taem yu yusum wan buk blong stadi, i isi moa blong mekem Baebol stadi long wan man. Sipos yu folem ol advaes we yu kasem long miting blong medel wik mo wok wetem ol gudfala tija long kongregesen, bambae yu naf blong mekem wan gudfala Baebol stadi mo givhan long man blong i kam disaepol blong Jisas Kraes.

¹⁹ Sipos yu nidim help blong statem mo lidim ol Baebol stadi, yu save askem long wan elda, o long wan narafala Witnes we i gat gudhan blong mekem ol stadi. Ol advaes long Kristin Wok Mo Laef—Buk Blong Miting we oli mekem pleplei long hem long miting ya, i save givhan long yu tu. Yu mas trastem Jehova, mo yu askem long hem blong i givhan long yu. (1 Jon 3:22) Yu mas traehad blong statem mo lidim wan Baebol stadi, antap long stadi we yu stap mekem wetem ol pikinini blong yu. Taem yu mekem ol Baebol stadi, yu kasem moa glad long wok blong prij.

LIDIM MAN I KAM LONG OGANAESESEN BLONG JEHOVA

²⁰ Taem yumi givhan long man blong i save Jehova mo i kam disaepol blong Jisas Kraes, hem i joen wetem kongregesen. Sipos hem i luksave oganaesesen blong Jehova mo i wok wetem oganaesesen ya, bambae hem i gohed gud mo i kam bigman long Kraes. I impoten we yumi tijim hem olsem wanem blong wok gud wetem oganaesesen blong Jehova. Yumi save yusum ol video mo buklet ya ?Hu i Stap Mekem Samting We Jehova i Wantem? Sam save long Japta 4 blong buk ya tu i save givhan long yumi.

²¹ Taem yu jes stat blong mekem stadi long man, yu givhan long hem blong i luksave se Jehova i stap yusum wan oganaesesen blong mekem wok blong prij long wol ya. Yu tokbaot ol buk blong stadi we yumi yusum, mo yu eksplenem se ol Witnes we oli givim laef blong olgeta i go long Jehova, oli printim mo givimaot ol buk ya fri nomo, long olgeta ples long wol. Yu talem long stadi ya blong i kam long miting long Haos Kingdom. Yu eksplenem ol miting long hem, mo yu tekem hem i goraon long ol brata mo sista blong sekhan long olgeta. Long ol asembli, yu tekem hem i go mitim sam narafala Witnes. Long ol taem olsem, yu givhan long hem blong i luksave olsem wanem ol man blong Jehova oli soemaot lav ya we i makemaot ol tru Kristin. (Jon 13:35) Taem man we i intres long trutok i kasem save long oganaesesen blong Jehova, bambae hem i kam klosap moa long Jehova.

OL BUK BLONG YUMI

²² Ol fas Kristin oli wok had blong raetemdaon Tok blong God. Oli mekem ol kopi blong Baebol, blong olgeta wanwan oli yusum, mo blong oli stadi long kongregesen. Oli pulum ol narafala blong oli ridim Tok blong God. Oli lukaot gud long ol kopi blong Baebol we oli raetem, from we i no gat plante. (Kol. 4:16; 2 Tim. 2:15; 3:14-17; 4:13; 1 Pita 1:1) Long taem blong yumi, ol Witnes blong Jehova oli yusum ol masin blong printim plante milian Baebol mo buk. Mo tu, oli printim ol traket, ol buklet, mo ol magasin, long plante handred lanwis.

²³ Taem yu stap talemaot gud nius long ol man, yu save yusum ol buk blong stadi we oganaesesen blong Jehova i wokem. Yu save finis olsem wanem ol buk blong ol Witnes blong Jehova oli givhan long yu taem yu ridim mo yu stadi long olgeta. Samting ya i save pusum yu blong yu wantem givimaot long ol narafala.—Hib. 13:15, 16.

