Long Ful Wol Yumi Givimaot Kingdom Nyus Ya We i Stret Long Taem Blong Yumi
1 Long Sande, Epril 23, bambae i gat wan spesel pablik tok we yumi intres tumas long nem blong hem, “En Blong Ol Gyaman Skul i Kolosap.” Long en blong miting long dei ya, bambae oli soemaot wan nyufala Kingdom Nyus we i gat fo pej blong hem, mo we i pulum tingting blong ol man. Mesej insaed long hem we i stret long taem blong yumi, bambae yumi seremaot long ful wol long tri wik, stat Epril 24 kasem Mei 14.
2 Long olgeta ples long wol, tingting blong ol man i fasfas. Nomata wanem ples oli laef long hem, oli stap kasem fulap problem. Kingdom Nyus ya bambae i pulum intres blong ol man we oli rili wari long ol samting we oli stap kamaot, from we hem i pulum olgeta blong lukluk long Tok blong God olsem nambawan ples blong faenem ol save we i lidimgud man. (Sam 119:105) Yumi evriwan i wantem tumas blong kasem nyufala Kingdom Nyus ya long Epril 23. Bifo long taem ya, i gat plante samting yumi save mekem blong reregud long bigfala wok ya blong tri wik.
3 Leftemap Tingting Blong Evriwan Blong Joen Fulwan: ?Hu i save joen long wok ya? !Tru ya, evriwan we oli pablisa finis bambae oli wantem blong joen! ?Olsem wanem long ol man we yumi stadi Baebol wetem olgeta we oli stap kam long ol miting long kongregesen? Sam long olgeta oli bin joen wetem yumi longtaem lelebet mo oli stap gohedgud. Sipos oli mekem laef blong olgeta i laenap wetem ol loa blong Baebol finis, ?oli naf blong kam ol man blong talemaot Kingdom? Pablisa we i stap mekem Baebol stadi wetem olgeta i save tokbaot samting ya wetem studen. Nao sipos studen i wantem joen long wok blong prij, bambae tu elda oli toktok wetem hem long ol samting long pej 93 mo 94 blong buk ya Ol Rul Blong Mekem Minista Wok Blong Yumi. Oli mas mekem samting ya kwiktaem. Olsemia nao, olgeta we oli no baptaes yet be oli naf blong kam pablisa, oli save joen blong seremaot Kingdom Nyus ya we i stret long taem blong yumi, long ol famle blong olgeta mo ol man we oli save olgeta.—Lukluk Wajtaoa, Mei 1, 1989, pej 17, paragraf 8.
4 Wok ya i no had tumas. Evriwan i save mekem. Long famle Baebol stadi, ol papa mama oli save mekem ol pleplei blong tijim ol pikinini blong seremaot Kingdom Nyus ya. Olsem nao, olgeta memba blong famle oli reregud blong seremaot pepa ya long ol haos wanwan. Wan isi fasin blong seremaot i moa gud. Afta wan sot fastok, soem Kingdom Nyus long man blong haos, ale askem long hem blong ridim. Taem wan man blong haos i soem se hem i intres, raetemdaon nem blong hem, nao biaen yu save gobak blong mekem intres blong hem i gru moa. (1 Kor. 3:6, 7) Bigfala samting se, yumi yusum wan isi rod blong storeyan we yumi mekem reregud.
5 Bambae i gat ‘plante wok’ blong mekem long Epril mo Mei. Pepa we i stap insaed long Kingdom Wok blong Yumi nekis manis, “Plante Samting Blong Mekem Long Wok Blong Masta,” bambae i givim moa save.—1 Kor. 15:58.