Yu Mas Faenem Ol Man Ya Fastaem, Nao Yu Save Prij Long Olgeta
1. ?From wanem ol brata mo sista we oli toktok lanwis blong ol man blong ol narafala kantri, oli prij long ol man ya long prapa lanwis blong olgeta?
1 Long lafet blong Pentekos long yia 33 K.T.a, i gat plante man blong ol narafala kantri i stap. Taem tabu spirit i kamdaon long ol disaepol blong Jisas, olgeta ‘oli stat toktok long ol lanwis blong ol narafala man ya.’ (Wok 2:4) From samting ya, samwe long 3,000 man oli baptaes. I luk olsem se ol man we oli kam long ol narafala ples oli kasem save long lanwis Hibru no Grik. Nating se i olsem, Jehova i wantem se oli harem ol tok blong Kingdom long prapa lanwis blong olgeta. Hemia from we, taem man i harem gud nius long prapa lanwis blong hem, hem i lesin moa. Taswe, long taem blong yumi tu, sipos i gat ol man blong plante defren kantri oli stap long wan ples, ol brata mo sista we oli toktok lanwis blong ol man ya oli prij long olgeta long prapa lanwis blong olgeta. (Organized, pej 107, haf 2-3) Ol grup we oli toktok narafala lanwis, oli no gat wan stret ples we oli prij long hem. Be oli go long ol defdefren eria blong prij long ol man we oli toktok lanwis blong olgeta. Maet ol man ya oli stap long teritori blong kongregesen we grup ya i joen long hem, no long teritori blong ol kongregesen raonabaot.
2. (a) ?Wanem spesel wok we yumi mas mekem? ?Yumi mekem wok ya weples? (b) ?Ol kongregesen blong ol defdefren lanwis we oli stap long wan taon, oli save mekem wanem blong givgivhan long olgeta? (c) ?Sipos wan brata no sista i faenem wan man blong narafala lanwis we i wantem save moa, hem i mas mekem wanem?
2 Sipos yu stap long wan ples we ol man oli toktok sem lanwis nomo, yu save prij long evri haos. Be i no olsem taem yu stap long wan taon we i fulap long ol man blong plante defren kantri. Maet ol kongregesen blong ol defdefren lanwis oli stap prij long taon ya. Sipos olgeta ya oli faenem ol man we oli toktok lanwis blong kongregesen blong yufala, oli save talemaot long yufala. Be bigfala wok blong faenem ol man ya i stap long han blong yufala nomo. (Lukluk bokis ya “Yumi Givgivhan Long Yumi.”) Taswe yu save joen long wan spesel wok blong faenem olgeta. Long wok ya, yu askem long ol man sipos oli save samfala we oli toktok lanwis blong yu. ?Bambae yu mekem wok ya olsem wanem?
3. ?Kongregesen i mas tingbaot wanem samting, blong i save weples blong mekem wok ya mo hamas taem blong spenem?
3 ?Yumi Folem Wanem Plan Blong Mekem Wok Ya? ?Yumi mas spenem hamas taem blong traem faenem ol man blong narafala lanwis? Hemia i dipen long plante samting long ples blong yumi. I gud yumi tingbaot se: ?Hamas man long ples blong yumi oli toktok lanwis ya? ?Hamas man oli stap talemaot gud nius long lanwis ya? ?I gat nem blong hamas man finis we grup no kongregesen ya i save prij long olgeta? I no nid blong kongregesen i mekem bigfala wok long evri haf blong teritori blong hem. Maet oli save mekem wok ya long ol haf blong teritori we plante man oli stap long hem. Mo oli save mekem sem mak long ol teritori we oli no longwe tumas. Be i mas gat wan plan blong mekem wok ya. Olsem nao, plante moa man oli save gat janis blong singaot God long nem blong hem Jehova.—Rom 10:13, 14.
4. (a) ?Yumi folem wanem plan blong mekem wok ya? (b) Traem talem sam rod blong faenem ol man we oli toktok lanwis blong yu.