²⁴ Naoia plante moa man oli stap yusum Intenet blong kasem save long ol samting. Taswe, antap long ol buk, websaet ya blong yumi jw.org, hem i wan gudfala tul blong talemaot gud nius. Ol man long olgeta ples long wol oli save yusum kompiuta blong ridim Baebol mo ol buk long plante handred lanwis, mo blong lesin long ol rikoding blong olgeta. Olgeta we oli fraet blong toktok long yumi o oli gat janis blong toktok sam samtaem nomo wetem ol Witnes, oli save faenemaot bilif blong yumi long websaet ya.

²⁵ Yumi tekem evri janis blong tokbaot websaet ya jw.org. Sipos wan man i wantem save bilif blong yumi, yumi save yusum mobaelfon o tablet blong soemaot websaet ya long hem. Sipos yumi mitim wan man we i toktok narafala lanwis, o saen lanwis, yumi save soemaot Baebol mo ol buk long lanwis blong hem long websaet ya. Plante pablisa oli yusum wan long ol video long jw.org blong statem wan storian long Baebol.

TEKEM JANIS BLONG PRIJ

²⁶ Jisas i talem long ol man we oli harem tok blong hem se: “Yufala i laet blong wol. . . . Yufala i mas letem laet blong yufala i saenaot i kasem ol man, blong oli save luk ol gudfala wok we yufala i mekem, nao oli save givim glori long Papa blong yufala we i stap long heven.” (Mat. 5:14-16) Ol disaepol ya oli folem tingting blong Jehova taem oli mekem olsem Jisas, we i talem se: “Mi mi laet blong wol.” Jisas i soemaot eksampol long olgeta Kristin taem hem i letem “laet ya we i save givim laef” i saenaot i kasem ol man we oli glad blong lesin long hem.—Jon 8:12.

²⁷ Aposol Pol tu i soemaot eksampol long yumi. (1 Kor. 4:16; 11:1) Taem hem i stap long Atens, hem i prij evri dei long ples blong maket. (Wok 17:17) Ol Kristin long Filipae oli folem eksampol blong Pol. Taswe, Pol i talem long olgeta se oli stap “saenaot olsem ol laet long wol,” long medel blong “ol man we oli rabis mo oli no stret.” (Fil. 2:15) Long taem blong yumi, ol toktok mo fasin we yumi mekem taem yumi tekem janis blong talemaot gud nius, oli save mekem trutok blong Kingdom i saenaot olsem laet. Yes, gudfala fasin blong yumi blong no giaman mo blong mekem i stret oltaem, i save mekem ol man oli luksave se yumi defren long ol man blong wol. Be sipos yumi talemaot gud nius long olgeta, bambae oli kasem save from wanem yumi defren.

²⁸ Plante man blong Jehova oli talemaot gud nius long ples blong wok, long skul, long bas o pablik transpot, mo long ol narafala ples we oli go long hem. Taem yumi stap long sip o plen, yumi save toktok long ol man we oli sidaon klosap long yumi. Yumi wanwan i mas lukaotem janis blong jenisim storian i go long trutok. Yumi mas rere oltaem blong talemaot gud nius long ol man.

²⁹ Sipos yumi tingbaot se yumi stap presem God mo leftemap nem blong hem, bambae yumi glad blong serem gud nius wetem olgeta man. Mo tu, maet yumi givhan long sam man we oli laekem trutok, blong oli save Jehova, nao olgeta tu oli save mekem wok blong hem. Mo oli save soemaot bilif long Jisas Kraes, we bambae i lidim olgeta blong kasem laef blong olwe. Jehova i glad long man we i traehad, mo hem i luk ol wok blong hem olsem tabu wok.—Hib. 12:28; Rev. 7:9, 10.

