Yumi Mas Tingbaot Ol Narafala—Haf 2
1 Yumi wantem holem wan gudfala fasin fren wetem ol man we oli stap long ples blong yumi, sipos i gat rod blong mekem olsem, mo kasem mak we i stret blong mekem. Blong mekem olsem, yumi mas soem se yumi tingbaot mo yumi gat respek long ol filing blong olgeta mo ol samting we oli gat raet blong mekem.
2 Ol man oli save se ol Wetnes blong Jeova oli gat gudfala fasin. Ol gudfala fasin we yumi soemaot long eria blong yumi, long skul, long ples blong wok, mo tu long ol asembli blong yumi, i mekem plante man oli talem ol gudfala toktok long saed ya.—Lukluk Wajtaoa (Engglis mo Franis) blong Jun 15, 1989, pej 20.
3 I gat plante samting we oli joen wetem gudfala fasin, olsem fasin blong mekem i stret long narafala mo tok tru, fasin blong wok strong, mo gudfala fasin blong laef. Wan moa samting se, respek long ol man we oli stap kolosap long Haos Kingdom blong yumi. Sipos yumi no gat fasin blong tingbaot ol man we oli stap raonabaot long yumi, maet oli no wantem luksave ol narafala gudfala fasin blong yumi. Pol i talem long yumi blong ‘mekem we fasin blong laef blong yumi evri dei, i stret gud long mak blong gud nyus.’—Fil. 1:27.
4 Wanwan taem, sam man we oli stap kolosap long Haos Kingdom, oli komplen se olgeta we oli stap kam long miting, oli no soem fasin blong tingbaot ol narafala. Ol brata mo sista, oli no mas stap hivap long saed blong rod fored long Haos Kingdom. Mo tu, oli no mas storeyan long bigfala voes, mekem se ol man we oli stap kolosap oli save harem. Oli no mas letem ol pikinini oli ron insaed mo afsaed long Haos Kingdom. Fasin blong no tingbaot narafala taem yumi satem strong ol doa blong trak no mekem wesil, i save mekem ol man we oli stap long ol haos kolosap, oli harem nogud. Fasin olsem i save mekem ol man oli tingting nogud long kongregesen. Mo tu, yumi mas folem ol stret rul taem yumi draevem trak long eria ya.—Rom 13:1, 2, 5.
5 Yumi no mas putum trak long ples we i no blong pablik, no long ples we i blokem rod, blong narafala trak i no save pas. Yumi no mas yusum ples blong putum trak we ol bisnesman oli mekem blong ol kastoma blong olgeta, sipos yumi no askem fastaem. Long ples we tri no fo kongregesen oli yusum sem Haos Kingdom, i gat miting kolosap evri dei blong wik. From samting ya, i impoten we bodi blong ol elda long ol kongregesen ya, oli mas wokgud tugeta.—Lukluk Wajtaoa (Engglis mo Franis) blong Oktoba 1, 1988, pej 17, haf 13.
6 Baebol i talem long yumi blong ‘leftemap nem blong God long olgeta samting we yumi mekem.’ Fasin blong tingbaot ol man we oli no Kristin i joen long samting ya. (1 Kor. 10:31-33) Sipos yumi ‘stap lukaot long ol bisnes blong ol narafala man tu,’ bambae yumi no go long graon blong narafala taem hem i no wantem, olsem we yumi no kea long tingting blong hem. (Fil. 2:4) Mo tu, bambae yumi no blokem ol bisnesman taem oli bisi long wok blong olgeta.
7 Fasin blong tingbaot ol narafala—insaed mo afsaed long kongregesen—i soem ol filing we oli stap long hat blong yumi. Ol samting we yumi mekem mo talem, oli mas soem se, ‘yumi laekem ol man we oli stap raonabaot long yumi, olsem we yumi stap laekem yumi wan.’—Mat. 7:12; 22:39.