4 Blong mekem se tu grup i no wok long sem teritori, kampani blong ol elda, antap moa elda we i lukaot long wok blong prij, i mas mekem plan blong wok ya, mo i mas lukaot long hem. (1 Kor. 9:26) Taem i gat wan grup blong narafala lanwis long wan kongregesen, kampani blong ol elda long kongregesen ya i jusum wan brata long grup ya blong i lidim wok ya. I moagud sipos brata ya i wan elda no i wan man blong givhan. Plante kongregesen mo grup oli mekem sam smosmol wok fastaem we i givhan long olgeta blong oli faenem ol man ya. Maet oli yusum buk blong telefon no Intenet blong faenem nem blong ol man we oli toktok lanwis ya. Nao oli ringim ol man ya long telefon no oli go long haos blong olgeta, blong oli faenemaot sipos adres blong olgeta i mas stap long lis blong olgeta. Maet ol elda long kongregesen we grup blong narafala lanwis i stap long hem, oli luk se sam samtaem i stret blong mekem wan plan. Plan ya se oli askem long evriwan long kongregesen we oli stap prij, blong oli joen long wok ya blong traem faenem ol man blong narafala lanwis ya.—Lukluk bokis ya “Sam Rod Blong Faenem Olgeta We Oli Toktok Lanwis Blong Yu.”
5. (a) ?Wanem advaes i go long olgeta we oli mekem wok ya? (b) ?Taem yumi mekem wok ya, yumi save talem wanem long ol man?
5 Taem yumi joen long wok ya blong traem faenem ol man, tingting blong yumi wanwan i mas klia gud se yumi mekem wok ya blong wanem. Mo yumi mas jenis gud, from we hemia i olsem wok blong prij nomo. Plante brata mo sista oli luk se i gud blong lanem ol fastok long lanwis. Hemia i givhan long olgeta blong oli stap glad long wok ya mo blong oli kam gud moa long lanwis ya. Yumi save kaontem ol aoa we yumi spenem long wok ya blong faenem ol man, be yumi no kaontem ol aoa blong raetem ol lis mo droem ol map. Taem yu faenem wan man we i toktok lanwis blong yu, yu mas talemaot gud nius long hem. Nao yu go talem kwiktaem long elda we i lukaot long wok blong prij no long brata we hem i jusum, blong hem i save raetemdaon ol save we yu givim. Yu mas mekem olsem, nating se man ya i lesin no i no lesin. Wok ya blong faenem ol man blong narafala lanwis i impoten. Be yumi no mas spenem olgeta taem blong yumi long wok ya nomo. Yumi mas skelem gud wetem ol narafala haf blong wok blong prij tu.—Lukluk bokis ya “?Bambae Mi Mi Talem Wanem?”
6. ?From wanem i had moa blong faenem olgeta we oli nambut?
6 Yumi Traem Faenem Olgeta We Oli Nambut: Wok ya blong faenem olgeta we oli nambut i had moa. Yumi mas traehad bigwan mo yumi no mas lego. Taem yumi mitim wan man, yumi no luksave sipos hem i nambut from klos blong hem no from nem blong hem nomo. Mo tu, plante taem ol famle mo ol fren blong ol nambut oli no glad blong givim save long yumi. Ol advaes we i kam biaen i save givhan long yumi blong yumi faenem olgeta we oli nambut. Mo i save givhan long yumi tu blong yumi faenem olgeta we oli toktok narafala lanwis.
7. (a) ?Yumi save go long haos blong ol man mo askem wanem long olgeta? (b) ?Yumi save mekem wanem blong man blong haos i trastem yumi?
7 Long sam grup mo kongregesen blong ol nambut, oli luk se i gud blong go long haos blong ol man, mo blong askem long olgeta sipos oli save sam man olsem. Ating man blong haos i save wan man we i stap mekem saen long han blong hem blong toktok. Maet man ya i stap klosap long hem, maet hem i wok wetem hem, no maet hem i wan yangfala long skul. Ating hem i save wan ples we i gat saen long rod, blong talem long ol man se oli mas lukaot from we ol pikinini we oli nambut oli stap pas long ples ya. Ating hem i gat wan famle we i nambut. Yu mas tingbaot se maet hem i no trastem yu. Be yu save mekem se hem i no fraet, sipos yu toktok long hem olsem wan fren, mo yu go stret long poen, mo yu tok tru, mo yu soemaot respek. Samfala oli luk se i gud blong soem Baebol no DVD long saen lanwis. Afta, oli tokbaot smol se oli wantem talemaot sam gudfala promes blong Baebol long ol man olsem. Sipos man blong haos i no glad blong givim save long yu, maet hem i glad blong karem nem mo adres blong yu, no wan pepa we i talemaot ol miting blong kongregesen. Hem i save givim samting ya long fren no famle blong hem we i nambut.