TERITORI BLONG PRIJ

³⁰ Jehova i wantem se yumi talemaot gud nius blong Kingdom long olgeta ples blong wol, long taon mo long vilej tu. Taswe, branj ofis i makemaot teritori blong ol kongregesen wanwan, mo blong ol pablisa we oli stap long ples we i no gat kongregesen. (1 Kor. 14:40) Hemia i klosap sem mak long plan we ol fas Kristin oli folem. (2 Kor. 10:13; Gal. 2:9) Long ol las dei ya, wok blong talemaot Kingdom i stap kam antap bigwan. Sipos yumi folem wan gudfala plan blong wok long ol teritori blong yumi, yumi save mekem bigfala wok.

³¹ Elda we i lukaot long wok blong prij i mekem ol plan blong wok long ol teritori. Be maet wan man blong givhan i givimaot ol teritori long ol pablisa. I gat tu kaen teritori, faswan i blong grup i prij long hem, mo narawan ol pablisa wanwan oli save wok long hem. Sipos i no gat plante teritori, ol elda we oli lukaot long ol grup bambae oli holem teritori we ol pablisa long grup blong olgeta oli save prij long hem. Be sipos i gat plante teritori, ol pablisa wanwan oli save askem wan teritori blong olgeta.

³² Pablisa we i gat prapa teritori blong hem, i save prij long teritori ya long ol dei we i no gat miting blong prij, o long taem we samting i blokem hem blong i no save go long miting blong prij. Sam pablisa oli askem wan teritori we i klosap long ples blong wok blong olgeta, nao oli prij taem oli spel long medel dei mo afta wok. Sam famle oli askem wan teritori we i klosap long haos blong olgeta, nao oli prij long sapa. Sipos pablisa i gat wan teritori we i no longwe, bambae hem i no lusum plante taem blong wokbaot i go long teritori, nao hem i save prij moa. Be wan grup i save prij long teritori blong wan pablisa tu. Sipos yu wantem wan teritori blong yu, yu save go luk brata we i lukaot long teritori.

³³ Elda we i askem teritori blong grup mo pablisa we i askem teritori blong hem wan, oli mas traehad blong faenem wan man long evri haos. Rod we oli yusum blong faenem ol man i mas laenap wetem ol loa we oli protektem raet blong man we oli prij long hem, blong i no givim save long saed blong hem wan long eni man. Elda we i tekem wan teritori blong grup o pablisa we i tekem wan teritori blong hem wan, oli mas traehad blong finisim teritori ya long fo manis. Taem oli finisim, oli mas talem long brata we i lukaot long teritori. Maet i stret blong elda we i lukaot long grup o pablisa we i tekem wan teritori blong hem wan, oli holem teritori ya mo mekem bakegen, sipos no oli save givimbak long brata we i lukaot long teritori.

³⁴ Sipos olgeta long kongregesen oli wok gud wanples, oli save finisim olgeta teritori blong kongregesen. Mo tu, ol pablisa bambae oli no pas tu taem long wan haos mo mekem ol man oli kros. Long rod ya, yumi soemaot se yumi tingbaot ol Kristin brata mo sista mo ol man long teritori tu.

PRIJ LONG OL MAN WE OLI TOKTOK NARAFALA LANWIS

³⁵ Olgeta man oli mas kasem save long Jehova God, Pikinini blong hem, mo Kingdom. (Rev. 14:6, 7) Yumi wantem givhan long ol man we oli toktok narafala lanwis, blong oli singaot long nem blong Jehova we i save sevem olgeta, mo blong oli folem ol Kristin fasin long laef blong olgeta. (Rom 10:12, 13; Kol. 3:10, 11) ?Wanem sam problem we oli kamaot taem yumi talemaot gud nius long ol ples we ol man oli toktok defdefren lanwis? ?Olsem wanem yumi save winim ol problem ya blong oli save harem gud nius blong Kingdom long prapa lanwis blong olgeta?—Rom 10:14.

