LAEF BLONG OL KRISTIN
Wokgud Tugeta Blong Prij Long Ol Defren Lanwis
Ol man oli glad moa blong lesin long mesej blong Kingdom long prapa lanwis blong olgeta. Ating hemia nao from wanem long Pentekos 33 Kristin taem, Jehova i mekem se “ol man Jiu we oli stap long ol narafala neson” oli harem gud nius long prapa ‘lanwis blong olgeta,’ nating se oli toktok lanwi Hibru o Grik. (Wok 2:5, 8) Tede, i gat ol man blong defdefren kantri we oli stap long semfala eria, taswe ol kongregesen we oli gat miting long ol defren lanwis, maet oli mekem semfala teritori we olgeta long narafala lanwis tu oli mekem. ?Olsem wanem ol pablisa long ol defren kongregesen ya oli save wokgud tugeta, blong no mekem ol man long teritori oli kam kros o taed long olgeta?
Storian Tugeta Fastaem. (Pro 15:22): Ol brata we oli lukaot long wok blong prij long ol kongregesen we oli toktok defren lanwis, oli mas storian tugeta mo mekem wan plan blong prij, we evriwan oli agri long hem. Sipos teritori i smol nomo, ol kongregesen we oli prij long defren lanwis, maet oli prij nomo long man we i toktok lanwis blong olgeta. Be sipos teritori blong olgeta i bigwan tumas mo oli no naf blong mekem evriwan, maet narafala lanwis i save givhan, be sipos oli faenem wan man we i intres, oli mas talemaot long kongregesen we i toktok lanwis blong man ya. (od pej 93 haf 37) O maet oli save askem wan narafala kongregesen blong i faenem ol man we oli toktok lanwis blong olgeta, mo oli talem long olgeta blong oli save go visitim ol man ya. (km 7/12 pej 5, bokis) I gud blong tingbaot se long wan haos, maet i save gat plante man we oli toktok defren lanwis. Taem yu prij long wan teritori olsem, yu mas meksua se yu folem loa blong kantri blong pasem infomesen long saed blong wan man.
Wokgud Tugeta (Ef 4:16): Yufala i mas folemgud ol plan we brata we i lukaot long wok blong prij i mekem. ?Olsem wanem? ?Yu yu stap mekem stadi wetem wan man we i toktok defren lanwis? Sipos yu pasem stadi ya i go long kongregesen o grup we i toktok lanwis blong hem, maet bambae hem i gohedgud kwiktaem.
Reregud Fastaem (Pro 15:28; 16:1): Sipos yu faenem wan man long teritori blong yu we i toktok wan defren lanwis, i gud we yu traem tokbaot gud nius long hem. I min se yu mas reregud fastaem. Yu save daonlodem ol defren Baebol mo video long JW Language app, mo yu lanem ol fastok long ol defren lanwis ya.