8. ?Wan narafala kongregesen i save givhan olsem wanem long kongregesen blong ol nambut?
8 Maet wan kongregesen blong ol nambut i stap long wan bigfala taon we i gat plante teritori long hem. Long wan no tu dei evri yia, oli save singaot wan narafala kongregesen we i klosap mo i toktok narafala lanwis, blong i givhan long olgeta blong oli faenem olgeta we oli nambut. Kongregesen blong ol nambut bambae i lidim miting blong prij. Long miting ya, oli givim advaes mo oli soemaot olsem wanem blong mekem wok ya. Taem oli seraot long ol grup blong prij, long olgeta grup ya i mas gat wanwan brata no sista we i nambut. Mo ol grup wanwan bambae i karem wan teritori blong wok long hem.
9. ?Yu save mekem wanem taem yu go long ol ples we ol nambut oli hivap long hem?
9 Yu save faenem olgeta we oli nambut sipos yu go long ol ples we oli hivap long hem blong storian, no blong pleplei, no blong kasem help we oli gat raet blong kasem. Yu mas werem klos we i stret long ples we yu go long hem. I moagud yu traem toktok long wan no tu man, i bitim we yu toktok long grup. Mo yu toktok long kwaet fasin nomo we i no pulum ae blong ol man. Sipos oli glad blong storian, ating bambae oli talem nem mo adres blong olgeta long yu, mo yu save mekem sem mak.
10. ?Ol brata mo sista oli save mekem wanem, taem oli go long ol ples blong bisnes blong faenem ol man we oli nambut?
10 Wan narafala rod, se yufala i save gat ol map blong ples blong yufala, we oli makem ol ples blong bisnes long olgeta, nao long wan stret taem, yufala i save go luk ol bisnes man ya. Long wan map, maet oli makem ol stesen blong bensin. Long narafala map, maet oli makem ol ples blong wasem klos, no ol restoron, no ol hotel, no wan narafala bisnes. I moagud we i gat sem kaen bisnes nomo long wan map. Olsem nao, olgeta we oli prij oli save yusum sem fastok, mo taem oli mekem bakegen mo bakegen, bambae oli kam gud moa long hem. Traem tingbaot: Plante taem ol man we oli nambut oli stap long ol hotel. Maet yu go long ofis blong hotel nao yu eksplenem wok blong yu long man we i stap long ofis ya. Yu save givim wan envlop long hem we i gat DVD insaed long hem mo wan pepa blong singaot man i kam long miting blong kongregesen. Yu save askem long man ya blong i pasem envlop ya i go long eniman long hotel we i nambut. Long sam ples blong bisnes, yu save askem nomo sipos i gat sam wokman no sam kastoma we oli nambut. Maet long teritori blong yu i gat wan skul blong ol nambut. Yu save askem long ofis blong skul ya sipos yu save putum sam DVD blong ol buk blong yumi long laebri, blong ol nambut oli save lukluk.
11. ?From wanem wok ya blong faenem ol man i wan impoten haf blong wok blong prij?
11 Wan Wok We i Impoten: Taem yumi mekem wok ya blong faenem ol man we oli toktok lanwis blong yumi, yumi save kam taed, mo wok ya i no isi. Mo tu, sam ples oli jenis kwik, from we plante man oli muvaot mo ol narafala man oli kam. Hemia i mekem se oltaem kongregesen i mas mekem ol jenis ya long lis blong ol nem mo adres we hem i holem. Nating se i olsem, long plante moa ples, wok ya blong faenem ol man blong ol narafala lanwis i stap kam wan impoten haf blong wok blong prij. Jehova nao i givim wok long yumi blong prij. Hem i wantem we yumi mekem i sem mak long olgeta man, olsem we hem i stap mekem. (Wok 10:34) Hem i “wantem sevem olgeta man, mo i wantem we olgeta man bambae oli save trutok blong hem.” (1 Tim. 2:3, 4) Taswe, yumi mas wok gud wetem Jehova mo wetem ol brata mo sista blong yumi, blong yumi faenem ol man blong ol narafala lanwis we ‘oli gat gudfala tingting, nao oli harem tok blong hem.’—Luk 8:15.
[Futnot]
a K.T. i minim Kristin Taem.