³⁶ Oli makemaot teritori blong wan kongregesen folem lanwis blong kongregesen ya. Taswe sipos i gat wan eria we ol man oli toktok plante defren lanwis, ol pablisa blong ol defren kongregesen bambae oli prij long eria ya. Sipos i olsem, ol pablisa we oli toktok wan lanwis oli mas traem prij long ol man we oli toktok lanwis ya nomo. Bambae oli mekem sem mak taem oli singaot ol man oli kam long Memoriol mo long asembli evri yia. Be taem oli tekem janis blong prij o oli prij long pablik ples, oli save toktok long enikaen man mo soemaot ol buk long enikaen lanwis.

³⁷ Samtaem, i had blong wan kongregesen we i toktok narafala lanwis i go mekem teritori blong olgeta we i stap farawe, taswe ol elda we oli lukaot long wok blong prij long ol kongregesen ya oli mas toktok blong faenem rod we i stret long evri kongregesen. Olsem nao, olgeta man bambae oli gat janis blong harem gud nius blong Kingdom, mo bambae ol pablisa oli no pas tu taem long sem haos.—Prov. 15:22.

³⁸ Sipos yu stap prij nao man we i openem doa i toktok wan narafala lanwis, ?bambae yu mekem wanem? Yu no mas ting se i oraet nomo, ol pablisa we oli toktok lanwis ya bambae oli faenem hem. Sam pablisa oli lanem wan isi fastok long lanwis we plante man long teritori oli toktok long hem. Yumi save soemaot websaet ya jw.org, we hem i save ridim mo daonlodem ol buk long lanwis blong hem, o yumi talem se yumi glad blong karem wan buk long lanwis blong hem i kambak long hem.

³⁹ Sipos man ya i intres, yu mas traehad blong faenem wan brata o sista we i save givhan long hem long lanwis blong hem. Yu save talem long hem weples i gat ol miting long lanwis blong hem. Sipos hem i wantem se wan brata o sista we i toktok lanwis blong hem i kam luk hem, yu save soemaot long hem olsem wanem blong putum ol save ya i go long websaet ya jw.org. Nao branj ofis bambae i traem faenem wan pablisa, wan grup, o wan kongregesen we i save givhan long man ya.

⁴⁰ Yu mas gohed blong visitim man ya we i intres gogo wan brata o sista we i toktok lanwis blong hem i kam luk hem. Samtaem branj ofis bambae i talem long ol elda se oli no save faenem wan brata o sista we i toktok lanwis ya. Long taem olsem, yu mas mekem bes blong yu blong givhan long hem. I gud yu traem mekem Baebol stadi long hem, long wan buk long lanwis blong hem. Sipos yu soemaot ol pija mo yu askem long hem blong i ridim ol vas long Baebol, bambae hem i kasemsave sam samting. Maet wan famle blong hem i save tanem tok blong yu i go long lanwis blong hem.

⁴¹ Blong lidim man ya we i intres i kam long oganaesesen blong Jehova, yumi mas singaot hem i kam long miting, nating se i no long lanwis blong hem. Yumi givhan long hem blong i faenem ol vas long Baebol long lanwis blong hem. Taem hem i joen wetem ol narafala long kongregesen, hemia i save mekem se hem i kam strong mo i gohed gud.

⁴² Prigrup: Hemia i min se i gat sam pablisa we oli stap prij long wan lanwis we i no lanwis blong kongregesen, be i no gat wan elda o man blong givhan we i naf blong lidim wan miting evri wik. Branj ofis i save givim raet long kongregesen blong i gat wan prigrup, sipos:

1. (1) I gat plante man long eria we oli toktok narafala lanwis ya.

2. (2) I gat sam pablisa we oli save toktok lanwis ya o oli glad blong lanem.

3. (3) Ol elda oli glad blong lukaot long wok blong prij long lanwis ya.

Sipos ol elda oli wantem wan prigrup long kongregesen, bambae oli toktok wetem eria elda. Maet hem i save long sam narafala kongregesen we oli stap traehad blong prij long ol man we oli toktok sem lanwis ya, nao hemia i save givhan long hem blong i jusum weswan kongregesen i moagud blong lukaot long prigrup ya. Taem hem i jusum, ol elda bambae oli sanem wan leta long branj ofis blong askem sipos kongregesen blong olgeta i save lukaot long wan prigrup.

