God i Givim Plante—Yumi Mas Mekem Plante
1 !Yumi gat wan spesel blesing! !Yumi kasem trutok finis! From we yumi givim laef blong yumi long Jeova, hem i luk se ‘yumi stret blong karem gud nyus.’ (1 Tes. 2:4) Samting ya i putum moa responsabiliti long yumi. Jisas i talem se: “Man we God i givim plante samting long hem, God i wantem blong man ya i mekem plante samting.”—Luk 12:48b.
2 !Ol tok ya oli tru tumas! Yumi evriwan i gat wan bigfala blesing—yumi gat save long Tok blong God, nambawan kampani blong ol brata, mo wan nambawan hop. Taswe yumi save talem se God i rili givim plante samting long yumi. I stret nomo we hem i wantem se yumi mekem plante samting.
3 Holem Stret Tingting Long Ol Samting We Yumi Mas Mekem: Samfala oli ting se God i askem yumi blong mekem plante tumas samting. Jisas Kraes, we hem i Hed blong Kristin kongregesen, hem i mekem disisen long ‘ol samting we kongregesen i nidim’ blong gohed gud. (Efes. 4:15, 16) Hem i talem long yumi se ‘yok we hem i putum long yumi, wok blong hem i isi, mo ol samting we hem i givim long yumi blong karem, oli no hevi.’ (Mat. 11:28-30) Hem i no strong tumas long olgeta we oli no save kasem ol hae mak. (Luk 21:1-4) Sipos yumi mekem bes blong yumi, nating se i bigfala wok no no gat, bambae yumi kasem blesing.—Kol. 3:23, 24.
4 Traem askem long yu wan, ‘?Ol samting long saed blong Kingdom oli stap fasples long laef blong mi? ?Mi mi stap yusum taem mo olting blong mi long wan rod we i presem nem blong God mo i givhan long ol narafala? ?Mi mi faenem se mi haremgud moa taem mi mekem wok blong Jeova bitim we mi tingbaot mi wan mo haremgud long ol sas samting blong mi?’ Ol stret ansa long ol kwestin ya oli soemaot ol tingting long hat, we oli stap pusum yumi.—Luk 6:45.
5 Ronwe Long Ol Samting We Oli Pulum Yumi Blong Mekem Nogud Fasin: Naoia ol traem mo ol samting blong pulum yumi oli bigwan bitim olgeta taem bifo. Oli pulum yumi blong tingbaot yumi nomo, folem griri fasin, mo ronem ol fasin blong mekem yumi haremgud long bodi. Evri dei yumi fesem ol traem long saed blong rabis fasin, mo ol samting we oli pulum yumi blong brekem loa blong God. Blong winim ol traem ya, yumi mas askem Jeova blong halpem yumi. (Mat. 26:41) Hem i save yusum speret blong hem blong mekem yumi strong. (Aes. 40:29) Sipos yumi ridim Tok blong God evri dei, samting ya i givhan bigwan. (Sam 1:2, 3) Fasin blong stretem yumi wan mo fasin blong bos long tingting, oli bigfala samting tu blong halpem yumi.—1 Kor. 9:27.
6 I no naf blong laekem ol samting we oli gud nomo. Yumi mas no laekem nating ol samting we oli nogud tu. (Sam 97:10) Hemia i min se yumi no mas gat tingting we yumi wantem ol samting nogud. Proveb 6:16-19 i talem seven samting we Jeova i no laekem nating. I klia se, wan man we i wantem blong mekem Jeova i glad, i mas no laekem nating ol seven samting ya. Yumi kasem blesing ya finis we yumi gat save long trutok. Taswe yumi mas wantem blong mekem ol samting we oli laenap wetem save ya, mo tingting oltaem long ol gudfala samting nomo.
7 I stret blong prea blong ol samting oli kamaot long laef blong yu we oli mekem se yu gat ‘plante samting blong mekem long wok blong Masta.’ (1 Kor. 15:58) Plante oli faenem se sipos oli bisi oltaem long wok blong Jeova, samting ya i protektem olgeta, from we oli no gat taem blong ronem ol samting we oli blong nating nomo.
8 Taem yumi skelem bisnes ya, ol samting we Jeova i wantem yumi blong mekem oli no bitim mak. (Maeka 6:8) Yumi gat plante risen blong talem tangkyu from evri jans we yumi kasem long wok blong Jeova. (Efes. 5:20) From samting ya, yumi “stap traehad tumas, mo yumi stap hadwok long ol wok blong hem.” Yumi save se presen we bambae yumi kasem i bigwan moa bitim eni samting we God i askem yumi blong mekem.—1 Tim. 4:10.