[Bokis blong pija long pej 5]
Yumi Givgivhan Long Yumi
Taem wan grup no kongregesen we i toktok narafala lanwis i nidim help blong faenem ol man blong lanwis ya, elda we i lukaot long wok blong prij i save askem long ol elda blong ol kongregesen we oli stap klosap. I moagud blong askem nomo long olgeta we oli klosap no olgeta we oli gat plante man long teritori blong olgeta we oli toktok lanwis ya. Olsem nao, ol kongregesen ya oli save talem long ol brata mo sista se sipos oli faenem wan man we i toktok lanwis ya, oli mas raetemdaon nem, mo adres, mo lanwis blong hem. Afta, oli save givim long elda we i lukaot long wok blong prij no long wan narafala brata we hem i jusum. Nao elda ya bambae i givim ol adres ya long kongregesen no grup we i bin askem help. Ol elda we oli lukaot long wok blong prij long ol kongregesen ya, oli save mekem wan plan we evriwan oli agri long hem, blong wok long ol teritori we i gat ol man blong ol narafala lanwis oli stap long hem, mo blong lidim ol man we oli intres oli go long kongregesen no grup we i stret long olgeta.
Sipos wan brata no sista i faenem wan man blong narafala lanwis (no wan man we i nambut) we hem i intres bigwan, kwiktaem nomo hem i mas fulumap pepa ya Please Follow Up (S-43). Nao hem i givim pepa ya long sekretari blong kongregesen blong hem. Olsem nao, man ya bambae i kasem help kwiktaem blong hem i save fren gud wetem God.—Lukluk km 5/11 pej 3.
[Bokis blong pija long pej 6]
Sam Rod Blong Faenem Olgeta We Oli Toktok Lanwis Blong Yu
• Yu askem long ol narafala, maet olgeta we yu stadi Baebol wetem olgeta, no ol famle blong yu, no ol man we yu wok wetem olgeta, no sam narafala man bakegen.
• Yu lukluk long buk blong telefon blong faenem nem blong ol man we oli toktok lanwis blong yu. Maet kampani blong telefon i save givim lis blong ol nem mo adres blong ol man we yu yu gat namba blong olgeta nomo, no maet yu save faenem wan lis olsem long Intenet.
• Yu go long ol ples we ol man oli save go long olgeta blong faenemaot samting, olsem ol pablik laebri, mo ol ofis blong gavman, mo ol kolej.
• Yu ridim niuspepa blong ples blong yu. Maet i gat sam mesej we oli talemaot sam samting we ol grup blong ol narafala lanwis bambae oli mekem.
• Yu go long ol stoa we plante man blong ol narafala lanwis oli stap go long olgeta.
• Yu askem long sam stoa, no long yunivesiti, no long epot, no long wof, no long maket, sipos yu save putum wan tebol blong soem ol buk blong yumi long lanwis blong yu.
• Sipos i stret long loa blong kantri, yu save pem wan buk blong telefon we i gat nem blong ol kampani blong mekem bisnes i stap long hem, no wan program blong kompiuta we i lukaot ol nem long Intenet.
[Bokis blong pija long pej 7]
?Bambae Mi Mi Talem Wanem?
Sipos ol tok blong yu i kamaot long hat, mo yu toktok olsem wan fren, mo yu go stret long poen, bambae ol man oli trastem yu. Plante taem i gud yu soem wan buk blong yumi fastaem long lanwis ya.
Yu talem halo long man, nao yu save talem se: “Mifala i stap traehad blong faenem ol man we oli toktok ______ lanwis. Mifala i wantem tokbaot ol promes blong Baebol wetem olgeta. ?Yu yu save wan man we mifala i save storian wetem hem?”
Taem yu traem faenem ol man we oli nambut, yu save talem se: “Halo. ?Yu yu glad sipos mi soem wan samting long yu? [Yu yusum wan smol masin we yu karem wetem yu, blong soem wan vas blong New World Translation long DVD.] Hemia wan vas blong Baebol long Saen Lanwis Blong Ostrelia. Mifala i gat plante narafala DVD we mifala i givim fri nomo long ol man we oli nambut. Ol DVD ya oli blong givhan long olgeta blong oli save God mo blong oli fren gud wetem hem. ?Yu yu save wan man we i nambut, no wan man we i yusum saen lanwis from we hem i no save harem evri samting?” Maet man blong haos i no save tingbaot wan man. I gud yu askem long hem sipos hem i bin luk wan man olsem long wok, no long skul, no long wan ples klosap long haos blong hem.