⁴³ Grup: Branj ofis i save givim raet long kongregesen blong i gat wan grup long narafala lanwis sipos:

1. (1) I gat naf man blong lanwis ya we oli intres, mo plante narafala long teritori we oli toktok lanwis ya.

2. (2) I gat sam pablisa we oli toktok lanwis ya o oli stap lanem.

3. (3) I gat wan elda o wan man blong givhan we i save lidim grup ya mo i save mekem miting wan taem evri wik, o wan haf blong miting olsem pablik tok o Wajtaoa Stadi, long lanwis ya.

Taem i gat trifala samting ya, ol elda oli save sanem leta long branj ofis blong tokbaot grup ya, mo oli save askem long branj ofis blong grup ya i stap long kongregesen blong olgeta. Elda o man blong givhan we i lukaot long grup ya, hem i “elda we i lidim grup” o “brata we i lidim grup.”

⁴⁴ Taem grup i stat, ol elda blong kongregesen we i lukaot long grup ya oli save mekem desisen sipos i stret blong grup ya i mekem sam narafala haf blong ol miting, mo hamas miting oli mekem evri manis. Grup ya i save joen wanples blong mekem miting blong prij tu. Olgeta long grup ya oli wok folem plan blong ol elda long kongregesen we grup ya i stap long hem. Ol elda ya oli mas skelemgud ol samting blong luk olsem wanem oli save givhan long grup ya mo givim samting we i nidim. Taem eria elda i visitim kongregesen we grup ya i stap long hem, hem i save wok wetem grup ya. Afta, hem i raetem wan sot ripot long branj ofis blong tokbaot ol samting we hem i nidim mo olsem wanem grup ya i stap gohed. Long taem we i stret, maet grup ya i kam wan kongregesen. Sipos evriwan oli folem advaes blong oganaesesen blong Jehova, bambae Jehova i glad tumas.—1 Kor. 1:10; 3:5, 6.

OL GRUP BLONG PRIJ

⁴⁵ Ol Kristin we oli givim laef blong olgeta i go long Jehova, oli gat wok blong serem gud nius wetem ol narafala. I gat plante rod blong mekem olsem. Be bighaf blong yumi i laekem moa blong joen wetem sam narafala blong go prij. (Luk 10:1) From samting ya, ol kongregesen oli mekem ol miting blong prij long wiken mo long medel wik. Ol pablik holide tu oli gudfala janis blong joen olsem wan grup blong prij, from we plante brata mo sista oli no wok. Sevis Komiti Blong Kongregesen i mekem plan blong ol miting blong prij long dei mo long sapa, long taem mo ples we i stret.

⁴⁶ Taem yumi prij olsem wan grup, ol pablisa oli wok wanples, nao bilif blong olgeta wanwan i save “leftemap tingting” blong ol narawan. (Rom 1:12) Ol niufala pablisa oli save wok wetem ol pablisa we oli prij longtaem finis mo oli gat gudhan long wok blong prij, blong kasem trening. Long sam ples we i no sef, i moagud we 2 o 3 pablisa oli wok wanples. Nating se yu gat plan blong wok yu wan, be i gud yu joen long miting blong prij. Samting ya i save leftemap tingting blong yu mo ol narafala long grup. Taem yu save se i gat sam narafala we oli stap prij klosap, bambae tingting blong yu i strong moa. Ol paenia mo ol narafala oli no nid blong go long evri miting blong prij we kongregesen i mekem, antap moa, sipos i gat miting ya evri dei. Be i gud oli traem go long sam miting blong prij evri wik.

⁴⁷ !Yumi evriwan i mas folem eksampol blong Jisas mo ol aposol blong hem! Yumi save se Jehova bambae i blesem yumi sipos yumi traehad blong joen fulwan long impoten wok ya blong talemaot gud nius blong Kingdom.—Luk 9:57-62.